«Festıvalda iri etnomýzykanttar men sportshylar, búrkitshiler, qoldanbaly óner sheberleri ózderiniń talanttaryn kórsetti. Etnomádenıet festıvaliniń basty maqsaty – kóshpeli halyqtyń erte tarıhyn jańǵyrtý, óskeleń urpaqqa ár ulttyń ózara uqsastyǵyn túsindirý», dedi qalalyq mádenıet basqarmasynyń basshysy Nurlan Sydyqov.
Shara barysynda Qazaqstannyń jeti dúrkin, álemniń eki dúrkin chempıony, Gınesstiń rekordtar kitabyna eki ret engen Sergeı Syrýlnıkovtyń basqarýymen alyptar shoýy boldy. Olar kúresti, shegeni qoldarymen qaqty, temirdi maıystyrdy, gir kóterdi. Budan ózge, Androsh Bıronyń basqarýymen Majarstannan kelgen qonaqtar áskerı at oıyndaryna qatysyp, býrıattyq shaman Velıgto Badmaev ystyq tastar arqyly kóz tııýden qorǵady. Bashqurtstannan kelgen sadaqshylar jaıaý jáne at ústinde turyp «Mergen ýksy» mergendik ónerlerin kórsetti. Qyrǵyzdyń «Salbýýrýn» komandasy búrkitpen jáne tazy ıtpen ań aýlaý sheberligin usyndy.
Almaty qalasynyń ákimi Baýyrjan Baıbek Boraldaı qorǵandary aýmaǵynda Saq mádenıeti ortalyǵy qurylysynyń jobasymen tanysty. Onyń jobalyq-smetalyq qujattary jasalyp, memlekettik saraptamaǵa jiberilgen. Qala basshysy óziniń sózinde mundaı ortalyqtyń paıda bolýy Almatynyń týrıstik áleýetin, el tarıhyna degen qyzyǵýshylyqty arttyratynyn, qundy arheologııalyq parkti qorǵaýǵa, bolashaq óskeleń urpaq úshin tarıhı-mádenı mura jaýharyn kózdiń qarashyǵyndaı saqtaýǵa múmkindik beretinin aıtty.
Elbasynyń «Uly dalanyń jeti qyry» baǵdarlamalyq maqalasy aıasynda Almatyda Raıymbek batyrdyń mavzoleıi rekonstrýksııalanbaq. Osynaý kıeli orynda memorıaldyq mýzeı kesheni ashylady. Bulardan ózge, «Etnolend» etnomádenı keshenin salý josparlanyp otyr.
Festıval aıasynda birqatar zamanaýı ulttyq óner kórmeleri uıymdastyryldy, «Turan», «HasSak» etno-folklorlyq ansamblderi, Túrkııadan, Mońǵolııadan, Altaı men Tyvadan, Chývashııa men Qyrǵyzstannan jáne basqa elderden kelgen tanymal ártister óz ónerlerin kórsetti.
Saparbaı PARMANQUL,
«Egemen Qazaqstan»
