Rýhanııat • 18 Maýsym, 2019

Qarttarym, aman-saýmysyń?

200 retkórsetildi

Gazetimizdiń júz jyldyǵy aıasynda qolǵa alynǵan ıgi ister elordadaǵy «Sharapat» áleýmettik qyzmet kórsetý ortalyǵynda jalǵasyn tapty. Ortalyq kitaphanasyna júzdesýge jınalǵan qarııalardyń qolyndaǵy «Egemen Qazaqstan» kózimizge jyly ushyrasty.

1989 jyly «Qarttar úı» bolyp ashylǵan mekeme 2016 jyly áleýmettik kómekti qajet etetin jandarǵa shýaǵyn shashar «Sharapat»-qa aınalǵan. Ortalyqta 24 pen 96 jas aralyǵyndaǵy 320 adam qyzmet alady. Qyzmet alýshylardyń qatarynda elge eńbek etken eleýli professorlar da, sot júıesinde jemisti jumys istegen, túrli salanyń maıtalman mamandary da bar. Ortalyq dırektory Rysty Jaǵyparqyzynyń aıtýynsha, jas kómek alýshylar – kóbine I, II top múgedekteri. «Bul ǵımarat – Elbasynyń ózi kelip lentasyn qıǵan, zamanaýı jabdyqtalǵan, jylýlyq úıi. Biz medısınalyq, áleýmettik, psıhologııalyq, qarjylyq kómek kórsetemiz. Medısına blogymyzda fızıoterapııalyq qyzmet alýǵa bolady. Budan bólek massaj bólmesi, saýna, meshit, shirkeý, basseın bar. Azamattarymyz 4 mezgil tamaqtanady», deıdi mekeme basshysy. R. Jaǵyparqyzynyń sózine sensek, atyn aıtpaı qaıyrymdylyq is isteıtin júregi jomart jandar jeterlik. Aıtalyq, bir kásipker úsh birdeı shaǵyn jylyjaı salyp berse, endi bir qoly ashyq azamattar ramazan aıynda oraza ustaǵan 30 musylmanǵa kún saıyn aýyzashar jasapty.

Bir-birimen shúıirkelese ketetin sharapattyqtar bir shańyraq astynda kóńil jarastyryp, keıbiri tipti budan bylaıǵy ómirin birge ótkizýge bel baılapty. Qazir ortalyqta 17 otbasy kún keshedi. Bul da bolsa, mekemeniń – osy jerden kómek alýǵa kelgenderge jańasha ómir syılaıtyn sharapaty mol shańyraq ekenine dálel.

Kezdesýge kelgen qarttar júz jyldan beri halyqpen birge jasap kele jatqan gazetimizdiń qysqa da nusqa tarıhymen tanysty, qazirgi tirshiliginen habardar bolyp, óz oılarymen bólisti. Gazetimizdegi «Mádenıet jáne rýhanııat» bóliminiń jetekshisi Talǵat Batyrhan qazaq baspasóziniń aınasy, kóshbasshysy bolǵan bas basylymnyń atynan «Júz jyldyq jylnama» atty mereıtoılyq jınaǵymen qosa birneshe kitaptardy ortalyqtyń kitaphanasyna syıǵa tartty. Basylym basshylyǵy men uıyǵan ujymnyń ystyq sálemin jetkizgen jetekshimiz bar taraptaǵy jańalyqtyń jarshysyna aınalǵan gazet eldiń máselesin ekshep, ulttyń sózin ustaıtynyn aıtty.

Egemendikter jyly júzdesýdegi ádemi áńgimeni óleńmen órnektedi, qarttardyń salıqaly sózin ánmen árlep, kúımen kómkerdi. Kezdesý sońynda qarııalar «Egemen Qazaqstan» ujymyna telegeı tabys tilep, batasyn berdi.

Sońǵy jańalyqtar

Mańǵystaýda «ANTIKOR ORTALYGY» ashyldy

Rýhanııat • Búgin, 11:38

Tennıs: Elena Rybakına fınalda

Tennıs • Búgin, 08:52

Basty aqparat (21.02.2020)

Vıdeo • Keshe

Uqsas jańalyqtar