Qoǵam • 03 Maýsym, 2019

О́negeli áýletterge qurmet kórsetildi

1033 ret

kórsetildi

3 mın

oqý úshin

Jaqynda О́skemende «Mereıli otbasy» ulttyq baıqaýynyń aımaqtyq kezeńi ótip, ónerimen, tárbıesimen, úlgi-ónegesimen daralanǵan otbasylarǵa qurmet kórsetildi. Oblysta osymen altynshy márte uıymdastyrylǵan sharaǵa bıyl óńirdiń qala-aýdandarynan 500 otbasy qatysyp, baıqaýdyń oblystyq kezeńine toqsannan astamy joldama alypty.

Azamat QASYM

Baıqaý qorytyndysynda Jarma aýdanynyń Jaryq aýylynan kelgen Muqaevtar otbasy jeńimpaz atandy. «Bizdiń otbasymyzdyń ustanymy – ásemdik áleminde eńbek etip, ómir súrý. Osy qaǵıdany Táýelsizdik alǵan qıynshylyq jyldary da ustandyq. Áli de ustanyp kelemiz», deıdi ónegeli, ónerli áýlettiń uıytqysy Natalıa Áýbákirova. Bul kisi qujattaǵy aty Natalıa bolǵanymen, apasy Nurzeınep dep ataǵanyn aıtady. Bes baladan 14 nemere súıip otyrǵan erli-zaıyptylardyń shańyraq kótergenderine 45 jyl tolypty. Otaǵasy Momysh Muqaev týǵan aýylynda ómir boıy mehanık, kınomehanık, avtoklýb meńgerýshisi bolyp eńbek etse, Natalıa Áýbákirova aýyldyq okrýgtegi kórkemónerpazdardyń mýzykalyq jetekshisi.

Baıqaýda júldeli ekinshi oryn óskemendik Cherkashınder otbasyna buıyrdy. Otasqandaryna jıyrma jyl bolǵan Dmıtrıı men Evgenııa 12 bala tárbıelep otyr. On balasy áli kámelettik jasqa tolmaǵan, al eki balasy joǵary oqý ornynda grantpen oqıdy. Otanasy Evgenııa Cherkashına – «Altyn alqa» ıegeri. Jaqynda Shyǵys Qazaqstanǵa jumys saparymen kelgen úkimettik delegasııa osy shańyraqqa arnaıy baryp, jaǵdaılarymen tanysqan-dy. «Altaı aýdanynda turǵanbyz. О́skemenge byltyr kóship keldik. Qalanyń shet jaǵynda turamyz. Úıimiz taýdyń eteginde. Áýelde shaǵyn bolatyn, óz kúshimizben aqyryndap keńeıtip jatyrmyz. 0,2 gektar baqshamyz bar. Mamandyǵym – geolog. Altaıda turǵanda «Qazsınkte» jumys istegenmin. Azdap eshki ustaımyz. Qyzdar sony saýyp, sútin satady. Uldar qoradan shyqpaıdy. Balanyń kóp bolǵany qolyńdy jumystan bosatady. Buǵan deıin eshkimge qol jaıǵan joqpyz. О́z otbasyma ózim jaýaptymyn dep sanaımyn», degen edi sol kezde otaǵasy.

Ulan aýdanynda turatyn alty bala tárbıelep otyrǵan Jumashevtar otbasy júldeli úshinshi oryndy ıelendi. Sharýa qojalyǵymen aınalysatyn otaǵasy Dilmurat Jumashev aýdanǵa turaqty demeýshilik kórsetip otyrady. Baıqaý jeńimpazy atanǵan Muqaevtar otbasy endi Nur-Sultan qalasynda ótetin «Mereıli otbasy-2019» ulttyq baıqaýyna qatysady.

Baıqaýdyń marapattaý saltanatyna kelgen oblys ákiminiń orynbasary Ásem Núsipova: «Otandy súıý otbasynan bastalady. Otbasy – bala tárbıesiniń irgetasy qalanatyn ystyq uıa. О́kinishke qaraı qazirgi qoǵamda kezdesetin jas otbasylardyń ajyrasýy, tastandy balalar, Qarttar úıiniń paıda bolýy, zorlyq-zombylyq sııaqty qasiretterdi boldyrmaý úshin otbasy ınstıtýtyn, onyń qoǵamdaǵy rólin, qundylyqtaryn nyǵaıtýymyz qajet» deı kele aımaqtaǵy ana men balany qorǵaý baǵytyndaǵy sharalarǵa toqtalyp, Altaı, Aıagóz, Semeı qalalaryndaǵy perınataldy ortalyqtardy zamanaýı qondyrǵylarmen jabdyqtaýǵa qomaqty qarajat bólingenin, oblystaǵy mektep jasyna deıingi balalar balabaqshamen tolyq qamtylǵanyn, «Meniń mektebim» jobasy aıasynda IT synyptar men robottyq tehnıka kabınetteri ashylǵanyn, kóp balaly analar balabaqsha tóleminen bosatylǵanyn atap ótti.

О́SKEMEN