Serik pen Nursulý Tóleýbaevtar otbasy Qymbat, Darhan, Dáýren esimdi úsh bala tárbıelep ósirdi. Qazir osy ul-qyzdan taraǵan Janbota, Dinmuhammed, Islam, Hadısha, Begimsulý, Raıana esimdi nemere-jıenderimen urpaq jalǵasyp, orta tolýda.
Ekibastuzdyqtarǵa esimderi jaqsy tanys Tóleýbaevtar – shyǵarmashyl, ónerli otbasy. Otaǵasy Serik Aıtqululy 1994 jyldan búginge deıin «Bogatyr kómir» JShS jol jóndeýshi bolyp eńbek etedi. Ol kásiporyn tarapynan III dárejeli «Eńbek dańqy» ordenimen marapattalǵan. Bosaı qalǵan sátte qolyna dombyra, gıtara aspaptaryn alady.
Al otanasy Nursulý Erkebaıqyzy qaladaǵy «Atamura» mádenıet ortalyǵynda 20 jyl boıy qyzmet etip keledi. Nursulý qoǵamdyq ómirdiń belsendisi, qala ákiminiń janyndaǵy memlekettik til saıasatyn odan ári jetildirý jónindegi jumys tobynyń, qoǵamdyq keńestiń jáne Isker áıelder assosıasııasynyń múshesi.
– Jaqynda respýblıkalyq «Rýhanı qazyna» festıvalinde «Atamura» ortalyǵy «Úzdik mádenıet úıi» atalymyna qatysyp, mınıstrdiń alǵys hatyn aldy. Bizdiń ortalyqtyń qaladan bólek, 16 aýylda klýby bar. Jyl saıyn turaqty túrde aıtys ótkizemiz. Sońǵy 3 jylda aıtys respýblıkalyq deńgeıde ótedi. 13 jyl boıy «Jigit sultanyn» uıymdastyryp kelemiz. Oǵan kishkentaı kezden daıyndaıtyn «Bala sultan» baıqaýy bar. «Rýhanı jańǵyrý», «Uly dalanyń jeti qyry» baǵdarlamalary boıynsha jobalarymyz jeterlik, – deıdi Nursulý Erkebaıqyzy.
Uly Darhan da ákesimen birge alyp óndiris ornynda júrgizýshi bolyp jumys isteıdi. Darhan oblystyq «Otbasym – oshaǵym», «Altyn daýys», «Eki juldyz» vokaldyq án baıqaýlarynyń júldegeri.
Al qyzy Qymbat Serikqyzy – muǵalim, oblys ortalyǵyndaǵy S.Toraıǵyrov atyndaǵy ýnıversıtettiń fılologııa fakýltetin támamdaǵan. Onyń kúıeýi Dáýlet vagon deposynda – ınjener-tehnolog. Bos ýaqytynda qaǵazdan gúlder jasaıdy, tátti bálish pisiredi. Kenjesi Dáýren Serikuly Nur-Sultan qalasynda turady. Qurmanǵazy atyndaǵy ulttyq konservatorııany bitirgen. Qazir elimizdiń Qarýly Kúshteri Ulttyq áskerı-patrıottyq ortalyǵy Ortalyq ansambliniń konsertmeısteri. Kelinderi Elmıra men Zarına da joǵary bilimdi mamandar. Qos kelinniń hobbıy – ulttyq salt-dástúrge saı sáýkele, kórpeshe, quraq kórpe, oıý-órnek tigýmen aınalysady. Ekeýi de án aıtady, bısermen, tastardan túrli buıymdar jasaıdy, gúldermen bezendiredi.
Bul otbasy oblystyq «Otbasym – oshaǵym» baıqaýynyń jeńimpazdary atansa, Otbasy kúnine oraı ótken qalalyq «Qalyńdyqtar sherýi» baıqaýynda eki kelini Elmıra men Zarına jeńimpaz atandy.
Úlken nemeresi Janbota Qurymbaı «Juldyz» vokaldyq tobynyń, Begimsulý Serikqyzy «Názik» horeografııalyq bı ujymynyń múshesi. Ujymmen birge respýblıkalyq, halyqaralyq konkýrstarda júldeli oryndarǵa ıe bolyp júr.
– «Ata-ananyń kórkem minezi – danalyq» demekshi, ul-qyzǵa jaqsy minez tárbıe arqyly darıdy. Adamgershilik qatynas, otbasylyq sezim, eń aldymen mahabbat pen borysh qundylyqtary berik bolýy kerek. Otbasynda halqymyzdyń ádet-ǵurpy men salt-dástúrin saqtaımyz. Jaqsy ádep – jaqsy otbasynyń belgisi, – deıdi otanasy Nursulý.
Oblys ortalyǵynda ótken «Mereıli otbasy» baıqaýyna óńirdiń aýyl, qalalarynan 70-ke jýyq otbasy qatysyp, erekshe kózge túsken 11 otbasy irikteldi.
Otbasy – memlekettiń tiregi. Sondyqtan elimizde otbasylarǵa kóńil bólinip, ony saqtaý, neke tiregin nyǵaıtý, bala tárbıesindegi ata-ananyń jaýapkershiligin arttyrýǵa úlken qoldaý kórsetilýde. Maqsat – elimizde ózgelerge úlgi bolarlyq otbasylardy dáripteý, tanystyrý. Bul rette óńir atynan respýblıkalyq «Mereıli otbasy» baıqaýyna qatysýǵa joldama alǵan Tóleýbaevtar otbasy úlgi alarlyq otbasy deýge ábden laıyq.
Pavlodar oblysy
