Túrkııalyq ǵalym Iýsýf Azmýn latyn grafıkasyna aýdaryp, túsinikteme bergen, kitap etip shyǵarylǵan dastan Irandaǵy Túrkimen Sahra dep atalatyn aımaqtaǵy shaǵyn qazaq aýylynyń turǵyny Ýálı Muhammed Qoja degen azamattyń qolynda bolypty. Onyń aıtýynsha, bul eńbekti óńir turǵyndary osydan 150 jyl buryn Mervten kelgenderden satyp alsa kerek. Osylaısha, uzaq jyldar boıy saqtalǵan qoljazbany Iýsýf Azmýnǵa Ýálı Muhammed Qoja beripti. Sóıtip, Qorqyt ata dastanynyń Drezden, Vatıkan nusqalaryna jańa úlgisi qosyldy. Ǵalymdar dastannyń ǵylymǵa belgisiz bolyp kelgen osynaý jańa qoljazbasyn «Túrkimen Sahar nusqasy» dep atapty. Al mundaı nusqanyń bar ekendigin alǵash ret aıtqan túrkııalyq ǵalym Metın Ekıdji ony «Túrkistan nusqasy» dep ataǵan edi. Ol túpnusqanynyń Qazaqstannan, sonyń ishinde Mańǵystaý óńirinen tabylǵany týraly málimdegen bolatyn. Biraq dastannyń skanerlengen birneshe bettik kóshirmesin Túrkııada ótken konferensııada tanystyrǵan edi. Biz ulttyń ǵana emes, kúlli túrkige ortaq muranyń Qazaqstannan tabylǵanyna qýana otyryp, aqparattyń anyq-qanyǵyna úńilýge tyrysqanbyz. «Bizdiń ǵalymdar nege bilmeı qaldy?» deskenbiz. Rasynda da akademık Myrzataı Joldasbek tárizdi ǵalymdar dastannyń túpnusqasy Qazaq elinde saqtalǵanyna kúmán keltirgen. «Estıtin edik» desken. Biraq dastannyń úshinshi nusqasynyń tabylǵanyna eshkimniń shúbási bolǵan joq. Biraq dastan Mańǵystaýda emes, Iran jerinde saqtalypty.
