Bıylǵy naýryz aıynda Qazaqstannyń Tuńǵysh Prezıdenti – Elbasy, elimizdiń egemendigin qolymyzǵa ustatqan, álemniń saıası kartasynda paıda bolǵan jas memleketti jer-jahanǵa tanytqan, ishki-syrtqy saıasatta asqan kóregendikpen jol taba bilgen, tek Otanymyzda ǵana emes, aımaqtyq, halyqaralyq deńgeıde tatýlyq pen beıbitshiliktiń, turaqtylyqtyń jarshysyna aınalǵan, álemniń ıadrolyq qarýsyzdanýyna súbeli úles qosqan, azǵantaı ýaqyttyń ishinde Qazaqstandy damyǵan 50 memlekettiń qataryna qosqan Nursultan Nazarbaev óz erkimen prezıdenttik ókilettiligin toqtatyp, el tarıhynyń jańa kezeńin bastap bergen bolatyn.
Elbasy óziniń otyz jylǵa jýyq ýaqyttaǵy sarabdal saıasatyn jalǵastyrýshy retinde Qasym-Jomart Toqaevqa tańdaý jasap, halyqaralyq deńgeıdegi dıplomat, álem kóshbasshylarynyń arasynda zor bedelge ıe, BUU Bas hatshysynyń orynbasary laýazymyn abyroımen atqarǵan, synı sátterde el Úkimetin basqaryp, halqymyzdyń seniminen shyqqan tulǵaǵa memlekettiń bıligin tapsyrdy. Nursultan Nazarbaevtyń bul tańdaýyn qazaqstandyqtar tolyq qoldady. Bul senim 9 maýsym kúni ótken saılaýda naqty sıfrlarmen, halyqtyń yqylasymen, daýys berýshilerdiń belsendiligimen naqty dáleldendi. Nur Otan partııasynyń atynan dodaǵa túsken Q.Toqaev 9 maýsym kúni Qazaqstan Prezıdentiniń kezekten tys saılaýynda saılaýshylardyń 70,96 paıyzynyń nemese 6539715 adamnyń daýysyn alyp, aıqyn basymdyqpen jeńiske jetti.
Árıne, otandastarymyz Prezıdent saılaýyna alǵash ret Elbasynyń qatyspaýyna tosyrqaı qarap, dúdámal oı keshkeni de ras. Alaıda Nursultan Nazarbaevtyń senimi men qoldaýyna ıe bolǵan Qasym-Jomart Toqaevty qazaqstandyqtar jatsynǵan joq jáne Tuńǵysh Prezıdenttiń tańdaýyna shúbásiz sendi. Al kesheli-berli Qazaqstannyń saılanǵan Prezıdentine ózge memleketterdiń, halyqaralyq uıymdardyń basshylary atynan tolassyz kelip jatqan quttyqtaýlardy álemdik qoǵamdastyqtyń da elimizdegi saıası, tarıhı ózgeristerge qoldaý kórsetýiniń belgisi retinde qaraýǵa bolady.
Sonymen, keshe Nur-Sultan ýaqytymen saǵat 10.30-da Táýelsizdik saraıynyń Úlken zalyna aldymen Qazaqstannyń Memlekettik Týy, Qazaqstan Prezıdentiniń Shtandarty men Ata Zańymyz – Konstıtýsııa ákelindi.
Munan soń saltanatty sharaǵa jınalǵan 3 myńǵa jýyq adam Qazaqstannyń Tuńǵysh Prezıdenti – Elbasy Nursultan Nazarbaevty asqan qoshemetpen qarsy aldy. Árıne, tolassyz qoshemet osy jyldar ishinde Elbasynyń senimin aqtap, eldegi reformalardy, memlekettik saıasatty júzege asyrýǵa úles qosqan seriktesteriniń rııasyz yqylasy edi.
Elbasy tórdegi orynǵa jaıǵasqan soń Qazaqstannyń jańadan saılanǵan Prezıdenti Qasym-Jomart Toqaev Memlekettik kúzet qyzmeti bastyǵynyń raportyn qabyldap, ishke kirdi. Bul tarıhı sát Elbasy sózin jazǵan «Elim meniń» ánimen órnekteldi.
Munan soń minberge Konstıtýsııalyq Keńes Tóraǵasy Qaırat Mámı kóterildi.
– Qurmetti ulyqtaý rásimine qatysýshylar. Búgin elimizdiń tarıhynda taǵy da bir erekshe kún. Búkilhalyqtyq saılaýdyń nátıjesinde Qasym-Jomart Kemeluly Toqaev Qazaqstan Respýblıkasynyń Prezıdenti bolyp saılandy. Men Konstıtýsııalyq Keńestiń Tóraǵasy retinde Qazaqstan Respýblıkasy Konstıtýsııasynyń 42-babyna sáıkes jańa saılanǵan Qazaqstan Respýblıkasynyń Prezıdenti óz qyzmetine Qazaqstan halqyna ant bergen sátinen bastap kirisetinin habarlaımyn, – dedi Q.Mámı.
Bul habarlaýdan soń Qasym-Jomart Toqaev oń qolyn Konstıtýsııaǵa qoıyp: «Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin» dep, memlekettik tilde ant qabyldady.
Sodan keıin Qazaqstan Prezıdenti laýazymyna resmı kirisken Qasym-Jomart Toqaev Qazaqstannyń Memlekettik Týyn súıdi. Sol sátte jańa saılanǵan Qazaqstan Prezıdentiniń qyzmetke kirisý qurmetine Memlekettik Ánuran oınalyp, zalǵa jınalǵan otandastarymyz oń qoldaryn júrek tusyna qoıyp, gımndi qosyla shyrqap turǵan ýaqytta elorda kógin zeńbirekterden 21 ret atylǵan oq jańǵyrtyp turdy. Aqorda rezıdensııasynyń ústinde Qazaqstan Respýblıkasynyń Memlekettik Týy kóterildi.
Ortaǵa shyqqan Ortalyq saılaý komıssııasynyń tóraǵasy Berik Imashev ózine júktelgen taǵy bir saltanatty rásimdi oryndaý úshin sóz aldy.
– Qurmetti Qasym-Jomart Kemeluly! 2019 jylǵy 9 maýsymda ótken Qazaqstan Respýblıkasy Prezıdentiniń kezekten tys saılaýynyń qorytyndysy boıynsha memleketimizdiń tıisti zańdaryna sáıkes Sizge Prezıdent kýáligin tapsyrýǵa ruqsat etińiz, – degen B.Imashev memlekettik mıssııasyn oryndady.
Resmı rásimderden soń Memleket basshysy Qasym-Jomart Toqaev Qazaqstan halqyna júrekjardy sózin arnady.
(Prezıdent Qasym-Jomart Toqaevtyń ulyqtaý rásimindegi sóılegen sózi gazetimizde jeke jarııalanyp otyr).
Ulyqtaý rásimine Tuńǵysh Prezıdent – Elbasy Nursultan Nazarbaevtan bólek, Qazaqstan Respýblıkasynyń Parlamenti depýtattary, Úkimet músheleri, Joǵarǵy sot sýdıalary, Konstıtýsııalyq Keńestiń músheleri, Prezıdent Ákimshiligi men Premer-Mınıstr Keńsesiniń ókilderi, ortalyq memlekettik basqarý organdarynyń basshylary, Ortalyq saılaý komıssııasy men Qazaqstan halqy Assambleıasynyń músheleri, dinı konfessııa ókilderi, oblystar men Nur-Sultan, Almaty jáne Shymkent qalalarynyń ákimderi, Qazaqstandaǵy dıplomatııalyq ókildikterdiń basshylary, prezıdenttikke úmitker bolǵandar, Nur Otan partııasynyń basshylyǵy, Respýblıkalyq jáne aımaqtyq qoǵamdyq shtabtardyń músheleri, qoǵamdyq uıymdardyń jáne buqaralyq aqparat quraldarynyń ókilderi, isker toptar ókilderi, kórnekti ǵalymdar, mádenıet jáne óner qaıratkerleri, jastar uıymdarynyń kóshbasshylary qatysty.
Sońynda Qazaqstan Respýblıkasynyń Prezıdenti – Qazaqstan Qarýly Kúshteriniń joǵarǵy Bas qolbasshysy Táýelsizdik saraıynyń aldyndaǵy alańda Qorǵanys mınıstri Nurlan Ermekbaevtan raport qabyldady. Memleket basshysynyń aldynan Qazaqstan Qarýly Kúshteriniń áskerleri saltanatty sap túzep ótti.
Sonymen, elimiz jańa tarıhı sátke qadam basty. Endi Memleket basshysy Qasym-Jomart Toqaev óziniń sózinde halyqtyń tabysyn arttyrý jáne ál-aýqatyn jaqsartý, sybaılas jemqorlyqqa qarsy tıimdi is-qımyldar jasaý, sot-quqyqtyq reforma, ádiletti áleýmettik saıasat, turǵyn úı máselesin sheshý, óńirlerdi damytý, tepe-teńdik jáne kópvektorly syrtqy saıasat, sondaı-aq, jastardy qoldaý baǵyttaryn oryndaýǵa bel sheshe kirisedi.
Serik ÁBDIBEK,
Erkejan AITQAZY,
Svetlana ǴALYMJANQYZY,
«Egemen Qazaqstan»
