Qazaqstan qonaqúıinde jýrnalıstermen baspasóz máslıhatyn ótkizgen Polshadan kelgen baqylaýshy Vıoletta Porovskanyń sózinshe, memleket tarıhyndaǵy taǵdyrsheshti oqıǵa barlyq talaptarǵa saı ótip jatyr.
«Qazaqstan saılaýǵa joǵary deńgeıde daıyndalǵan. Halyqaralyq baqylaýshylardyń jumysyna eshqandaı shekteý qoıylǵan joq. Biz bir-birimizben erkin pikir almasyp, barlyq prosesti baqylap otyrdyq. Men bir ýchaskede 47-shi baıqaýshy bolyp qatystym. Bul degenińiz saılaýdy kóptegen eldiń baıqaýshylary baqylyp otyrdy degen sóz. Saılaý ádil ári ashyq ótip jatyr dep aıta alamyn. Múmkindigi shekteýli azamattardyń tarıhı oqıǵadan tys qalmaýy eskerilgeni qýantady. Men №4 aýrýhanada jabyq ýchaskede boldym. Ol jerde júre alatyn naýqastar ózi baryp únin jetkizse, tósekte jatqan naýqastardyń konstıtýsııalyq quqyǵyn paıdalanýǵa da múmkindik berildi», – deıdi Vıoletta Porovska.
Rýmyn elinen kelgen qos birdeı baıqaýshy Trıf Raresh pen Iýrkon Jonash Florısh te osy pikirge toqaılasty. Almatydaǵy 10 saılaý ýchaskesine baryp, prosessti óz kózderimen baqylaǵan sarapshylar ázirge eshqandaı zańbuzýshylyq áreketin baıqamaǵandaryn jetkizdi.
«Maǵan Qazaqstandaǵy saılaý prosesin baqylaý óte qyzyq boldy. Saılaýǵa jastardyń belsendi qatysqanyn anyq baıqadym. Bul – jas býynnyń el erteńine nemquraıly qaramaıtynyn ańǵartsa kerek. Túske deıin saılaýshylardyń 20 prosenti daýys berýge keldi. Bul óte joǵary kórsetkish», deıdi Iýrkan Jonash Florısh.
«Eshqandaı zańǵa qaıshy jaǵdaıdy baıqaǵan joqpyn. Tek bir áıel azamat ózin daýys berýshiler tiziminen tappady. Ondaı jaǵdaılar jıi bolyp turady. Saılaýshylardyń arasynda jas stýdentterdiń kezekte turǵanyn baqyladyq. Bul – azamattyq qoǵamdaǵy demokratııanyń saltanat qurǵanyn kórsetedi», dedi Halyqaralyq Adam quqyqtaryn qorǵaý uıymynyń keńesshisi Raresh Trıf.
Bul kúni qoǵamnyń san salasynda eńbek etip júrgen tanymal tulǵalar men zııaly qaýym ókilderi saılaý ýchaskelerine kelip azamattyq belsendiligin tanytqanyn aıta ketken jón. №40 mektepte ornalaqan saılaý ýchaskesine otbasymen kelip tańdaý jasaǵan qala ákimi Baýyrjan Baıbek bolashaǵymyzdy aıqyndaıtyn sátte elim degen árbir azamat saılaýdan qalys qalmaý qajet deıdi. Budan bólek Altynbek Qorazbaev, Roza Rymbaeva bastaǵan taǵy basqa da óner maıtalmandary barsha qala jurtshylyǵyn belsendi bolýǵa shaqyrdy.
Taǵy bir aıta keterligi qaladaǵy barlyq qoǵamdyq kólikter jolaýshylarǵa tegin qyzmet kórsetýde.
Arman OKTIаBR,
Ǵalym SÚLEIMEN,
«Egemen Qazaqstan»
ALMATY
