27 jastaǵy amerıkalyq boıjetken alǵashynda qazaq tilin Amerıkanyń Vıskonsın shtatynda 2 aı oqıdy. Qazaq tiliniń sózdik qory baı, kórkem til ekenin baıqaǵan ol tereńirek zertteýge kirisedi. Sol sebeppen Qazaqstanǵa kelip, Almaty qalasyndaǵy Ál-Farabı atyndaǵy QazUÝ-da ǵylymı jumysyn jalǵastyrady.
Hanna Almatyda eki aı boıy qazaq otbasymen turady. Bul onyń qazaq tilin jetik meńgerýine úlken kómek bolady. Aq jaýlyqty ájeniń qolynda turǵandyqtan, qazaq halqynyń tilin ǵana emes, mádenıeti men dástúrin de janyna jaqyn tarta bastaıdy. Qazir ol Qazaq eliniń tól merekeleri men ulttyq taǵamdaryn erekshe jaqsy kóredi. Bizben áńgime barysynda et, baýyrsaq, naýryzkóje syndy taǵamdardy aıryqsha unatatynyn jetkizdi. Alaıda Hannaǵa ǵylymı jumysyn tereńirek zertteý úshin ózge de qalalarda saýaldamalar júrgizý kerek bolǵandyqtan zertteý jumysynyń qalǵan bóligin Nur-Sultan qalasyndaǵy Nazarbaev Ýnıversıtette jalǵastyrdy. Onyń aıtýynsha, qazaq tili men mádenıetiniń arasynda erekshe baılanys bar. Ol qazaq tilin úırený arqyly qazaqtyń mádenıetine de qyzyǵa bastaǵan. Qazaqtyń tili men mádenıetine qyzyǵýshylyqpen qaraıtyn dostary da az emes. Vıskonsındegi qazaq tili mektebinde oqyp júrgeninde qazaq tiline qyzyǵýshylyq bildiretin kóptegen amerıkalyq ǵalymmen tanysqan. Hannanyń aıtýynsha, olar da zertteý jumystaryn júrgizý úshin Qazaqstanǵa kelýge nıetti. Olar qazaq tiliniń lıngvıstıkasy, tarıhy, mádenıeti, halyq aýyz ádebıeti, ertegileri jáne ıdeologııasy syndy taqyryptarda zertteý júrgizgisi keledi.
Ol ár kún saıyn Abaıdyń «Kózimniń qarasy» atty týyndysyn tyńdaıdy eken. Ár sózdiń maǵynasyn túsiný úshin kóp izdenedi. Onyń aıtýynsha, qazaq tili – sózdik qory baı, kúrdeli til.
