Ortalyq zamanaýı tulǵaǵa qajetti barlyq jaǵdaımen qamtamasyz etilgen. Internet-kafe, emdik-ýqalaý, fızıkalyq-emdeý bólmesi, kınozal, kitaphana, jattyǵý zaly, ıoga, ústel tennısi, bılıard ústelimen jáne balalarǵa arnap jabdyqtalǵan oıyn bólmelerimen qamtylǵan. Bul ortalyqtyń bir ereksheligi – munda tek qarııalar ǵana emes, sonymen birge ómirdiń tálkegine ushyraǵan baldyrǵandar ata-áje meıirimi men qamqorlyǵyna bólenbek. Sáıkesinshe, qarttar ómirdiń bir qýanyshy – balalarmen ýaqyt ótkizip, nemere mápelemek.
Megapolıstegi janǵa jaılylyq syılaıtyn ortalyqta zeınetkerler men múmkindigi shekteýli jandar, balalar úıiniń tárbıelenýshileri bos ýaqyttaryn ótkizip, densaýlyqtaryn jaqsarta alady. Sondaı-aq munda zeınetkerlerge tegin áleýmettik jáne medısınalyq qyzmet kórsetiledi.
«Qoǵamnyń damýy qarııalarǵa kórsetiletin qamqorlyqtan baıqalady. Jyldyń basyndaǵy eseptik kezdesýde qala turǵyndarynyń biri Shymkentten qart kisilerge ómir saltyn jaqsartyp, dene shynyqtyrýǵa arnalǵan ortalyq ashýdy suraǵan bolatyn. Mine, osy ortalyqty ashyp otyrmyz. Zeınetkerler men qarııalar bul ortalyqqa otbasymen, balalarymen jáne nemerelerimen kele alady», dedi Ǵ.Ábdirahymov.
Atalǵan ortalyq Elbasy Nursultan Ábishuly Nazarbaevtyń otandastarymyzdyń ómir súrý jasyn uzartý men buqaralyq sportty damytý tapsyrmasy aıasynda ashylyp otyr. Aıta keterligi, shymkenttikterdiń ómir súrý jasy uzaryp keledi. Megapolıs turǵyndarynyń qazirgi tańdaǵy ortasha jasy 78 jastan asady.
Igilikti sharada qala ákimi turǵyndardy sportpen jappaı shuǵyldanyp, salamatty ómir saltyn ustanýǵa shaqyrdy. Qarttarǵa arnap qoıylǵan konserttik qoıylymda balasha qýanǵan zeınetkerler bı bılep, án salyp, mereke shattyǵyna bólendi.
ShYMKENT
