«Súndet – musylmanǵa mindet» degen de sóz bar. Isi musylmannyń ǵurpyna aınalǵan súndetteý salty búginde Kanada, Aýstralııa, Jańa Zelandııa, Anglııa sekildi birqatar memleketterde qalypty úrdis sanalady. Tipti AQSh-tyń ózinde, aıtalyq, Soltústik Amerıkada profılaktıkalyq ári gıgıenalyq maqsatta jas balalardyń toqsan paıyzy súndetteledi. О́ıtkeni Amerıkanyń medısınalyq assosıasııasy (AMA – American Medical Association) 2000 jylǵy baıandamasynda súndetteýdiń nesep, qýyq joldaryn sırek kezdesetin qaterli, juqpaly aýrýlardan, ınfeksııadan qorǵaıtynyn jazdy. Keıbir derekterge súıensek, álemdegi er adamdardyń altydan bir bóligi súndetteledi eken. Al halqymyzda súndet toıǵa jetý – erekshe baqyt. Súndettelgen balany handaı qurmettep, úki taǵyp, taı mingizip, qýanyshty bólisýge kelgen qonaqtar «erjetken» kishkentaı toı ıesin quralaqan qaldyrmaǵan.
Qazirgi ata-analar úshten asyp, jetige jaqyndaǵan balasyn súndetteýdi burynǵydaı moldalarǵa emes, dárigerlerge tapsyrǵandy jón kóredi.
Aýyl adamdary kúzdigúni egistikten tapqan az aqshasyn nemese malyn satyp sabylsa da súndet toıdy ótkizedi. Al qaltany qaǵyp alatyn qalanyń qatań tirshiliginde kún keship júrgen otbasylarǵa toı túgili balany súndetke otyrǵyzýdyń ózi ońaı emes. Osy olqylyqtyń ornyn toltyrýdy kózdegen elorda ákimdigi «Súndet-2019» aksııasyn uıymdastyrdy. Ákimdik 2 kúnge sozylǵan sharaǵa kóp balaly otbasylardan 3-7 jas aralyǵyndaǵy 110-nan astam bala tirkelgenin málimdedi. Alaıda, aksııa ótkizip jatqan №2 qalalyq balalar aýrýhanasy bas dárigeriniń orynbasary Aıbyn Nurtasuly balalar sany tizimdegiden áldeqaıda kóp ekenin aıtty. «Bul sharanyń maqsaty – el astanasyndaǵy kóp balaly otbasylarǵa áleýmettik kómek kórsetý. Osy sharaǵa ózimizdiń tájirıbeli mamandardy tarttyq. Oǵan qosa Ýrologtar qoǵamynyń kongresine Germanııa, Túrkııadan kelgen úzdik ýrologtar atsalysty. Aksııa bastalǵannan bergi úsh saǵattyń ishinde 40 balany súndettep úlgerdik», dedi dáriger.
Balalardy túrli mýltfılm keıipkerleri, kóńildi sharlarmen bezendirilgen aýrýhana kútip aldy. Mundaıda baldyrǵannyń úreı áleminen alystary anyq. Sondaı balanyń birin ata-anasymen shyǵa beriste kezdestirdik. Nurdáýlet mundaǵy dárigerlerdiń meıirimdi, syılyq pen táttiler beretin qoly ashyq jandar ekenin jetkizdi. Ol oıyn oınap, kóńil kóterýge kelgendeı, shat-shadyman júgirip júr. Anasy Aqtolqyn Syzdyqova aksııa týraly qalalyq kóp balaly analardyń áleýmettik jelidegi tobynan oqyp bilipti. «Habardy bilgen boıda ákimdikke qońyraý soǵyp, jol silteýimen osynda keldik. Birinshi balamdy súndetke otyrǵyzǵanda sál qıyndaý boldy. Dárigerlik qyzmetti de qaltamyzǵa qaraı izdeımiz ǵoı. Byltyr surastyrǵanmyn: aýyrtpaı, narkoz berip jasaıtyn bolsa, 25 myń teńge, al aýyrǵanyn basatyn dárimen ǵana shyǵaryp salsa, 15 myń teńge eken. Qudaı sátin salǵan bolar, tegin qyzmettiń násibin kórip qaldyq. Bizge jaqsy kómek boldy», deıdi ana.
Al Nurdáýlettiń ákesi telefonda týystaryna «Balamyz súndettelip, azamat boldy!» dep súıinshilep jatty.
