Alaıda, 47 myń saıajaı ýchaskesin biriktiretin aýmaqta ıesiz, kútimsiz qalǵan jer telimderi az emes. Bárinen de demalys kúnderi 20 myń adamǵa deıin baratyn ol jaqtarda jol men jaryq jaıy qanaǵattandyra bermeıdi.
Oblys ákimdiginiń otyrysynda saıajaılardy damytý máselesi talqylanyp, aımaq basshysy Qumar Aqsaqalov qordalanyp qalǵan máselelerdi sheshýdi qala ákimdigine tapsyrdy.
Eń birinshi, kúzetti kúsheıtý kerek. Turǵyndardyń ala jaz boıy mańdaı termen ósirgen rızyǵyn urlap, jemisin ózgeler kóretini jaıly shaǵymdar jıi túsedi. Sondyqtan saıajaılardy qaraýyldaıtyn eki at polısııasy men avtopatrýl jetkiliksiz. Polısııa departamentiniń basshylyǵyna kúzetti 3 ese kóbeıtýdi tapsyramyn», dedi Qumar Irgebaıuly.
Qazir saıajaılardyń 30 prosentinde sý joq. Úshten biri elektr jelisine tirkelmegen. Bıyl 1200 ýchaskeni elektr qýatyna qosýdy mindetteımin, degen oblys ákimi saıajaılarda ósken ónimdi 9 bazarda satýdy uıymdastyrýdy, ol úshin 300 oryn daıyndaýdy tapsyrdy.
Soltústik Qazaqstan oblysy
