«Sonaý bir jyldarda aýylda ósken árqaısysymyz taǵdyrlas edik. Maıdanǵa ketken ákeniń ornyn qaısar analar basyp, úıdiń de, túzdiń de tirligin bir kisideı atqardy. Sondaı aýyrtpalyqty jyldarda bala tárbıesi nazardan tys qalmady. Analarymyzdyń, eńbekke jarap qalǵan baýyrlarymyzdyń arqasynda qanatymyz qataıyp, shyńdalyp, búgingi kúnge jettik. Áke alaqanynyń jylýyn, meıirimin kórmeı ósken bizder sol jylýdy, meıirimdi janaryndaǵy jasyn jaýlyǵymen búrkeı júrip, belin bekem býǵan, qıyndyqqa moıymaı ósirgen analarymyzdan aldyq. Ákem Ábdiqalyq maıdanǵa attanǵanda jasqa tolar-tolmas kezim eken. Ápkem Jumakúl, baýyrym Semetaı úsheýimiz balalyqtyń kermek dámin tata júrip, oqyp jetildik, anamyzǵa qolqanat boldyq»,- deıdi Tólegen Ábdiqalyqov.
Búginde úlken shańyraqtyń uıytqysy bolyp otyrǵan Tólegen aqsaqal balalaryn da tirlik taýqymetine moıymaýǵa, adal eńbekpen jetistikke jetýge baýlyǵandyǵyn aıtady. Ár balasynyń óskeni, bilim alyp, eńbek etken jyldardaǵy qyzyǵy men qýanyshy qatar órilgen sátterine toqtalyp ótti. Búginde eki ul, úsh qyz tárbıelep ósirip, on úsh nemere súıip otyrǵan ardaqty ata men ájeniń tuńǵyshtary Ádilet memlekettik qyzmette bolsa, Samaty men Gúlzıra, Laýra qyzdary kásipkerlikpen aınalysyp júr. Al úıdiń kenjesi Dana esep mamany. Nemerelerine úlken atalary jaıynda ǵıbratty áńgimelerin aıtyp otyratyn Tólegen aqsaqaldy keýde túpkirinde buǵyp jatqan ákege degen saǵynysh Reseı jerimen de tabystyrdy. QR Qorǵanys mınıstrligine izdeý sala júrip, Jeńistiń 70 jyldyǵy qarsańynda Serpýhov qalasy mańynda jerlengen Ábdihalyq Tolǵabaevtyń rýhyna balalary, nemereleri taǵzym etip, rýhyna quran baǵyshtap qaıtty.
Sonaý 60-jyldardyń aıaǵynda Talǵar qalasynda tabysyp, otbasyn kótergen Tólegen Ábdihalyqov pen Aıgúl Tósekbaeva Raıymbek aýdanynyń Abaı kolhozynda eńbek etip, aýyldyń ósip-órkendeýiniń kýási bolǵan jandar. Qatardaǵy mehanızatorlyqtan bastap, eńbek jolyn aýyl sharýashylyǵyna bir kisideı arnaǵan Tólegen aǵamyz árdaıym bilimin jetildirip, eńbekkerler úshin biliktilik sabaqtaryn júrgizip, kásiptik bilim ıgerýge atsalysty. Al jetpisinshi jyldardyń sońyn ala Almaty mańyna arnaıy joldamamen at basyn tiregen otbasy Qaraǵaıly aýylynyń órkendeýine úles qosyp, osy óńirde ósip-óndi. Bas ınjener, kolhoz basshylyǵyndaǵy jyldar árıne úlken ómirlik tájirıbeniń mektebindeı edi. «Tulpar» merdigerlik uıymyn jolǵa qoıyp, aýyl azamattarymen qoıan-qoltyq shaǵyn ólkeniń táýelsizdikten keıingi jyldardaǵy órkendeýin de kóz aldynan ótkerdi. Al kolhoz tarap, el eleń-alań kúı keshe bastaǵan tusta kásipkerliktiń álippesin ıgergen Ábdihalyqovtar halyqqa qyzmet kórsetý qyzmetin jolǵa qoıdy.
On eki jyl aýdanda balalar dárigeri bolyp eńbek etken Aıgúl apaıymyz babalarynyń tárbıesinde Aıtyqan ájeleriniń eńbegi zor ekendigin aıtady. Dárigerlik jumystan qol úzbeı, bala tárbıesine alańdamaýyna jaǵdaı jasap otyrǵan. «Enem sondaı parasatty jan boldy. Tipten, men erke kelin boldym-aý deımin. Qataryńnan qalma dep, balalardy baǵyp-qaǵýdy óz jaýapkershiligine aldy. Almaty mańyna kóship kelgen kezde de bir jaǵymyzǵa bolysyp, otbasynyń berekesin saqtap otyrǵan anamyz edi. Sonyń arqasynda bolar balalarymyz úlkenge izetti, kishige meıirban bolyp ósti» dep eske alady Aıgúl apaı. «Bul kisi aýyldyń jedel járdemi sııaqty boldy ǵoı» dep ázil-qaljyńymen áńgimege ortaqtasqan Tólegen aqsaqaldyń sózin qup kórgen tájirıbeli dáriger-ana áńgimesin jalǵap, kásibı dárigerliktiń tájirıbemen keletindigin aıtady. Maman tapshy sol bir ýaqytta derti janyna batqan talaı jannyń saýabyn alyp, áıel bosandyryp, búginde osy aýyldaǵy meıirban jan retinde zor qurmetke bólenip otyr. Ábdihalyqovtar otbasyn búginde aýyl úlgi etedi. Bıylǵy jyly mamyr aıynda Almatyda ótken «Mereıli otbasy» mártebesine laıyq dep tanylyp, jeńimpaz otbasy atandy. Jarty ǵasyr bir shańyraq astynda tatý-tátti ǵumyr keshken áke men sheshe balalaryn zamanýı sharýaǵa da ıkemdep, zeınetke shyqtyq dep qol qýsyryp otyrmaı, otbasylyq kásiptiń júgin jeńildetip júr. «Dáýletine-dáýlet qosylyp, basyna baq qondy» dep qurmetpen qaraıtyn shańyraq bala tárbıesiniń bastaýy eńbekte, óskeleń urpaqqa degen qamqorlyqta dep biledi. Búginde beınetiniń zeınetin kórip otyrǵan qamqor áke men meıirimdi ana eldiń birligi men tushymdy tirliginiń tileýshisi.
