Oqıǵa oryn alǵan kúni shekarashy túngi aýysymnan shyǵyp, úıine kelgen. Tynyǵyp alǵannan keıin avtokóligin jýýǵa kól jaǵasyna barǵan. Osy kezde kópir ústinen eki qyz balanyń ashy aıǵaıyn, árli-berli qol sermep turǵanyn baıqap qalǵan. Júregi áldebir jamanshylyqty sezgendeı janushyra júgirip kelip, áıel men balanyń sýǵa jutylyp bara jatqanyn kórgen. Dereý kólge qoıyp ketip, áıeldi jaǵaǵa alyp shyqqan. Izinshe qaıta maltyp baryp sý astynan balany ázer taýyp alǵan. О́lim men ómir arasynda es-tússiz jatqan bes jastaǵy Nurádilge jedel medısınalyq kómek kórsetip, óz-ózine kelgen soń ortalyq aýrýhanaǵa deıin jetkizipti.
Ulttyq qaýipsizdik komıteti Shekara qyzmeti «Soltústik» óńirlik basqarmasy №2032 áskerı bólim komandıriniń orynbasary Jumahan Ábilbekovtiń sıpattaýynsha, eki múshel jasqa tolǵan Sergeı bala kezinen shekarashy bolýdy armandaǵan. Otan aldyndaǵy boryshyn shekara qyzmetinde ótep kelgen soń birden «Bıdaıyq» ótkizý beketine jumysqa qabyldanǵan. Eki jyldyń ishinde ózin isine tııanaqty, jaýapty maman retinde tanyta bilgen. Minezi salmaqty, kópshil, qoǵamshyl ekeni onyń sózinen de, qımylynan da anyq ańǵarylady. Tótenshe jaǵdaılar jónindegi departament basshylyǵy jýyrda oǵan «Sýǵa batqandardy qutqarǵany úshin» medalin saltanatty jaǵdaıda tapsyrǵanda sol baısaldy qalpynan aınyǵan joq. Sózin aıaǵy aýyr ana men balany qutqarǵanymdy erlikke sanamaımyn. Meniń ornymdaǵy kez kelgen adam osyndaı qareketke barar edi, dep qysqa qaıyrdy.
– Qaryndasym men jıenime ómir syılaǵan Sergeıge alǵysymyz sheksiz. Ol kómekke kelmegende kópirdiń shirigen taqtaılary opyrylyp, 2-3 metr bıiktikten qulaǵan jıenim men maltý bilmese de ulyn qutqarmaq bolyp táýekel etip qosa sekirgen qaryndasymnyń arǵy taǵdyryn kózge elestetýdiń ózi qıyn, – deıdi Qanat Jetpisov.
Osydan birneshe jyl buryn dál osy jerde ajal qusha jazdaǵan áıeldiń baýyry sýda mert bolǵan eken. Qaıǵyly oqıǵanyń qaıtalanýyna jol bermegen erjúrek shekarashyny qalaı ulyqtasa da jarasady.
Soltústik Qazaqstan oblysy
