...alǵys aıtady
Aýyl balalaryna jasalǵan tartý
«Týǵan jer» degen kezde árbir perzenttiń júreginde týlaǵan shabyt pen sezim uıalaıtyny anyq. Sebebi adam óz týǵan jeriniń jaratqan syıy, sol darhan dalanyń týmasy. Týǵan jerge degen sezim men mahabbattyń ólshemi sheksiz. Osy bir erekshe patrıottyq sezimdi árbir azamat pen jastardyń boıyna etene sińirý úshin, Elbasy «Bolashaqqa baǵdar: rýhanı jańǵyrý» maqalasynda oryndalý kerek mindetterdiń ishinde «Týǵan jer» baǵdarlamasyn usyndy. Osy baǵdarlamany júzege asyrý maqsatynda Aqmola oblysy, Qorǵaljyn aýdany, Janteke aýylynyń azamattary óz týǵan jerine tamasha tartý jasady. Aýyl balalarynyń sportqa úlesin qosýǵa úlken múmkindik jasap, kúres zalyn ashty. Alǵashqy bastamany turǵylyqty ata-analar men aýyl jastary jáne Qarashalǵyn aýyldyq okrýginiń ákimdigi bastasa, ony ári qaraı Janteke aýylynyń túlekteri qoldady.
Igi bastamalar búgingi jáne erteńgi urpaqqa úlgi bolary anyq. О́negesi men tárbıesi mol aýyl mektebi qanshama elim, Otanym dep júrekteri soǵatyn tulǵalardy qanattandyrdy. «Jaqsynyń jaqsylyǵyn aıt, nury tasysyn» degendeı, aýyl balalaryna jasalǵan tartýǵa óz úlesterin qosqan barsha azamattarǵa sheksiz alǵysymdy aıtamyn. Bolashaqta sport salasynda ózindik qoltańbasyn qaldyratyn, tórtkúl álemde elimizdiń týyn jelbiretetin naǵyz chempıon aýyldan shyǵatynyna kámil senemin.
Qarlyǵash ASANOVA,
«Qyzyltý» orta mektebiniń dırektory
Aqmola oblysy
...áserimen bólisedi
«Artyq bilim – kitapta»
Halqymyz óner men bilimdi erekshe qadirlegen. Búgingi tańda barlyq qoǵamnyń aldynda turǵan basty maqsat – bilimdi urpaq tárbıeleý. Al urpaq bilimdi qaıdan alady? Kitaptan. «Kitappen dostassań kóp bilesiń» demekshi, ata-babalarymyz kitapty erekshe aqylshy ustaz sanaǵan. Kitap – tilsiz tárbıeshi, rýhanı azyq quraly desek, kitaphana – tilsizdi sóılete alatyn, rýhqa kúsh beretin kıeli meken.
Qazirde kitaphana tynysy kún saıyn keńeıýde. Kitap usynyp qana qoımaı, uly tulǵalardy nasıhattap, eńbekterin elep, shyǵarmalaryn tanystyryp, kishkene bolsa da jastar sanasyna sińirtip, úlgi etýde. Ár merekeni, ataýly kúnderdi úlken sharaǵa aınaldyryp tárbıelik máni bar áńgimeler qozǵalady. Osyndaı ıgi sharany S.Jıenbaev atyndaǵy oblystyq jasóspirimder kitaphanasy balalar kitaby kúnine oraı belsendi kitaphana oqyrmandarymen atap ótti. Sharaǵa belsendi jastar, ıaǵnı turaqty kitaphana oqyrmandary qatysyp, óz ónerlerin ortaǵa saldy.
«Kitap – tarıh, shejire» atty defıle aıasynda, ózderi oqyǵan jańa kitaptaryn sánimen kórsetip, sahna tórinde kitaptyń keıipkerlerin tanystyryp, taqyryp tóńireginde mazmundap berdi.
Jylyna 40-50 dana kitap oqyp, tildik qoryn kóbeıtip, kúshpen emes, bilimderimen topty jaryp júrgen jastar eki topqa bólinip, «HH ǵasyr kitaptarymen HHI ǵasyr zamanaýı kitaptardyń aıyrmashylyǵy» týraly debat ótkizdi. Debatta HH ǵasyrdaǵy «Aldar kóse» kitabymen zamanaýı «Garrı Potter» kitabynyń qaısysy jastardy qyzyqtyratyny týraly pikirtalasqa tústi
Bıbigúl ShAMEDENOVA
Aqtóbe
...ýáj keltiredi
Kóńilde qaldy sansyz suraq...
«Júre berseń, kóre beresiń» dep dana halqymyz tekke aıtpasa kerek. Densaýlyq jaǵdaıyna baılanysty em-dom alý maqsatymen joldamaǵa qol jetkizip, Kókterek kentindegi «Asyl bulaq» shıpajaıyna da jettik. Kelgenimizdi qaıteıik, munda bizdi «alys joldan sharshap keldi-aý» dep jyly qarsy ala qoıǵan eshkim bolǵan joq. Uzaq joldan sharshap ári aýyryp kelgenimizdi aıtqandaı bolyp edik, oǵan da selt ete qoıǵan eshkimdi kórmedik. Ne kerek, tańerteń kelgen biz túske deıin kútip, áreń degende oryn aldyq. «Baqsaq baqa eken» demekshi, basshylyqtyń beıqamdyǵy saldarynan munda kelip emdelýshilerdiń jatatyn orny aldyn ala daıyndalmaǵan kórinedi. Dál sol biz barǵan kúni keıbir emdelýshiler tarapynan ashananyń taǵam mázirine syn aıtylyp jatqanyn da óz qulaǵymyzben estidik. Bar-joǵy alpys shaqty adamǵa arnalǵan shıpajaıda em alý úshin aıadaı ǵana dálizde kezek kútýshilerdiń qatary kózge jıi shalynyp júrdi.
Aıtýshylardyń sózine qaraǵanda, osy bir ǵana Saryaǵash aýdanyna qarasty Kókterek kentiniń ózinde qyryqqa jýyq emdeý oryny bar eken. Eshqandaı qarsylyǵymyz joq, olardyń kóbi jaqsy, árıne. Alaıda, sol shıpajaılardyń keıbiriniń sapasyz qyzmetine qarnymyzdyń ashatyny bolmasa.
Shıpajaı aty «Asyl bulaq», kóńilde qaldy sansyz suraq...
Káribaı ÁMZEULY,
zeınetker
Túrkistan oblysy,
Sozaq aýdany
...úlgi tutady
Sheberlik saǵatyn ótkizdi
«Rýhanı jańǵyrý» aıasynda Jastar jylyna oraı «Aýyldar – jastar astanasy» jobasy negizinde Tushybekte mańǵystaýlyq ataqty qusbegi, jas ónerpaz Aıshýaq Taımanov óziniń sheberlik synybyn ótkizdi.
Sheberlik saǵatynda qusbegi óziniń búrkitin, qarshyǵasyn, ıtelgisin jastarǵa tanystyryp, qusbegiliktiń qyr-syryn jan-jaqty aıtyp berdi.
«Men eń alǵash ret eki qarshyǵany baǵyp ustadym. Sodan soń búrkit ustap, qus baptaýdy maqsat ettim. Keremet kásipte ózimniń ata-babam salǵan sara jolymen júrýdi murat tutyp, búginde balam Mereıdi daıyndap kelemin. Búrkit pen qarshyǵa, ıtelgi degen qustardyń árqaısysy suńqar tektes bolyp keledi. Munyń ózi qazaq halqynyń anaý-mynaý qusty tańdamaı naǵyz ushqyr men myqty qustardy qolyna úıretý arqyly darhan dalany aıalap, ańshylyqty serik etkendigin kórsetedi», deıdi qusbegi Aıshýaq Taımanuly.
«Negizi, búgingi sharanyń mańyzdylyǵy tereńde jatyr. Elbasynyń «Rýhanı jańǵyrý» baǵdarlamasy osyndaı umytylyp bara jatqan ata kásiptiń qaıta jańǵyrýyna zor septigin tıgizetin bolady. Jastar jylyna oraı bastalǵan jobany qos qoldap qoldaımyn. Osyndaı ulttyq ónerdi ulyqtap júrgen, aýyl jigitterin nasıhattap júrgen Jastar ortalyǵynyń ujymyna úlken alǵys aıtqym keledi», deıdi Tushybek aýylynyń turǵyny Azamat Qaparov.
Allabergen QONARBAEV
Mańǵystaý oblysy
