Qaıyrymdylyq sharasy barysynda jınalǵan 3 mıllıon teńgeden astam qarjy aýyr naýqasqa ushyraǵan balalar úshin qolarbalar men estý apparattaryn satyp alýǵa jumsalady. Sondaı-aq 3 balaǵa aqshalaı kómek beriledi.
«Bizdiń maqsatymyz – kómekke muqtaj jandarǵa qol ushyn berip qana qoımaı, jas urpaqty ózgeniń qıyndyǵyn birge bólise bilýge baýlý. Mektebimizde túrli áleýmettik jobalar júzege asyrylady. Bıyl qaıyrymdylyq balyn ótkizýdi uıǵardyq. Osyndaı sharany eki jylda bir ret uıymdastyratyn bolamyz», deıdi mektep horeografy Vıktorııa Tıhonko.
Aýksıonǵa 12 lot shyǵarylyp, kartınalar, qyshtan jasalǵan buıymdar lezde satylyp ketken. 9 synyp oqýshysy Arýjan Bekettiń qolynan shyqqan «Pil» atty kartına 136 myń teńgege saýdalanǵan.
«Pil – danalyqtyń, aqyldyń, sabyrdyń sımvoly. Bul kartına ózi barǵan shańyraqqa senim, mahabbat, bereke ákeletinine senimdimin. Osy sýretti salý úshin 5 kún eńbektendim. Boıymdaǵy bar ónerimdi darytýǵa tyrystym. Az da bolsa kómek bolatyny jaıyndaǵy oı meni alǵa ıtermeledi. Baǵasy 8 myń teńgeden bastalǵan kartınam búgingi aýksıonda eń qymbatqa baǵalandy. Eńbegimniń aqtalǵanyna qatty qýandym. Sebebi dál osyndaı baǵaǵa satylady dep oılamappyn. Kásibı sýretshi emespin ǵoı. Ony satyp alǵan kásipkerge alǵysym sheksiz», - deıdi Arýjan ishki tolqynysyn jasyra amaı.
Aýksıonǵa shyǵarylǵan buıymdardan ǵana túsken qarajat 569 myń teńgeni qurady. Demeýshiler aıtarlyqtaı úlesterin qosty. Jınalǵan qarajat týa bitti sal keseline shaldyqqan 2 balaǵa arnaıy arba men qulaǵynda múkisi bar 3 jetkinshekke estý apparattaryn alýǵa jumsalmaq.
«Meniń balama estý apparatyn syıǵa tartqandaryńyz úshin rahmet. Osyndaı izgi urpaq ósip kele jatqan qoǵamda ómir súrip jatqanyma qýanamyn. Shyǵarmashyl, izdenimpaz, talantty jastar barda elimizdiń bolashaǵy jarqyn bolatynyna senimdimin. Barshańyzǵa myń alǵys», - dedi kópshilik aldynda sóz alǵan Irına Dıdenko.
Qaıyrymdylyq baly barysynda 8 otbasyna materıaldyq kómek kórsetildi.
