Batys Qazaqstan oblysynyń ákimi Altaı Kólginov óziniń otbasymen birge Oral qalasyndaǵy №521 saılaý ýchaskesinde daýys berdi.
- Búgingi saılaý – elimiz úshin óte mańyzdy kún. Ár qazaqstandyq óziniń azamattyq boryshyn Qazaqstannyń bolashaǵyna, eldiń birligine, Qazaqstan Respýblıkasynyń álemniń damyǵan memleketteri qataryna qosylýyna óziniń daýysyn berse eken degen nıetimiz bar. Biz de otbasymyzben saılaýǵa keldik. Bizdiń Aq Jaıyq óńiri qashan da óziniń birligimen, yntymaǵymen, mádenıetimen, tártibimen erekshelenedi. Búgin de solaı bolady dep senemiz, - dedi óńir basshysy.
Aqparattarǵa qaraǵanda, Batys Qazaqstan oblysynyń barlyq jerinde daýys berý belsendi júrip jatyr. Qaratóbe aýdanyndaǵy №278 Jańaqonys saılaý ýchaskesinde 95 jastaǵy UOS ardageriQurmanǵalı Ysqaqov óz tańdaýyn jasasa, Qaztalov aýylynda kúni keshe, ıaǵnı 8 maýsym kúni shańyraq kótergen jas jubaılar Radık Dúısenov pen Qundyz Aıdarova saılaý bólimshesine qol ustasyp qatar kelipti. Al Shyńǵyrlaý aýdanyndaǵy №425 saılaý ýchaskesinde kıiz úı tigilip, saılaýshylardy ulttyq naqyshpen qarsy alǵan.
Redaksııa tapsyrmasymen Oral qalasyndaǵy birneshe saılaý bólimshesin aralap, daýys berý barysymen tanystyq. Zachagansk kentindegi №10 orta mektep ǵımaratynda ornalasqan №421 saılaý bólimshesinde 1746 saılaýshy, №427 saılaý ýchaskesinde 1267 saılaýshy tirkelgen eken. Keń, kelýshilerge barlyq jaǵdaı jasalǵan, saılaýshylar arasynda sabylys joq. Baqylaýshylar da saılaý óz retimen ótip jatqanyn aıtady. №421 saılaý ýchaskesiniń komıssııa múshesi Tilegen Esentemirov tańǵy saǵat 7-de eń birinshi bolyp áskerı qyzmetker daýys beripti. Aıtpaqshy, ol shaǵyn syılyqqa da ıe bolǵan. Al №427 saılaý ýchaskesi komıssııasynyń tóraǵasy Sansyzbaı Kenjekovtiń aıtýynsha, saıası naýqan oıdaǵydaı ótip jatyr.
№47 mektep ǵımaratynda ornalasqan №400 saılaý ýchaskesine tirkelgen 1427 saılaýshynyń 214-i tańerteńgi saǵat 10-ǵa deıin daýys berip úlgeripti. Osy jerde TMD elderinen kelgen halyqaralyq baqylaýshylarǵa kezdestik. Saılaý ýchaskesi aýmaǵynda jatqan keıbir kópqabatty úı turǵyndary ózderin saılaýshylar tiziminen kóre almaı, narazylyq bildirip atty. Biraq saılaý komıssııasynyń músheleri taban astynda HQKO-ǵa habarlasyp, sol jerde kelýshilerdiń JSN nómiri boıynsha tirkeý derekterin anyqtap jatty.
- Bizdiń Murat Móńkeuly kóshesinde jańa qurylys óte kóp, aı saıyn jańa úı paıdalanýǵa beriledi. Sondyqtan da saılaýshylar tiziminde sál-pál sáıkessizdikter kezdesip qalady. Biraq biz olardy der kezinde sheshýge tyrysamyz. О́z ýchastogin taba almaı júrgen saılaýshylarǵa jón siltep jiberemiz, - deıdi №400 saılaý ýchaskesi komıssııasynyń jetekshisi Natalıa Erǵojıeva.
«Arman» shaǵynaýdanyndaǵy №416 saılaý ýchaskesinde daýys berý óte belsendi júrip jatqanyn baıqadyq. Daýys berý bastalǵaly ótken 4 saǵat ishinde tirkeýde turǵan 749 saılaýshynyń 340-y óz tańdaýyn jasap úlgeripti.
«Jaıyq» voleıbol klýbynyń sport kesheninde ornalasqan №169 saılaý ýchaskesinde ǵana yǵy-jyǵy adam, sabylysqan kezegin baıqadyq. Kelýshilerdiń kóbi tizimnen óz famılııasyn taba almaı, daǵdaryp qalǵan.
- Biz ol adamdardyń bárin de qosymsha tirkeýge alyp, saılaý bıýlletenin berip jatyrmyz. Bizdiń tizimde 2578 saılaýshy tirkelgen. Bárine de bıýlleten jetedi, - deıdi biz tildesken komıssııa tóraǵasy Dastan Esekenov.
Oral qalasynyń 20 jasar turǵyny Bolat Ibatov mundaı úlken saıası naýqanǵa tuńǵysh ret qatysyp tur eken. «Saılaýǵa tuńǵysh qatysýym. El bolashaǵy halyq qalaýyna baılanysty bolatynyna senemin. Sondyqtan búgin saılaý ýchastogine kelip, tańdaýymdy jasadym» deıdi ol.
Sýretti túsirgen Temirbolat TOQMÁMBETOV
Batys Qazaqstan
