Biryńǵaı operator «Qazsýshar» RMK bazasynda qurylady, oǵan aýyldarda ishki aýyldyq jelilermen toptyq sý qubyrlaryn paıdalaný fýnksııalary júkteledi. Qyzmetter sý kózinen túpkilikti tutynýshyǵa deıin usynylady, bul táýlik boıy ári úzdiksiz sýmen jabdyqtaýdy qamtamasyz etedi.
«Bul shyǵyndardy azaıtýǵa múmkindik beredi, sondaı-aq, biryńǵaı operator jobalaýmen aınalysatyn bolady. Biz sapaly jobalar alamyz. Adam resýrstary, materıaldyq-tehnıkalyq turǵydan múmkindik bolǵan jaǵdaıda biz bıýdjet qarajattaryn aıtarlyqtaı qysqarta alamyz. Deldaldardy shekteýdiń artyqshylyǵy mol», — dedi E. Nysanbaev.
Onyń aıtýynsha, búginde tarıftiń sýbsıdııalanatyn bóligi eldi mekenniń shekarasyna deıin jumys isteıdi, odan ári qun qosatyn deldal paıda bolady. Endi tutynýshyǵa deıin biryńǵaı tarıf ornatylady. Qyzmet toptyq sý qubyrlarynan sýbsıdııalanǵan tarıf boıynsha sý satyp alyp, halyqqa qosylǵan qunmen satatyn deldaldardy shektep, sýmen jabdyqtaý kózinen túpkilikti tutynýshyǵa deıin jetkiziletin bolady.
Aıta ketý kerek, búginde 6499 eldi mekenniń 546-sy «Qazsýshar» RMK toptyq sý qubyrlarynan aýyz sýmen qamtamasyz etilgen, qalǵan aýyldyq eldi mekender kommýnaldyq nemese basqa da menshik túrindegi toptyq jáne jergilikti sýmen jabdyqtaý jelilerinen qamtamasyz etilgen.
2011–2018 jyldary halyq sany 553 myń adamdy quraıtyn 268 aýyldyq eldi mekende sýmen jabdyqtaý jaǵdaıy jaqsartyldy. Jalpy, toptyq sý qubyrlarynda jelilerdiń tozýy 75%-dan 56%-ǵa deıin qysqardy.
