Aldyn ala esepteý boıynsha Penjimdegi 270 úıdiń aýlasyn sý basyp, aýyl kóshelerindegi qozǵalys qıyndaǵan. Qazir oqıǵa ornynda arnaıy komıssııa jumys isteýde. Al tótenshe jaǵdaı týraly habar jarııa bolysymen, aýylǵa arnaıy top jiberilgen. Tótenshe jaǵdaılar basqarmasy men «Qazseldenqorǵaý» mekemesiniń arnaıy jasaǵy jáne áskerı qyzmetkerlerden quralǵan 200 adam qyryq shaqty tehnıkamen jaıylǵan sýdy soryp, kóshedegi qatynasty qalpyna keltirgen. Aýyldyń sý shaıǵan kóshelerine qum tóselip, kólikter júretin joldar jasaldy. Sel tasqynynan turǵyn úıler men adamdar zardap shekken joq.
– 3 maýsym kúni Penjim aýyldyq okrýginde toqtaýsyz jaýǵan jańbyrdan keıin sel júrip, 270 úıdiń aýlasyna sý jaıyldy. Turǵyn úılerge qaýip tóngen joq, adamdar din aman, mal basy túgel. Qazir arnaıy komıssııa ár úıdi tekserip, materıaldyq shyǵyndardy anyqtaýǵa kiristi. Aýyl turǵyndaryna qajetti kómek kórsetilýde. Jergilikti kásipkerler otbasylarǵa azyq-túlik taratyp, ystyq tamaqpen qamtamasyz etýdi qolǵa aldy. Aýylda jaryq, sý taratý júıesi qalypty jumys istep tur, – dedi bizge Panfılov aýdanynyń ákimi Temirlan Bektasov.
Jalpy, Panfılov aýdanynda sel júrý qaýpi sońǵy on jyldan beri tirkelmegen eken. Al Penjim aýylynyń turǵyndary dál mundaı sel tasqyny 1990 jyly bolǵanyn aıtady.
