Tipti munda 30 otbasyna arnalǵan jataqhana da salyndy. Búginde fermada qurttardyń kómegimen maldyń qıyn tolyqtaı qaıta óńdeý jumystary júrgizilýde. Osy arqyly tezekti tap-taza gýmýsqa, ıaǵnı paıdasy óte kóp qarashirikke aınaldyrý tehnologııasy qolǵa alyndy. Sırek kezdesetin kásip ıesiniń aıtýynsha, mundaı tásilmen eki apta ýaqyt ishinde 300-350 kılodaı qaldyqty gýmýsqa, ıaǵnı taptyrmas tyńaıtqyshqa aınaldyrýǵa bolatyn kórinedi.
Budan ári qurttardy keptirip untaqtasa, odan tabıǵı proteın alýǵa bolady. Osy arada kásipker kúnine bir tonnadaı proteın óndirýdi maqsat tutyp otyrǵanyn jetkizdi. Keıingi jyldary álemniń kóptegen elinde jaýyn qurttaryn óndirýge kóńil bólinip keledi. Internet kózderinen alynǵan derekter bul kásip Batys pen Shyǵys Eýropada, AQSh pen Japonııada jáne Ońtústik Shyǵys pen Azııa elderinde keńinen taralǵanyn kórsetedi. Bul ónimder atalǵan elderde ósimdik pen baý-baqsha sharýashylyǵynda qoldanylady eken.
Al TMD elderi arasynda qurt ósirý organıkalyq qaldyqtardy paıdaǵa asyrýdyń taptyrmas tásili ekenin dáleldep júrgen aqtóbelik kásipker Gaık Terterıan men osy sırek kásip salasyndaǵy tehnolog-maman Mıhaıl Krasovskıı desek qatelese qoımaspyz.
Qazirgi kezde Gaık Terterıannyń sharýashylyǵynda 3 mln-nan astam qurt bar eken. Bir qaraǵanda qomaqty sekildi bolyp kóringenimen, onyń aıtýynsha bul óndiristik popýlıasııa deńgeıine jetý úshin tym azdyq etetin kórinedi. Sondyqtan da sırek kásip ıeleri aldaǵy jyly qurt sanyn júz mıllıonǵa jetkizýdi josparlap otyr. Búginde olar osy isti kásibı jolǵa qoıa bilgen elderdiń tájirıbesimen tanysyp, biliktiligin jetildirmek.
Ádette organıkalyq zattardyń shirý úderisi uzaq jyldarǵa sozylatyny belgili. Jaýyn qurttary osy ýaqytty birneshe ese jyldamdata alady. Sóıtip az ýaqyttyń ishinde kádimgi qara qı men tezekti taza da qarapaıym ádispen asa baǵaly qara shirindi tyńaıtqyshqa aınaldyrýdy maqsat etken aqtóbelik kásipker Gaık Terterıannyń kásibi qoldaýǵa ábden laıyqty.
Aqtóbe oblysy,
Alǵa aýdany,
Bestamaq aýyly
