«Aq jol» demokratııalyq partııasynan prezıdenttikke kandıdat Danııa Espaevanyń respýblıkalyq qoǵamdyq shtaby ashyq esik kúnin ótkizdi. Is-shara barysynda úmitker senim bildirilgen adamdarymen birge reseılik jýrnalıster delegasııasyn qabyldady.
Tuńǵysh áıel kandıdatqa Reseıden kelgen jetekshi mass-medıanyń jıyrma shaqty jýrnalısi tilektestik bildirdi. Brıfıngte jýrnalıster túrli suraqtaryn qoıyp, D.Espaevanyń saılaýaldy baǵdarlamasyna, jeńiske jetken jaǵdaıdaǵy aldaǵy josparlaryna qyzyǵýshylyq tanytty. BAQ ókilderi áıel zatynyń prezıdenttikke saılanýy tek Qazaqstan ǵana emes, Ortalyq Azııa elderi úshin qoǵamdy demokratııalandyrý men áıelder róliniń nyǵaıýy jolyndaǵy mańyzdy qadam ekenin atap ótti.
«Meniń saılaýǵa qatysýym – men úshin jaýapty qadam. Áıel adamnyń eldi basqarýy Qazaqstan halqyna erekshe kórinýi múmkin. Saılaýshylar meniń saılaýaldy naýqanyma aıtarlyqtaı nazar aýdardy. Men muny jaqsylyqqa balaımyn. Búgingi tańda elimizdegi halyqtyń 52 paıyzy – áıelder, osy názik jandylardan qoldaý kútemin. Degenmen, meni qoldap júrgenderdiń qatarynda tek áıelder qaýymy emes, jastar da bar. Árbir aımaqta saılaýshylar saılaýaldy baǵdarlamammen tanysqan soń, meni qoldaıtyndaryn aıtyp jatty», deıdi D.Espaeva.
Bul kúni jeke azamattardyń ótinishi boıynsha qabyldaý da ótti. Shtab ofısine bas suqqan qaýymnyń suraqtaryna úmitker D.Espaeva, partııa tóraǵasy A.Perýashev jáne parlamenttik fraksııanyń depýtattary jaýap berdi. Nur-Sultan qalasynyń turǵyndary bank nesıesi, baspanany jekeshelendirý, jer qatynastary boıynsha máseleler kóterdi. Árbir ótinish «Aq jol» partııasynyń depýtattarynyń baqylaýyna alyndy.
* * *
«Aýyl» halyqtyq-demokratııalyq patrıottyq partııasy atynan prezıdenttikke kandıdat retinde tirkelgen Tóleýtaı Raqymbekovtiń saılaýaldy baǵdarlamasy Qostanaıda talqylandy. О́ńir turǵyndarynyń basyn qosqan jıynda kandıdattyń senim bildirilgen adamdary birqatar máseleni ortaǵa saldy. Aıtalyq, elimizdegi joǵary oqý oryndary jyl saıyn myńdaǵan aýyl sharýashylyǵy mamanyn daıyndap shyǵarady. Biraq olardyń eldi mekenderge baryp, eńbek etip jatqandary shamaly. Sondyqtan jastardy aýylǵa tartatyn myqty yntalandyrý tetikteri kerek.
«Aýyl sharýashylyǵy mamandaryn daıyndaıtyn elimizdegi eń iri 3 ýnıversıtettiń ózi jyl saıyn 8 myńǵa jýyq stýdenttiń qolyna dıplom beredi. Onyń syrtynda salalyq ınstıtýttar men kolledjder qanshama. Eger osy mamandardyń bári aýyldarda eńbek etse, biz áldeqashan agrarlyq derjavaǵa aınalar edik. Biraq ókinishke qaraı, olar qalada qalyp, basqa salalarda eńbek etýge májbúr», deıdi T.Raqymbekov.
T.Raqymbekovtiń osy jáne basqa da bastamalary Qostanaıda keńinen sóz boldy. Onyń shopan, dıqandardyń eńbekaqysyn kóterý, laıyqty zeınetaqymen qamtamasyz etý sııaqty ustanymdaryna da kópshilik qoldaý kórsetti. Sondaı-aq prezıdenttikten úmitker ulttyq dástúrdi dáriptep, otbasylyq negizdi nyqtap qalyptastyrýǵa shaqyrdy.
Úgit-nasıhat naýqanynyń aıaqtalýyna az qaldy. Al T.Raqymbekovtiń aımaqtardaǵy qoǵamdyq shtabtary qarqyndaryn bir sátke de báseńdetpeı, neǵurlym barlyq óńirdiń turǵyndaryn qamtýǵa baryn salýda. Osyndaı formattaǵy jıyndar, eriktilerden quralǵan toptardyń aksııalary kandıdattyń saılaýaldy baǵdarlamasyndaǵy baǵyttardy el arasynda keńinen taratýǵa septigin tıgizip jatyr.
* * *
Kásipodaqtar federasııasynan prezıdenttikke kandıdat Amangeldi Taspıhovtyń Túrkistan oblysy jáne Shymkent qalasy boıynsha qoǵamdyq shtaby ókilderi úgit-nasıhat sharalaryn jalǵastyryp, túrli eńbek ujymdarymen kezdesýde. Memlekettik, bank jáne qoǵamdyq qyzmet kórsetý qyzmetkerleriniń salalyq kásipodaǵynyń Túrkistan oblystyq jáne Shymkent qalalyq fılıalynyń tóraıymy Kúldar Esebaeva atalǵan qalada Memlekettik arxıv kyzmetkerlerimen kezdesti. Úmitkerdiń senim bildirilgen adamy saılaýaldy baǵdarlamany jan-jaqty tanystyrdy. Ásirese A.Taspıhovtyń barlyq jumyskerdiń eńbekaqysyn kóterý, joǵary bilimdi tegin alý, eńbek qaýipsizdigin jaqsartý maqsatyndaǵy jumys josparlaryn saraptap berdi. Onyń eńbekker quqy men múddesin qorǵaýdaǵy ustanymdaryna jeke-jeke toqtalyp, eńbek qaýipsizdigi, eńbek mıgrasııasy máselelerine qatysty oı-pikirleri sóz boldy.
K.Esebaeva kandıdatty barlyq qyrynan tanystyryp bolǵan soń saılaýshylar tarapynan túsken saýaldarǵa jaýap berdi. Sóıtip kezekti saılaýdyń ereksheligin eskere otyryp, mejeli kúni óz tańdaýlaryn jasaýǵa shaqyrdy.
Sonymen qatar ońtústiktikter úgit-nasıhat jumystarynyń aıasynda konsert, debat, sporttyq sharalar uıymdastyrýǵa muryndyq bolýda. Sondaı bastamalardyń biri «Keleshek» jastar keńesi músheleriniń qatysýymen Ordabasy aýdany Amangeldi aýylynda ornalasqan «Sanatorıı Qaınar» mekemesinde boldy. Eńbek ujymymen, emdelýshilermen kezdesýde belsendiler alda kele jatqan saılaýdyń mańyzdylyǵyn, ereksheligin túsindirip, daýys berýden qalys qalmaýǵa shaqyrdy. Bul sanatorııalyq kýrortta 5 birdeı emdik korpýsy jumys isteıdi. Emdeý mekemesiniń aıyrmashylyǵy sol, munda dárigerler ystyq sýmen, termaldy sýmen asqazan dertinen, sondaı-aq kóptegen basqa barlyq aýrý túrin emdeıdi. Jergilikti halyqty aıtpaǵanda, elimizdiń ózge de aımaqtarynan demalýshylar kelip, em-dom alady.
* * *
Qazaqstan Kommýnıstik halyq partııasy atynan saılaýǵa túsip jatqan Jambyl Ahmetbekovtiń senim bildirilgen adamdary Nur-Sultan qalasynyń saılaýaldy shtaby «QKHP salamatty ómir saltyn qoldaıdy» fleshmobyn uıymdastyrdy. Jastar saraıynyń janyna partııa belsendileri men bir top jas jınaldy.
Qalalyq saılaýaldy shtabynyń jetekshisi Nurdáýlet Orazhanov qatysýshylar aldynda elimizdegi eń iri saıası naýqan kezindegi azamattar men memlekettiń ortaq jaýapkershiligi týraly sóz sóıledi. Ol prezıdenttikten úmitker J.Ahmetbekovtiń óńirlerdegi jumys saparlary men saılaýshylarmen kezdesýleri jóninde habardar etti. Onyń aıtýynsha, qatardaǵy azamattar partııanyń jumysyna, onyń ıdeıalary men ustanymdaryna qyzyǵýshylyq tanytyp jatyr. «Qazaqstan Kommýnıstik Halyq partııasy árqashanda qarapaıym halyq múddesin qorǵaýǵa basymdyq beredi. Halyq kommýnısteri – ınternasıonalızmniń, eýrazııashyldyq ıdeıanyń jáne XXI ǵasyrdaǵy ulttyń erekshe jolynyń jaqtaýshysy», dedi elordalyq shtabtyń jetekshisi.
Budan keıin partııa nyshandary beınelengen kıim kıgen jastar keńes jyldaryndaǵy áýenmen jattyǵýlar jasady. Jınalǵandar «QKHP-ǵa daýys ber!», «Adal eńbek qoǵam múddesi úshin!» dep urandady.
Sonymen qatar Nur-Sultan qalasyndaǵy nasıhatshylar toby belsendi jumys istep, óz kandıdattarynyń negizgi ustanymdaryn halyqqa barynsha jetkizýde. Olar kezikken jurtqa úgit paraqshalaryn jáne partııa jýrnaldaryn taratyp, áńgimelesip, saılaýaldy baǵdarlamanyń basym baǵyttary týraly málimet berdi. Qala turǵyndary da túsinistik tanytyp, kommýnısterdiń bastamasyn jyly qabyldap jatyr. Mundaı is-sharalar áli de qarqyndy júrgizile bermek.
* * *
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtaby Shyǵys Qazaqstan oblysyna jasaǵan saparyn Semeıdegi birqatar kásiporynda ótkizgen kezdesýlermen aıaqtady. Qala halqy jáne etnomádenı birlestikter ókilderimen kezdesýde eń aldymen Q.Toqaevtyń saılaýaldy baǵdarlamasynda sabaqtastyq qaǵıdasyna basymdyq berilgeni aıtyldy. О́ıtkeni qazirgi tańda Qazaqstan halqynyń birligi men ózara kelisimin saqtaý úshin Elbasy jolyn jalǵastyrýdyń mańyzy zor. Buǵan qosa, baǵdarlamada aıryqsha atalǵan taǵy bir ózekti másele – bilim berý salasy. Bul jóninde qujatta bilim men ǵylymǵa jumsalatyn jalpy shyǵyndy jyl saıyn ósirip otyrý, ustazdar men tárbıeshilerdiń mártebesin kóterý sııaqty baǵyttar qamtylǵan.
Sonymen qatar shtab músheleri Semeı qalasyndaǵy Qazaq gýmanıtarlyq-zań ınnovasııalyq ýnıversıtetinde jergilikti joǵary oqý oryndarynyń ustazdarymen jáne stýdentterimen kezdesti. Basqosýda baǵdarlamada kórsetilgen joǵary oqý oryndary men kolledjderge memlekettik bilim berý tapsyrysyn ulǵaıtý, oqytýdyń jańa tásilderin engizý sııaqty naqty sharalar sóz boldy. Shtab múshesi, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov kandıdattyń bilimdi ult qalyptastyrýǵa úlken kóńil bólip otyrǵanyn jetkizdi. «Q.Toqaev óziniń baǵdarlamasynda bilim berý salasyna qoldaý kórsetip, bul júıeni qarjylandyrýdy arttyrý máselesin kóterdi. Osylaısha bizdiń kandıdat bilim berý salasyn odan ári jetildirip, bul baǵyttaǵy Elbasy salǵan sara joldy jalǵastyrady», dedi E.Sydyqov.
Sonymen qatar delegasııa sement zaýytynyń jáne otandyq avtomobıl óndirisinde ozyq turǵan «SemAZ» JShS-niń eńbek ujymdarymen kezdesti. Bul is-sharada shtab músheleri halyqtyń ál-aýqatyn arttyrýǵa baǵyttalǵan baǵdarlama týraly jan-jaqty aıtyp, semeılikterdi durys tańdaý jasaýǵa shaqyrdy.
* * *
«Ult taǵdyry» ulttyq-patrıottyq qozǵalysy atynan prezıdenttik saılaýǵa túsip jatqan Ámirjan Qosanovtyń Nur-Sultan qalasyndaǵy respýblıkalyq qoǵamdyq shtaby ekologııalyq is-shara uıymdastyrdy. Nasıhatshylar toby Esil ózeniniń jaǵalaýynda tazalyq jumystaryn júrgizip, aınalany birge kórkeıtýge shaqyrdy. Kópshiliktiń birligin jarastyrǵan ortaq iske ortalyq shtab ókilderimen qosa, erikti jastar da atsalysty. Osy bastama aıasynda kandıdattyń saılaýaldy baǵdarlamasynyń negizgi baǵyttary túsindirildi. Sonyń ishinde saıası bostandyq, ulttyq bolmys, jemqorlyq taqyryptary keńinen qozǵaldy. «Biz buǵan deıin de bazarlar men aýlalar sekildi halyq kóp júretin oryndarda túrli sharalar uıymdastyryp, kandıdattyń ustanymdaryn barynsha uǵynyqty jetkizýge kúsh saldyq. Búgingi ekologııalyq aksııa sóz júzinde ǵana emes, ispen dáleldeıtin jumystyń kishigirim kórinisi. Munda jınalǵandar qolyn sharýadan úzbeı, qulaqtary úndeýge túrik júr. Saılaýaldy naýqannyń sońǵy saǵatyna deıin baǵyt-baǵdarymyzdy halyqqa aıqyndap, barynsha durys jetkizýge tyrysamyz», dedi eriktilerdiń biri Batyrbek Qoshqarbaev.
Buǵan qosa, óńirlerdegi qoǵamdyq shtabtar da qyzý jumys istep, túrli is-sharalar uıymdastyrýda. Belsendiler jergilikti turǵyndarǵa kandıdattyń saılaýaldy tuǵyrnamasynda kórsetilgen baǵyttardy jan-jaqty nasıhattap, úgit materıaldaryn da keńinen taratyp jatyr. Bul rette qoǵamdyq shtabtar áleýmettik jelilerdiń áleýetin de tıimdi paıdalanyp, elimizdegi eń iri saıası oqıǵanyń mańyzyn da arttyrýda.
Sondaı-aq «Ult taǵdyry» ulttyq-patrıottyq qozǵalysy atynan prezıdenttikke kandıdat retinde usynylǵan Ámirjan Qosanovtyń óńirlerdegi saılaýaldy qoǵamdyq shtabtary belsendilik tanytyp, saılaý kúni ýchaskelerde daýys berý prosesin qadaǵalaıtyn baıqaýshylarǵa semınarlar ótkizip jatyr.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgel Mańǵystaý oblysyndaǵy saılaýaldy úgit-nasıhat jumystaryn Aqtaý qalasynan bastady. Qala turǵyndarynyń aldynda kandıdat óziniń saılaýaldy baǵdarlamasy týraly keńinen áńgimeledi. «Elimizdiń batys aımaǵyndaǵy issaparymdy munaıshylar qalasy Atyraýda bastasam, búgin kıeli jer Mańǵystaýdyń ortalyǵy Aqtaýda jalǵastyrdym. Elimizdiń teńizge shyǵar qaqpasy sanalatyn qalanyń turǵyndaryna rızashylyǵymdy bildiremin. «Uly dala qyrandary» qoǵamdyq birlestigi respýblıka boıynsha ulttyq qundylyqtardy nasıhattap kele jatqan uıym ekendigin jetkizgim keledi. Mańǵystaý óńiriniń elimizdiń ekonomıkasy, demografııasy men týrızmine qosyp otyrǵan úlesi zor. Meniń saılaýaldy baǵdarlamamda da halqymyzdyń ál-aýqatyn kóterýge, demografııasyna zor kóńil bólýge, jas urpaqtardy otansúıgishtikke tárbıeleýge baılanysty kezek kúttirmeı sheshetin mindetter atap kórsetilgen. Ekonomıkaǵa ǵana emes, ıdeologııaǵa da basty nazar aýdarǵanymyz durys. Bul ekeýine de qustyń qos qanaty sııaqty bir-birinen ajyratyp qaraýǵa bolmaıdy. Sondyqtan bizdiń ustanymymyz «Ulaǵatty urpaq – ulttyq ustanym» dep aıqyndalyp, baǵdarlamama tórt qundylyqty ózek etip aldyq. Til, dil, jer men ar-namystan bıik eshteńe joq», dedi S.Túgel.
Sonymen qatar kezdesý barysynda Asqar Baqytjanov, Jansaıa Yntymaqqyzy esimdi jastar kandıdattyń saılaýaldy baǵdarlamasynda aıtylǵan negizgi baǵyttar jaıly óz pikirlerin jetkizdi. Mańǵystaý jerindegi jıyndardan keıin S.Túgel saılaýaldy shtabynyń ókilderimen birge kıeli mekendegi Shopan atanyń basyna soǵyp, Pir Bekettiń máńgilikke damyl tapqan Oǵlandy shatqalyna bardy. Eki áýlıeniń mekenine aınalǵan Mańǵystaý dalasynyń bir qıyryndaǵy qasıetti orynǵa zııarat etip, arnaıy duǵa baǵyshtady.
