...alǵysyn aıtady
Jol azabynan qutylatyn bolamyz
Biz Batys Qazaqstan oblysy ortalyǵynan 600 shaqyrymda jatqan eń shalǵaı Bókeı Ordasy aýdanynda turamyz. О́zim ómir boıy aýyl sharýashylyǵy salasynda eńbek etken ardagermin.
Qazaqstannyń Tuńǵysh Prezıdenti – Elbasy Nursultan Nazarbaev byltyr bizdiń óńirge jumys saparmen kelgen kezde jol qurylysynyń mańyzdylyǵyn atap ótip, shalǵaıda ornalasqan Bókeı Ordasy, Jánibek jáne Qaztalov aýdandaryna tas jol salý máselesin sheshýdi Úkimetke tapsyrdy. Bul jol tezirek salynsa, «Qazaqstannyń jalpyulttyq qasıetti oryndary» tizimine engen Han Ordasy mádenı-tarıhı keshenine týrısterdiń aǵylýyna jol ashylyp, halyq talaı jylǵy jol azabynan qutylyp, múldem jańa dáýir bastalar edi.
О́tkende Aq jaıyq ólkesine Prezıdentimiz Qasym-Jomart Toqaev kelip ketti. Jolymyzdyń salynýyn kópten kútip júrgen bókeıordalyqtar «Tuńǵysh Prezıdenttiń tapsyrmasy endi óz ýaqytynda ári sapaly salynar ma eken?!» dep alańdaýly edi. Osy kezdesýge de el atynan kelip arnaıy qatystym. Memleket basshysy óńirde birinshi klasty ınfraqurylym qurý máselesin jeke másele etip kóterip, Úkimetke arnaıy tapsyrma bergenine qatty qýandyq. «Ásirese oblysta joldardyń 70%-y – nashar kúıde. Bul dabyl qaǵatyn másele dep esepteımin. О́ıtkeni sapasyz jol turǵyndardyń kúndelikti turmysyn tómendetip qana qoımaıdy, óńirdiń eksporty men kólik tasymaly kórsetkishterine de áser etedi. Qazir Orynbor baǵytyna jáne óńirdiń Qaztalov, Jánibek jáne Bókeı ordasy aýdandaryna jol salynyp jatyr. Oblystyń ońtústik aýdandaryn Oral qalasymen jalǵaıtyn joldyń qurylysyn 2021 jyldyń sońyna deıin aıaqtaýdy Úkimetke tapsyramyn», dedi Qasym-Jomart Kemeluly. Bul tapsyrma Bókeı Ordasynda turatyn myńdaǵan jerlesterimniń qulaǵyna maıdaı jaqqany sózsiz. El tilegin eskergen Memleket basshysyna bókeıordalyqtardyń alǵysyn jetkizý úshin osy joldardy jazyp otyrmyn.
Haırolla SABYROV,
eńbek ardageri
Batys Qazaqstan oblysy,
Bókeı Ordasy aýdany
...áserimen bólisedi
Sultanbek Qojanov oqýlary ótti
Qazaq ultynyń kógine kún, rýhyna nur bolǵan Sultanbek Qojanovtyń 125 jyldyǵy bıyl respýblıka kóleminde keńinen atalyp ótpek. Osy sharaǵa oraı Túrkistan oblysynyń alty alashtyń ardaqtysy dúnıege kelgen Aqsúmbe aýylynda baıypty bastamalar bastaý alýda. Jýyrda Sultanbek esimin ıelengen mektepte respýblıkalyq deńgeıde dástúrli Sultanbek Qojanov oqýlary ótti. Sharaǵa arysy Nur-Sultan, berisi Almaty, Shymkent qalalarynan belgili ǵalymdar, sultanbektanýshylar, el aǵalary shaqyrylǵan bolatyn.
Sondaı-aq Sultanbek oqýlaryna Jambyl, Qyzylorda, Túrkistan oblystarynan 22 oqýshy órender arnaıy qatysyp, baqtaryn synap qaıtty. Júzden júırik atanyp oza shapqan oqýshylar arnaıy alǵys hattarmen, baǵaly syılyqtarmen marapattaldy. Odan soń mektep aldyndaǵy Sultanbek babamyzdyń eskertkishine qonaqtar gúl shoǵyn qoıyp, as ústinde quran baǵyshtaldy. Jalpy, is-shara kóptiń kóńilinde, kóregen jandardyń kókeıinde qalatyndaı joǵary deńgeıde ótti. Ol da bolsa aıadaı ǵana aýyldyń yntymaǵy men birliginiń elge úlgi bola alatyndaı ekendigin tanytty. El aǵalary Aqsúmbe aýylynyń ardaqty azamattaryna aq batasyn jaýdyryp, sheksiz alǵystaryn bildirdi.
Maqsat QARǴABAI
Túrkistan oblysy
...oı qozǵaıdy
Qazaq nege saıahattamaıdy?
О́skemenniń qazaǵy ómir boıy Aqtaýdy kórmeı ketýi, Qostanaıdyń qazaǵy eshqashan Tarazdy kórmeı ketýi múmkin. Oraldyń qazaǵy ómir boıy Taldyqorǵandy kórmeı ketýi yqtımal. Qazaq arasyn qalaı jaqyndatamyz? Ishki týrızmdi qalaı damytamyz? Tikeleı qalaaralyq reısterdi nege ashpaımyz? Shymkent – Semeı, Atyraý – Pavlodar degen reıster joq, mindetti túrde Almaty men Nur-Sultan arqyly ushýǵa májbúrmiz.
Qazaqty qudalyq qana emes, saıaxat ta jaqyndastyrsyn degen nıet qoı.
Samat NURTAZA
...rızashylyǵyn bildiredi
Aýylyna sport alańyn salyp berdi
Jerlesteriniń chempıon bolǵanyn qalaıtyn qaltaly azamat óz qarjysyna sport alańyn salyp bergen bolatyn.
Jeke kásipker Máýlen Shapanbaıuly Muqashev Muqyry aýylynda dúnıege kelgen. Ol Elbasy maqalasynan bastaý alǵan «Týǵan jer» baǵdarlamasyna qoldaý retinde ári jerlesteriniń arasynan chempıon shyqsyn degen nıetpen sport alańyn syıǵa tartty. Aýyldaǵy sport nysanynda fýtbol, basketbol, voleıbol men tennıs alańdary bar. Fýtbol men voleıbol alańy 42/22 metr, basketbol men tennıs alańy 30/22 metrdi quraıdy. Munda ár turǵynnyń sportpen aınalysyp, sheberligin shyńdaýǵa múmkindigi bar.
«Týǵan jerdiń ár túlegi qaı jerde, qandaı qyzmette júrse de atameken – altyn besigin bir sát esten shyǵarmaı, oǵan máńgilik qaryzdarmyn dep esepteýi tıis. О́ıtkeni adam boıyndaǵy daryn, qabilet, tektilik syndy abzal qasıetter ana súti, áke qany, týǵan jerdiń topyraǵynan darıdy», – dedi jeke kásipker Máýlen Shapanbaıuly. Aýyl turǵyndarynyń alǵysyna bólengen jany jomart azamatqa halyq qurmetpen tulpar mingizip, ıyǵyna zerli shapan japty.
Samal QABYShEVA
Almaty oblysy
