Onda arab elderiniń lıderleri Parsy shyǵanaǵyndaǵy Saýdııanyń munaı qubyrlary men Birikken Arab Ámirlikteriniń tankerlerine qarsy jasalǵan shabýyldardy talqylady. Er-Rııad «Ansar Alla» shııttik qozǵalysynyń tóńkerisshi hýsıtter toby jasaǵan bul shabýyldarynyń syrtynda Iran tur dep aıyptady. Halyqaralyq agenttikterdiń habarlaýyna qaraǵanda, Sammıtke qatysqan arab memleketteriniń basshylary Saýd Arabııasynyń pikirin qoldap, Iranǵa qarsy sanksııalardy kúsheıtý kerek degen sheshim qabyldaǵan. Kezdesý qorytyndysy boıynsha jasalǵan málimdemede joǵaryda atalǵan ınsıdentke tóńkerisshil-hýsıtter kináli ekendigi, al olardyń artynda Tegeran turǵany ashyp kórsetilgen. Sonymen qatar málimdemede Iran Sırııa daǵdarysyn jandandyrýshy jáne Bahreınniń ishki isine aralasýshy dep aıyptalady. «Iranmen yntymaqtastyq tek onyń basqa memleketterdiń ishki isine aralaspaǵanda ǵana bolýy múmkin» dep atap kórsetilgen málimdemede.
Osy jıynnyń aldynda Mekkede bolǵan Parsy shyǵanaǵy jaǵalaýyndaǵy Arab memleketteri yntymaqtastyǵynyń keńesi de dál osy mazmundaǵy málimdeme jarııalaǵan edi. Bul keńeske alty memleket múshe. Osy forýmdy da «Aımaqtaǵy jaǵdaıdyń kúrt nasharlap ketýine baılanysty» degen sebeppen Saýdııanyń koroli shaqyrǵan.
О́z tarapynan Iran bul málimdemelerdegi aıyptardy joqqa shyǵaryp, Er-Rııadtyń qasıetti Ramazan aıynda AQSh-ty qoldaý saıasaty úshin sammıt uıymdastyrǵanyn aıyptady.
Biz buǵan deıingi «Taıaý Shyǵys taǵy tolqyp tur» atty maqalamyzda («EQ», 31.01.2019 j.) Iran men AQSh arasynyń qatty sýysyp ketý sebepteri týraly jazǵan bolatynbyz.
Osy sammıtterdiń aldynda Saýdııanyń Syrtqy ister jónindegi memlekettik mınıstri Ádel ál-Djýbeır Er-Rııadta jasaǵan baspasóz-konferensııasynda Saýd Arabııasy Taıaý Shyǵysta soǵys otyn tutatpaý jolynda qolynan kelgen istiń bárin jasaıtyn bolady dep jarııalaǵan. «Soǵys aımaqtaǵy barlyq elderge de qasiret ákeledi. Sondyqtan biz ony boldyrmaýǵa barlyq kúsh-jigerimizdi jumsaıtyn bolamyz», dedi ol.
