Máselen, Jańarǵan Qarabala jáne Ásel Ánetova tula boıy tuńǵysh uldarynyń esimin Qasym-Jomart dep qoıýdy uıǵarypty. Aıta keterligi, jas ananyń tolǵaǵy dál saılaýdan keıin bastalyp, túngi saǵat 00:00-de shekesi torsyqtaı sábı ómirge keldi. Mine, araǵa úsh kún salyp Qasym-Jomart Jańarǵanulyn perzenthanadan shyǵarý saltanaty Qazaqstan Prezıdentin ulyqtaý rásimimen tuspa-tus keldi.
– Tuńǵyshymyz el tarıhyndaǵy mańyzdy sátterdiń birinde týǵanyna qýanyshtymyn. Iаǵnı maýsymnyń 9-nan 10-na qaraǵan túni ulymnyń kindigi kesildi. Perzenthanadan shyǵarylatyn kún Prezıdent ulyqtaýymen sáıkes kelgenine de tańyrqaǵanymyz ras. Balanyń esimin tańdaýǵa kelgende ultqa qyzmet etken tulǵalardyń birine túsetini anyq edi. El tarıhyna qarasaq, Qasymdar az bolmady. Sonaý orta ǵasyrdaǵy Qazaq handyǵynyń negizin salǵan áz Jánibektiń uly Qasym hannyń tusynda jerimiz ulǵaıyp irgeli elge aınalǵanymyz barshaǵa belgili. Sonymen qatar ataqty partızan-jazýshy, Halyq qaharmany Qasym Qaısenovtiń ózi bir tóbe. Sol sekildi daýyldy poezııasymen Alty alashqa aty máshhúr Qasym Amanjolovty atap ótýge bolady. Álbette jańa dáýirdegi jańa Prezıdentimizdiń atyn negizge ala otyryp Qasym-Jomart dep balamyzǵa azan shaqyryp, esimin qoıdyq, – deıdi J. Qarabala.
Jaqsylyq Muratqalı
