Oqýshylar saraıynyń salynýyna Elbasy – Tuńǵysh Prezıdent Nursultan Ábishuly Nazarbaevtyń byltyr Qaraǵandyǵa jumys saparymen kelgende bergen tapsyrmasynyń túrtki bolǵanyn mindetti túrde aıta ketken jón.
Qurylys basyndaǵy saltanatty rásim barysynda oblys ákimi Erlan Qoshanov balalardy qorǵaý kúninde olarǵa laıyqty tartý jasaýdyń dástúrge aınalǵanyn rızashylyq sezimimen atap ótti.
– Elbasynyń tapsyrmasy boıynsha biz qaraǵandylyq balalarǵa keń de jaryq, qazirgi zamanǵa saı oqýshylar saraıyn syıǵa tartpaqpyz. Burynǵy saraı osydan 80 jyl buryn salynǵan bolatyn. О́kinishke qaraı, ol tıisti talaptarǵa jaýap bermeıdi jáne oǵan nıet bildirýshilerdiń barlyǵy syımaıdy da, – dedi oblys basshysy.
Kapsýlany salý rásimine qatysýshylar qaraǵandylyq oqýshylardyń qolóner buıymdary men ónertabystarynyń kórmesin tamashalaýǵa múmkindik aldy. Sondaı-aq, kórmede avıamodel qurastyrý úıirmesiniń qatysýshylary jasaǵan ushaqtar da kórermen nazaryna usynyldy.
Qaraǵandy qalalyq bilim bóliminiń basshysy Gúlsim Qojahmetovanyń aıtýynsha, oqýshylardyń jańa saraıynda barlyq sabaqtar men dárister tegin bolady eken.
– Oqýshylar saraıyndaǵy úıirmelerge 4 myńnan astam bala qatysýǵa múmkindik alady. Robot tehnıkasy, baǵdarlamalaý jáne avıamodel qurastyrý sııaqty 50-den astam tehnıkalyq baǵyttaǵy úıirmelerdi uıymdastyrý josparlanǵan. Sonymen qatar, biz balalarǵa zamanaýı tehnologııalardy – gıdroponıka men aeroponıkany paıdalanýdy úıretetin bolamyz. Munyń mańyzy zor jáne qazirgi ýaqytta olardyń balalarǵa óte qyzyqty dárister ekenin eskerý kerek. Gýmanıtarlyq jáne shyǵarmashylyq baǵytty qalaıtyndar úshin munda úıirmeler, sheberhanalar, horeografııalyq jáne kovorkıng zaldary jumys isteıtin bolady, – deıdi G.Qojahmetova.
Qaraǵandynyń Ońtústik-Shyǵys shaǵyn aýdanyndaǵy «Dostyq úıi» ǵımaraty ornalasqan aýmaqta boı kóteretin oqýshylar saraıynyń qurylysy 2020 jyldyń qarasha aıynda aıaqtalady dep josparlanǵan. Úsh qabatty zamanaýı nysannyń alatyn jer kólemi shamamen 10 myń sharshy metrdi quraıtyn bolady. Ǵımarattyń syrty energııa únemdeıtin materıaldarmen qaptalady.
***
Jalpy, Qaraǵandy qalasynda Halyqaralyq balalardy qorǵaý kúni merekesi keńinen atalyp ótti. Bul kúni merekelik oıyn-saýyq sharalarynyń basym bóligi ortalyq mádenıet jáne demalys saıabaǵynda uıymdastyryldy. Balalar úshin munda «Romashka», «Sholý dóńgelegi», «Tosyn syı» syndy atraksıon túrleri tegin qyzmet etti. Balalarǵa arnalǵan temir jolmen júıtkigen poıyzǵa minip, saıahat qurǵysy kelgen balaqaılardyń da qarasy mol boldy. Sonymen qatar, saıabaqta balalar shyǵarmashylyǵy ortalyqtarynyń festıvali ótti. Kaskad alańynda burym órý, qynamen sýret salý, akvagrım, fotosýret jáne sándik-qoldanbaly óner boıynsha sheberlik dáristeri uıymdastyrylady.
Budan bólek, saıabaq aýmaǵynda mentaldi arıfmetıka, mektepke deıingi damý jáne orıgamı boıynsha sabaqtar ótti. Balalarǵa boıy sereıgen bıik qýyrshaqtar tátti-dámdiler tartý etti. Saıabaqtyń tórinen oryn tepken sahnada qoıylǵan túrli taqyryptaǵy teatrlandyrylǵan kórinister kishkentaı kórermenderdi keremet áserge bóledi.
Sondaı-aq, Jańa Maıqudyq mádenıet úıinde merekege arnap ótkizilgen konserttik baǵdarlamanyń alýan túrli taqyrypty qamtyǵan qoıylymdary búldirshinderdi mol qýanyshqa bóledi. Saltanatty sharadan soń balalardyń qolóner jármeńkesi uıymdastyryldy. Odan keıin bolǵan estafeta, qýyrshaqtar men ertegi keıipkerleri oıyn baǵdarlamasy balalarǵa aıtyp jetkizgisiz merekelik kóńil kúı syılady.
