Bul baǵyttaǵy qyzmetti qarjylandyrýǵa shamamen 40 mlrd teńge «QIK» IU» AQ menshikti qarajaty men naryqtyq talaptarǵa sáıkes qaryzǵa alynǵan qarajat jumsalatyn bolady. Sondyqtan baǵdarlamany iske asyrý memlekettik bıýdjetke qosymsha salmaq salmaıdy. Páterler bastapqy jarnasyz, 20 jylǵa deıin jalǵa beriledi. Turǵyn úıdi kez kelgen ýaqytta jáne aıyppul sanksııalaryn qoldanbastan merziminen buryn satyp alýǵa múmkindik bar. Eger kiris jetkiliksiz bolsa kepilgerlerdi tartýǵa bolady.
«Parlament Senatynyń tóraǵasy Darıǵa Nazarbaevanyń usynysy boıynsha Qazaqstan Ipotekalyq Kompanııasy bilim berý jáne densaýlyq saqtaý salasynyń qyzmetkerlerine arnalǵan turǵyn úıdi ıpotekalyq nesıelendirý boıynsha baǵdarlama ázirledi. Kompanııamyz 2015 jyldan beri satyp alý quqyǵymen jalǵa beriletin turǵyn úıler salý men satyp alýdy qarjylandyryp keledi. Osy kezge deıin biz Qazaqstan boıynsha 18 myńnan astam otbasyn turǵyn úımen qamtamasyz ettik. Bizdiń kompanııanyń tájirıbesi osy áleýmettik mańyzy bar jobany nátıjeli iske asyrýǵa múmkindik beredi degen senimdemiz», dedi «QIK» IU» AQ basqarma tóraǵasy Ádil Muhamedjanov.
Bilim jáne ǵylym mınıstrliginiń jaýapty hatshysy Aryn О́rsarıevtiń aıtýynsha, qazirgi ýaqytta Qazaqstanda bilim salasynda qyzmet etetin 10 myńǵa jýyq adam páter kezeginde tur. Baǵdarlama boıynsha aldaǵy eki jylda olardyń 1500-i turǵyn úımen qamtylmaq.
Al Densaýlyq saqtaý mınıstri Eljan Birtanovtyń sózinshe, búginde 15 myń medısına qyzmetkeri baspanaǵa zárý. «Qazaqstanda medısına salasynda eńbek etetin 400 myńǵa tarta qyzmetker bar. Onyń 15 myńnan astamy baspanaǵa muqtaj. Memorandým negizinde 1,5 myń medısınalyq qyzmetker jalǵa beriletin baspanany alatyn bolady. Bul jumysty ári qaraı jergilikti atqarýshy organdarmen jalǵastyramyz. Meniń oıymsha, osy sharalar arqyly dáriger men meıirbıkelerdiń áleýmettik jaǵdaıy kóteriledi. Bul tikeleı medısınalyq qyzmettiń sapasyn kóterýge septigin tıgizedi», dedi mınıstr.
«Memorandýmǵa qol qoıyldy. Mınıstrlikter endigi kezekte bir-eki aptanyń ishinde úı kezeginde turǵandardyń tizimin berýi tıis. Munan soń biz kezekte turǵan muǵalimder men dárigerlerdiń tólem qabiletin tekseremiz. Kerekti qujattardyń barlyǵy daıyn bolǵanda baǵdarlamany bastaımyz», degen «Qazaqstan ıpotekalyq kompanııasy» IU» AQ atqarýshy dırektory Maqsat Meńdibaev aldaǵy 2-3 aıda páterlerdiń berile bastaıtynyn jetkizdi.
