Olaı deıtinimiz, aýdan tabıǵat qubylystarynyń ózin kádege jaratyp, aýyl jaǵdaıynyń jaqsarýyna úles qosyp keledi. Elbasy Nursultan Nazarbaev «Qazaqstan-2050» Strategııasynda «Kómirsýtegi shıkizatynyń naryǵynda iri oıynshy bolyp qala otyryp, biz energııanyń balamaly túrlerin óndirýdi damytýǵa, kún men jeldiń energııasyn paıdalanatyn tehnologııalardy belsendi engizýge tıispiz. 2050 jylǵa qaraı elde energııanyń balamaly jáne jańǵyrtylatyn túrlerin qosa alǵandaǵy barlyq energııa tutynýdyń kem degende teń jartysy kelýge tıis», degen bolatyn. Endigi jerde Elbasy tapsyrmasynan týyndaǵan mindetterdi júzege asyrý úshin aýdan ahýalyn arttyrý maqsatynda ınvestısııa tartý jumystary qarqyn aldy.
Aýdan ákimi Dosmahanbet Álıevtiń aıtýynsha, aǵymdaǵy jyldyń qańtar-naýryz aılarynda Talas aýdanynda negizgi kapıtalǵa salynǵan ınvestısııalardyń jalpy kólemi 1475,2 mıllıon teńgeni quraǵan. Al aýdan boıynsha 55 myń 179 adam bar bolsa, aýdan turǵyndarynyń jan basyna shaqqandaǵy negizgi kapıtalǵa salynǵan ınvestısııa kólemi 26,7 myń teńgege jetken. Sonymen qatar aýdan ákimdiginiń málimetinshe, qazirgi tańda aýdanda eki ınvestısııalyq joba iske asyrylýda. Atap aıtqanda, birinshi joba quny 1867,6 mıllıon teńgeni quraıtyn, qýattylyǵy 4,5 mVt bolatyn jel elektr energııasyn óndirý kesheni. Atalǵan maqsattaǵy kásiporyn salý úshin «Wind Power city» jaýapkershiligi shekteýli seriktestigine Qyzyláýit aýyldyq okrýginen 21 gektar jer ýchaskesi bólinip berilipti. Ákimdiktiń málimetinshe, jobanyń jobalyq smetalyq qujattary da daıyn eken. Joba tolyqtaı iske asqan jaǵdaıda munda 12 jumys orny ashylady. Atalǵan joba Energetıka mınıstrliginiń tizilimine de engizilgen. Qazirgi tańda «Wind Power city» JShS tarapynan aýdanǵa 1142,2 mıllıon teńge ınvestısııa salynyp otyr. Sonymen qatar 10 adamdy quraıtyn merdiger uıym qurylys jumystaryn bastap ketti.
Al Talas topyraǵynda júzege asyp jatqan ekinshi joba jalpy quny 1867,6 mıllıon teńgeni quraıtyn, qýaty 4,5 mVt bolatyn jel elektr energııasyn óndirý kásiporny. Bul maqsatta «Wind Electricity» jaýapkershiligi shekteýli seriktestigine aýdandaǵy Qyzyláýit aýyldyq okrýginen 22 gektar jer ýchaskesi bólinip berildi. Qazirgi tańda jobanyń smetalyq qujattary daıyndalǵan. Al joba iske asqanda 10 jumys orny ashylady. Bul joba da elimizdiń Energetıka mınıstrliginiń tizilimine engen. Búginde «Wind Electricity» JShS tarapynan aýdanǵa ınvestısııa tartý maqsatynda 2,1 mıllıard teńgege shetel kásipornymen kelisim jasaldy. Qyzyláýit aýylyndaǵy bul jobalar tolyqtaı iske asqan kúnnen bastap jergilikti turǵyndar jumyspen qamtylady. Sonymen qatar tartylǵan ınvestısııanyń barlyǵy óńir ekonomıkasyn kúsheıtip, halyqtyń áleýetin arttyrady.
«Bul jobalar aýdandaǵy balamaly energııa kózderiniń úlesin joǵarylatý boıynsha atqarylýda. Talas aýdanynda jel qýaty jeterlik. Tabıǵattyń osy syıyn adamdardyń ıgiligine jaratý – búgingi urpaqtyń mindeti», deıdi aýdandyq kásipkerlik, ónerkásip jáne týrızm bóliminiń basshysy Aýdanbek Taýasarov.
