Premer-Mınıstr Asqar Mamınniń tóraǵalyǵymen ótken QR Úkimetiniń otyrysynda tegin medısınalyq kómektiń kepildendirilgen kóleminiń tizimine ózgerister engizildi jáne 2020 jyly iske qosý josparlanǵan mindetti áleýmettik medısınalyq saqtandyrý (MÁMS) júıesindegi medısınalyq kómektiń jańa tizimi bekitildi.
QR Tuńǵysh Prezıdenti – Elbasy Nursultan Nazarbaevtyń MÁMS júıesine kóshý boıynsha tapsyrmalaryn oryndaý barysy, tegin medısınalyq kómektiń kepildendirilgen kólemi modelin engizý jáne Memleket basshysy Qasym-Jomart Toqaevtyń medısınalyq qzymetterdiń sapasyn arttyrý boıynsha mindetterdiń oryndalýy týraly QR densaýlyq saqtaý mınıstri Eljan Birtanov baıandady. Sonymen qatar jergilikti ınfraqurylymnyń daıyndyǵy máselesi boıynsha birqatar óńirlerdiń ákimderi tyńdaldy.
«Bárimizdiń aldymyzda medısınalyq qyzmetterdiń qoljetimdiligi men sapasyn arttyrý boıynsha ortaq mindet qoıylǵan», — dedi Asqar Mamın.
Qazaqstan Úkimeti medısınalyq qyzmetterdiń qoljetimdiligi men sapasyn arttyrý boıynsha jumystardy jalǵastyratyn bolady. Osy rette, densaýlyq saqtaýdy damytýdyń 2025 jylǵa deıingi jańa memlekettik baǵdarlamasy ázirlenýde. Mańyzdy mindetterdiń biri — mindetti áleýmettik medısınalyq saqtandyrýdy tıimdi engizý. Saqtandyrýdy tıimdi engizý úshin bıylǵy 1 qyrkúıekten bastap Qaraǵandy oblysynda pılottyq joba iske qosylady, oǵan óńirdegi barlyq medısınalyq uıymdar tartylady. A. Mamın atap ótkendeı, bul tetikti barlyq óńirlerge taratý jáne 2020 jyldan bastap medısınalyq saqtandyrý tolyq iske qosylǵan kezde eskerý qajet.
QR Premer-Mınıstri óńirlerdiń ákimderine medısınalyq uıymdardy kompıýterlermen, úzdiksiz ınternetpen jáne aqparattyq júıelermen jaraqtandyrý boıynsha máselelerdi sheshýdi tapsyrdy. Bul baǵytta Atyraý, Mańǵystaý, Pavlodar oblystarynda jumys sapaly túrde uıymdastyrylǵan.
Azamattardy medısınalyq saqtandyrý júıesimen qamtýdy arttyrýǵa jekelegen kóńil bólý tapsyryldy. Ol úshin ózin-ózi jumyspen qamtyǵan turǵyndardy formalızasııalaý boıynsha jumystardy aıaqtap, tegin medısınalyq kómektiń kepildendirilgen kólemi men MÁMS boıynsha habardarlyq deńgeıin kóterý qajet.
«Árbir azamat memleket tarapynan kepildik retinde qandaı medısınalyq kómektiń tegin kórsetiletinin naqty bilýi tıis, — dedi A. Mamın. — Medısınalyq kómektiń qoljetimdiligi men sapasy máselesi bárimiz úshin asa mańyzdy».
Otyrys aıasynda «Qazaqstan Respýblıkasynyń Úkimeti týraly» Konstıtýsııalyq zańǵa sáıkes Úkimet quramyna alǵash ret qosylǵan mınıstrler: bilim jáne ǵylym mınıstri A. Aımaǵambetovtiń, mádenıet jáne sport mınıstri A. Raıymqulovanyń, ekologııa, geologııa jáne tabıǵı resýrstar mınıstri M. Myrzaǵalıevtiń ant berý rásimi ótti.
