Baıqaý qorytyndysy boıynsha aımaq basshysynyń alǵys haty Semǵalıevter (Atyraý), Imashevtar (Jylyoı), Tursynbaevtar (Inder), Amanbaevtar (Isataı), Ibraevtar (Qurmanǵazy), Doskenjıevter (Qyzylqoǵa), Imanǵalıevtar (Maqat), Samalyqovtar (Mahambet) otbasylaryna tapsyryldy. Jylyoılyq Qabdrahmanovtar, qyzylqoǵalyq Aralovtar men maqattyq Jýlımanovtardyń shańyraqtary júldeli úshinshi orynnyń tuǵyrynan kórindi. Jańabaevtar (Atyraý), Amanovtar (Isataı), Túsekenovter (Mahambet) otbasylary ekinshi oryndy jeńip aldy. Al ulttyq baıqaýdyń oblystyq kezeńinde qurmanǵazylyq Baqtygereev pen ınderlik Tilekqabylovtardyń otbasylary jeńimpaz bolyp tanyldy. Nur-Sultan qalasynda ótetin respýblıkalyq kezeńge óńir atynan naqty qaı otbasynyń baratynyn aldaǵy ýaqytta arnaıy qurylǵan komıssııa anyqtaıdy. Júldeger eki otbasyna da Qostanaıdaǵy «Qaraǵaı ormany» shıpajaıyna joldama berildi.
Saltanatty sharaǵa ul-qyzdarymen, nemere-shóberelerimen kelgen otbasylar baqyt pen berekeniń uıasyna aınalǵan shańyraqtary jaıly taǵylymdy áńgimeler aıtty.Baqtygereevter otbasynyń altyn dińgegi Meńdihan aǵa men Shattyq apaı 53 jyldan beri birge ǵumyr keship keledi. Aımaqqa ustazdar áýleti retinde tanymal otbasy músheleri bilim berý salasynda eńbek etken. Búginde alty balasy men nemereleri de osy izgi joldy jalǵastyryp otyr.
Al ekinshi júldeger Aımeken Tilekqabylova – «Altyn alqa» ıegeri. 8 balasynan 28 nemere, 16 shóbere súıgen ana urpaqtarynyń ortasynda meıirimniń shýaǵyndaı jaıly ómir súrýde.
Elbasy bastamasymen qolǵa alynǵan «Mereıli otbasy» ulttyq baıqaýy qazaq elindegi birlik pen berekege negizdelgen, túsinistik pen tatýlyqty temirqazyq qylǵan jarasymdy otbasylardyń jarqyn ómirin, baqytty neke qundylyqtaryn úlgi etýge baǵyttalǵan. Izgi nıetten týyndaǵan ıdeıaǵa qoldaý kórsetip, qatysýshylardyń sany da jyl sanap artyp kele jatqany qýantady.
