Kıno • 13 Maýsym, 2019

«Shyraqshy» – Shanhaı festıvalinde

841 ret

kórsetildi

1 mın

oqý úshin

15-24 maýsym aralyǵynda ótetin Shanhaı halyqaralyq kınofestıvali aıasynda rejısser Ermek Tursynovtyń «Shyraqshy/Hranıtel» kórkem fılminiń álemdik tusaýkeseri ótpek. Qazaq kıno tarıhynda atalǵan festıvaldiń negizgi konkýrsyna qazaqstandyq fılm alǵash ret qatysyp otyr.

Egemen Qazaqstan

Fılm sıýjeti soǵystan qaıtqan sarbazdyń keıingi ómir jolyn baıandaıdy. Qan maıdanda nemistiń shalyn qutqaryp qalǵany úshin eski fılmder taspalanǵan kınoproektordy syıǵa alǵan sátte maıdangerdiń ómirlik muraty jańa arnaǵa burylǵan edi. Ol ómiriniń sońyna deıin kınoproektordy kóziniń qarashyǵyndaı saqtap, keleshekke jetkizýdi murat etedi. Kórkem týyndy «zamana kóshi ozǵanmen, óner ǵana máńgilik» degen oıdy belgili bir arnaǵa toǵystyra otyryp, tartysty oqıǵamen órbitedi.

Prodıýser Qanat Tórebaıdyń aıtýynsha, oqıǵa jelisi shyndyqqa negizdelgen. «Shyraqshy degen uǵym qazaq tanymynda orny bar tulǵa, ıaǵnı kıeli orynnyń saqtaýshysy. Ermektiń kınolary qashanda astarly oıymen qundy keledi. Qandaı kórermen bolsa da ózine kerek dúnıeni paıymdaı alady», deıdi ol.

Fılmniń alǵashqy epızodtary Vengrııanyń Býdapesht qalasynda, sondaı-aq Qazaqstannyń jekelegen aýdandarynda túsirilgen. Rólderdi Murat Muqajanov, Qýat Tileýbaev, Nına Ýsatova, Álibek Danabaı syndy talantty akterler qatary alyp shyqsa, mýzykalyq súıemeldeýin kompozıtor Qýat Shildebaev atqarǵan. Ssenarıı avtory jáne qoıýshy rejısseri Ermek Tursynov bolsa, qoıýshy-operatory Martın Sechanov, qoıýshy-sýretshisi Qýat Tileýbaev syndy mamandarǵa júktelgen.