Maýsym aıynyń alǵashqy aptasynda Qaraǵandy oblysynyń Temirtaý qalasynda dál osyndaı bı óneriniń úzdikterin synǵa salǵan «Tansevalnaıa feerııa» VI respýblıkalyq baıqaýy uıymdastyryldy. Aıtýly sharada Kırov orta mektebiniń horeografy T.Chıchagınanyń jetekshiligimen óner kórsetken talantty bıshilerden quralǵan «Jas jalyn» bı toby aıryqsha kózge tústi. Top jetekshisiniń pikirinshe, jetkinshek bıshiler mýzykalyq yrǵaqqa saı yqshamdaǵan kerbez dene qımyldarymen, bı óneriniń mánin túsiný deńgeıimen erekshelendi. Olar ásem qımylmen myń burala bılep júrip, namysty da qoldan bergen joq. Kesh qorytyndysy boıynsha, talantty ansambl júldeli 2-orynǵa ıe boldy.
Qanjyǵasy maılanyp qaıtqan bı tobyndaǵy ár bıshige uıymdastyrýshylar tarapynan arnaıy sertıfıkat pen baǵaly syılyqtar tabys etildi. Jeńis tuǵyryna kóterilgen ónerpazdar janarynan sheksiz rızashylyq sezimi aıqyn baıqalyp turdy. Kesh sońynda jeńimpazdar ózderi úshin jankúıer bolyp, qoldaý bildirgen jetekshileri men ata-analaryna da alǵysyn jetkizýdi umytpady. Baıqaýdan qanjyǵasy maılanyp, júldeli oralǵan baldyrǵandarǵa mektep dırektory J. Soltanov bilim ordasynyń barsha ustazdar qaýymy atynan quttyqtaýyn joldap, «Jas jalyn» bı tobynyń kórkemdik jetekshisi B.Chıchagınany arnaıy alǵys hatpen marapattap, shyǵarmashylyq tabys tiledi. Sondaı-aq saltanatty jıyn sońynda mektep dırektory jas ónerpazdardyń alda áli de talaı belesti baǵyndyratynyna zor senim bildirdi.
Aına ALPYSBAI,
L.N.Gýmılev atyndaǵy
EUÝ stýdenti
