Árıne, qoǵam taǵatsyzdana kútken Prezıdenttiń ulyqtaý rásimindegi sózi – azamattarymyzdyń basty saýaldaryna berilgen naqty jáne túsinikti jaýap. Onda Prezıdent Q.K.Toqaevtyń Saılaýaldy tuǵyrnamasynyń erejeleri ǵana kórinis taýyp qoımaı, olarǵa qol jetkizýdiń negizgi tásilderi de belgilenip, jınaqtalǵan túrde berilgen.
Sabaqtastyq qaǵıdaty Elbasynyń Qazaqstandy Úshinshi jańǵyrtýdy, Bes ınstıtýttyq reformany iske asyrýǵa arnalǵan baǵytynyń, Prezıdent «Elbasy strategııasy» dep ataǵannyń barlyǵynyń ózgermeıtindigimen rastaldy.
Sonymen birge jańa tásilder men jańa sheshimder ýáde etildi, Memleket basshysynyń aıtýynsha, olar ózderin kóp kúttirmeıdi.
Sondaı-aq Tuńǵysh Prezıdent – Elbasy ótken jyldyń sońynda jáne osy jyldyń basynda qalyptastyrǵan qýatty áleýmettik paket osy saladaǵy eleýli nátıjelerge qol jetkizý maqsatynda áleýmettik saıasattyń jańartylýymen tolyqtyrylatyny da asa mańyzdy.
Bıliktiń adamdardyń suranystaryn estý, jergilikti jerlerdegi máselelerdi sheshý, azamattar aldynda júıeli túrde esep berý mindeti erekshe atap ótildi. «Ýáde bermeı, isteý kerek!» degen tezıs ortalyq jáne jergilikti bıliktiń is-áreketterin baǵalaýshy ustanymǵa aınalyp, ol adamdardyń naqty ál-aýqatynan kórinis tabýǵa tıis. Ádildik qaǵıdatyn rastaý degenimiz de, mine, osynda jatyr.
Barlyq saladaǵy – ekonomıkalyq, áleýmettik jáne saıasat salasyndaǵy progress qaǵıdatyn Prezıdent qazirgi zamanǵy syn-qaterlerge birden-bir durys jaýap retinde qarastyrady. Biraq progrestiń ózi de sandyq nemese fızıkalyq ósý retinde emes, adamdardyń ıgiligi úshin jasalǵan jasampaz ózgerister retinde túsiniledi. Sondyqtan qazaqstandyq kásipkerlerdi qoldaý, ınvestısııalardy tartý jáne qorǵaý, iskerlik belsendilikti yntalandyrý nıeti, saıyp kelgende, turaqtylyq pen birliktiń negizi retinde keń aýqymdy orta tapty qalyptastyrýdy bildiredi.
Mine, osy jerde biz Memleket basshysynyń qoǵam men azamattar úshin mańyzdy – qoǵamnyń birligin qamtamasyz etý jáne árbir azamattyń quqyqtaryn qorǵaý maqsatyna jaqyndaımyz. Saılaý naýqany da osy áleýmettik suranysty qoǵamdyq kún tártibindegi jetekshi trend retinde alǵa shyǵardy.
Ekinshi jaǵynan, Memleket basshysy ulyqtaý rásimindegi sózinde óz prezıdenttiginiń jahandyq maqsattaryn ǵana emes, sondaı-aq olarǵa qol jetkizýdiń negizgi tásilderin de atap kórsete aldy.
Memlekettiń strategııalyq maqsattarǵa qol jetkizýi úshin jaýapkershiligi bir formýlamen tujyrymdaldy: kúshti, ókiletti Prezıdent – yqpaldy, áreketke qabiletti Parlament – halyqqa esep beretin Úkimet. Alaıda, saıası qondyrma júrgizilip jatqan ekonomıkalyq ózgeristerge sáıkes bolýy úshin saıası transformasııa prosesi belgilengen.
Bul prosess bıliktiń halyq aldyndaǵy jaýapkershiligin arttyrý, azamattyq qoǵamdy damytý, bılik pen qoǵamnyń dıalogy, sondaı-aq pikirler plıýralızmi vektory boıynsha qurylatyn bolady.
Bul joldaǵy alǵashqy qadam, bálkim alǵashqy keńesi osy jyldyń tamyz aıynda ótetin Ulttyq qoǵamdyq senim keńesin qurý bolýy múmkin.
Al Prezıdenttiń saılaýaldy tuǵyrnamasyn iske asyrýdyń naqty jospary barlyq jumystyń ortaq máni bolyp, onda azamattar men qoǵamnyń tilekteri eskeriletin bolady.
Memleket basshysy Prezıdent laýazymyndaǵy jumysynyń basymdyqtary dep ataǵan 10 mindet barynsha naqtylyqpen atap kórsetildi. Olardyń qatarynda halyqtyń tabysyn arttyrý, sybaılas jemqorlyqqa qarsy kúres, sot reformasy, jumysqa ornalastyrý, jańa jumys oryndaryn ashý, tabysty ádil bólý, turǵyn úı máselelerin sheshý, ádil áleýmettik saıasat, jalpyǵa birdeı oqytýdy qoldaý, sapaly memlekettik qyzmetter kórsetý, óńirlerdi damytýdyń jańa baǵyty, «Rýhanı jańǵyrý» baǵdarlamasy, syrtqy saıasat jáne jastar blogy bar.
Saılaý aldyndaǵy tuǵyrnamada belgilengen baǵyttar arnasynda múlde kútpegen jáne jańa usynystar aıtylyp, olar Q.Toqaevtyń óz básekelesteriniń halyq arasynda tanymal bolǵan tezısterine aıtarlyqtaı mán berip, shyn máninde barsha qazaqstandyqtyń «halyqtyq» Prezıdenti bolýǵa nıetti ekenin kórsetti.
Olardyń arasynda – «ósýdiń mańyzdylyǵy», «sot ádildiktiń sońǵy ınstansııasyna aınalýy tıis», «kiristerdi ádil bólý – strategııalyq mańyzy bar másele», «halyq óńirlerdegi sheshim qabyldaýlarǵa qatysýy tıis», «bostandyqqa umtylý, halyqtyń birligi men jasampaz kúshi», «jastar – progrestiń qozǵaýshy kúshi», «Prezıdenttiń kadrlyq rezervi» bar.
Bul usynystardy qoǵam da, qazaqstandyq saıası tap ta, memlekettik qyzmet te estýge tıis. Estip, Táýelsiz Qazaqstannyń jańa tarıhy «esik qaǵyp turmaǵanyn», qazirgi kezde «tabaldyryqtan attaǵanyn» túsinýleri kerek. Sondyqtan da «prezıdenttik ýaqyt» qysylyp, nyǵyzdala túsýde, óıtkeni Prezıdent ulyqtaý rásiminde sóılegen sózinde belgilegen merzimder – «taıaý bolashaq ta» emes, «Úkimettiń taıaýdaǵy otyrysy», bıylǵy jyldyń tamyz aıy, búgin jáne dál qazir.
Bul degenimiz, biz bárimiz birge jańa saıası sıklge qadam basqanymyzdy bildiredi jáne qazir bizdiń aınalamyzda – jańa shynaıy ómir.
Janseıit TÚIMEBAEV,
QHA Tóraǵasynyń orynbasary
