Sáken Seıfýllın
(1894-1938) 1917 jyly qazaq komıteti qurylǵanda áýeli orynbasar, birazdan keıin onyń bastyǵy bolyp saılandy. «Jas qazaq» uıymyn quryp, «Tirshilik» atty gazet shyǵarǵan. 1922 jyldyń kókteminde Sáken qasyna bir top serikterin ertip, Betpaqdala arqyly Túrkistanǵa ótip, Tashkentke barady. Orynborǵa qaıtyp kelgen soń «Eńbekshi qazaq» gazetiniń redaktorlyǵy men Oqý halyq komıssarıatynyń orynbasarlyǵyna taǵaıyndalady. S.Seıfýllın gazetti 1922 jyldan 1924 jyldyń sáýirine deıin basqarǵan. Kezinde «Qyzyl suńqar» atanyp, Keńes ókimetin ornatýǵa belsene atsalysqan Sáken Seıfýllın de qyzyl qýǵyn-súrginnen qashyp qutyla almaǵan. Aqyn jazyqsyz tutqyndalyp, 1938 jyly atý jazasyna kesiledi.
Moldaǵalı Joldybaev
(1887-1938) gazetti 1924 jyldyń sáýirinen bastap sol jyldyń jeltoqsanyna deıin basqarǵan. 1910-1918 jyldary qoǵamdyq jumystarǵa belsene kirisedi. «Aıqap» jýrnalyna, «Qazaq» gazetine eńbekshi halyqtyń muń-múddesin kózdeıtin maqalalary jaryq kórip turady. «Eńbekshi qazaqqa» qazaqtyń beldi aqyn-jazýshylary Beıimbet pen Sáken kezek-kezek basqaryp turǵan kezeńde jaýapty redaktorlyqqa keledi. M.Joldybaev 1927 jyldan bastap shyǵa bastaǵan ulttyq pedagogıkalyq arnaýly basylym – «Jańa mektep» jýrnalynyń alǵashqy redaktory bolady.
Turar Rysqulov
(1894-1938) Komıtern AK Orta-Shyǵys bólimi meńgerýshisiniń orynbasary, sonymen qatar 1924 jyldyń ortasynan 1925 jyldyń shildesine deıin Komıternniń Mońǵolııadaǵy ókili, 1926 jyly BK(b)P Qazaq ólkelik komıtetiniń baspasóz bóliminiń meńgerýshisi jáne ólkelik «Eńbekshi qazaq» gazetiniń jaýapty redaktory qyzmetterin atqarǵan. Gazetke 1926 jyldyń sáýirinen bastap 1926 jyldyń maýsymyna deıin redaktor bolǵan. 1926 jyldyń maýsymynan 1937 jyldyń shildesine deıin RSFSR halkomkeńesi tóraǵasynyń orynbasary bolyp, repressııaǵa ushyraǵan.
Oraz Jandosov
(1889-1938) Túrkistan KP OK-niń úgit-nasıhat bóliminiń meńgerýshisi jáne BK(b)P Qazaq ólkelik komıtetiniń ekinshi hatshysy bolǵan. 1923-1924 jyldary Máskeýdegi K.Tımırıazev atyndaǵy aýylsharýashylyq akademııasynda oqyǵan. 1924-1928 jyldary BK(b)P Qazaqstan ólkelik komıteti úgit-nasıhat bóliminiń meńgerýshisi qyzmetin atqarǵan. «Eńbekshi qazaq» gazetine basshylyq jasaǵan kezderi, mine, osy qyzmette júrgen kezben tuspa-tus keledi. O.Jandosov gazetti 1926 jyldyń maýsymynan 1926 jyldyń shildesine deıin basqarǵan.
Oraz Isaev
(1899-1938) gazetti 1926 jyldyń shildesinen 1926 jyldyń tamyzyna deıin basqarǵan. Bul jóninde belgili ǵalym Temirbek Qojakeev «Egemen Qazaqstannyń» 1994 jylǵy 14 jeltoqsanda shyqqan «gazettiń alǵashqy kerýenbasylary» degen maqalasynda bylaı dep jazady: «1926 jylǵy shildeniń 13-i men tamyzdyń 30-y aralyǵynda gazet redaktory O.Isaev boldy Bul tusta ol Qazkraıkomnyń uıymdastyrý bólimin basqarǵan. Keıin on jyldaı Halyq Komıssarlar Keńesine tóraǵalyq etken isker de bedeldi qyzmetker bolǵan».
