Negizi «Jýsan» operasııasynyń basty maqsaty da aldymen balalardy qutqarý bolatyn. Bul joly da taratylǵan beınekadrlarǵa kóz júgirter bolsaq, beıkúná balalardyń kóbiniń ulty qazaq ekendigin júzinen ańǵarsań da, birazy sol qandy qyrǵyn aýmaǵynda dúnıege kelgen tárizdi. Tıisinshe, toıyp tamaq ishpek túgili, eshqandaı qujattarynyń resimdelgenine kúmán keltiresiń. Onyń ústine, resmı oryndar balalardyń birqatarynyń tul jetim ekendigin rastady – ata-analary Sırııada oqqa ushqan nemese joǵalyp ketken.
Sol derekterge qaraǵanda, «Jýsan-3» qorytyndy operasııasynyń aıasynda elge qaıtarylǵandardyń ishinde 67 áıel bar eken.
Bota kózderi jáýdirep, belgisiz jaqqa asyqqan búldirshinderdiń birqatary qazaq jaýyngerleriniń qushaǵynda ushaqqa jetkenshe qalǵyp ketti. Olar elge jetkizilgen soń dárigerlik tekserýlerden keıin beıimdeý ortalyqtaryna ornalastyrylǵan.
Jalpy, soǵys oshaǵy aýmaǵynan óz azamattaryn shyǵaryp alýǵa álemniń kóptegen eli talpynys jasap jatqanymen, bizdiń elimiz memlekettik organdardyń yqpaldastyǵy men álemdik seriktesteriniń kómegimen qazirdiń ózinde aýqymdy jumystar atqaryp úlgerdi. Onyń jarqyn dáleli qysqa ýaqytta qutqarylǵan – 357 bala. Olardyń beıbit aspan astynda ómir súrý quqyǵyn memleket abyroımen júzege asyrdy.
