Máselen, qyzyljarlyq Erik Ázenovtiń Soltústik Qazaqstan oblysy ákimdigimen alysyp kele jatqanyna bıyl úsh jyldan asty. Qos tarap 2016 jyly jer qoınaýyn paıdalaný jóninde arnaıy kelisimshartqa otyrǵan. Sol boıynsha ken ornynda 6 mln AQSh dollaryna as tuzyn óndiretin zaýyt ashyp, 100 adamdy jumyspen qamtý kózdelgen edi. Alaıda teriskeıdegi ákim-qaralar tıisti jer telimin bermeı, sharýany júrgizýge kedergi keltirýde deıdi kásipker.
– Bul máselege qatysty Soltústik Qazaqstan oblysy sotynyń sheshimi bar. Onda ákimdiktiń zańǵa qaıshy áreketteri kórsetilgen. Oblystyq sot jiberilgen olqylyqtardy tolyq kólemde túzetýge qaýly shyǵardy. Úsh sotta da jeńip shyqtym, alaıda ákimdik tıisti mindetterin oryndaýǵa asyǵar emes. Memleketpen kelisimshart jasastyq, biraq atqarýshy organdar jaýapsyzdyq tanytyp otyr, – deıdi E.Ázenov.
Parlament Májilisiniń depýtaty Keńes Absatırov mundaı faktilerden keıin keıbir memlekettik organdarǵa degen senimsizdik paıda bolýy yqtımal ekendigin jasyrmady.
– Memlekettik organdardyń «Bıznestiń jol kartasy-2020» baǵdarlamasy boıynsha oryndamaǵan mindettemelerin mysalǵa alýǵa bolady. 2015 jyly bıznes nysandaryna ınfraqurylym tartý boıynsha jaqsy bastama qolǵa alyndy. Bul is toqtap qalǵan soń kelisimshart jasasqan tulǵalar quralaqan qaldy. Osy rette jobalyq-smetalyq qujattamany daıyndaýǵa jeke jáne qaryzǵa alynǵan aqsha jumsalǵanyn aıta ketý kerek. Kezinde «Semeı Injınırıng» AQ men Qorǵanys mınıstrligi arasynda osyǵan uqsas jaǵdaı tirkelgen edi. Zaýyt mınıstrliktiń tapsyrysyn tolyq kólemde oryndap shyqty. Áıtse de jaýapty vedomstvo atqarylǵan iske qarajatty aýdarmaı álek qyldy. Saldarynan aqshany sot arqyly alýǵa týra keldi, – dep naqty derekterdi keltirdi halyq qalaýlysy.
Otyrys kezinde spıkerler Esep komıtetiniń derekterin de baıan etti. Máselen, ótken jyly 9 mlrd teńge kólemindegi bir myń atqarý qujaty oryndalmaǵan. Joǵarǵy sottyń Azamattyq ister jónindegi sot alqasynyń tóraǵasy Meırambek Taımerdenov búginde memlekettik qyzmetkerlerdi zańdy buzǵany úshin jaýapkershilikke tartý kún tártibindegi máselelerdiń qatarynda ekendigin aıtady. Ázirge kelisimshartty buzǵan tarapqa aıyppul salý nemese múlikke shekteý qoıý zań júzinde qarastyrylmaǵan.
Keńestiń nátıjesinde Ádilet mınıstrligi, Joǵarǵy sot jáne Bas prokýratýra júktelgen mindetti buzǵan jaýapty tulǵalardy qylmystyq, ákimshilik, sondaı-aq tártiptik jaýapkershilikke tartý jóninde usynysty qarastyrýǵa ýáde etti.
Jaqsylyq MURATQALI,
«Egemen Qazaqstan»
