Q. О́skenbaev baıandaǵandaı, Nur-Sultan, Almaty jáne Shymkent qalalary úshin arnaıy baǵdarlama ázirlengen, onyń aıasynda jyl saıyn qala mańyndaǵy aýyldardy sapaly aýyz sýmen qamtý úshin 30 mlrd teńgeden bólinip otyrady. Bul jobalardy júzege asyrý bıyl bastalyp ketti.
Birinshi vıse-mınıstr 10,6 mln adam qala halqynan 10 mln adam búgingi tańda tolyqqandy ortalyqtandyrylǵan sýmen qamtylǵanyn aıtty. Aýyldyq jerlerde turatyn 7,7 mln adamnan 6,5 mln adam úshin ortalyqtandyrylǵan sýmen qamtý júıesi qoljetimdi.
Turǵyndarynyń sany 200 adamnan az bolatyn aýyldardaǵy 1,2 mln adam sanıtarlyq normalarǵa saı keletin sýmen qamtý qyzmetimen qamtylmaǵan. Q. О́skenbaevtyń aıtýynsha, ol jerlerge magıstraldy sý qubyrlaryn tartý tym kóp shyǵyndy talap etedi, muny eshqandaı memleket qamtamasyz ete almaıdy. Biraq, shaǵyn bolsa da, iri bolsa da, kez kelgen aýyl sýmen qamtamasyz etilýi kerek. Bul rette sanıtarlyq normalarǵa saı keletin sýmen qamtı alatyn blok-modýlderdi qoıý josparlanǵan. Osylaısha, 2 607 aýyldaǵy 1,2 mln adam sýmen qamtý qyzmetterimen qamtamasyz etiledi. Bul oraıda, sý árbir úıge deıin jetkiziledi, al ákimdik árbir úıdiń qansha kólemdegi sýdy tutynatynyn bilip otyrady.
Sonymen qatar QR IIDM sý qubyrlaryn 100% aýystyrýdy kózdep otyr. Bul qubyrlardyń tozýy máselesin tolyq sheshýge múmkindik beredi. Birinshi vıse-mınıstr atap ótkendeı, sý tarıfi ózgermeıdi.
«Sýǵa tarıf bar, biz onyń 30%-yn monopolısterge ınvestısııalyq baǵdarlama retinde qaldyrýdy (qubyrlardy aýystyrý úshin) usynamyz, 70% – aǵymdaǵy jóndeý jumystary men ákimshilik shyǵyndarǵa jumsalady. Qazir esepteýler júrip jatyr, túrli proporsııalar bolýy múmkin. 15 jyl ishinde biz barlyq qubyrlardy aýystyrýymyz kerek. Bıýdjettik baǵdarlama boıynsha árbir úsh jyl saıyn qubyrlardyń 20% jańartylyp otyrady. Osylaısha, 15 jylda biz qubyrlardy 100% jańartamyz. Qubyrlardyń jaramdylyq merzimi – 30 jyl», — dedi Q. О́skenbaev.
