Sońǵy eki jylda Atyraýda ólim-jitim kórsetkishi tómendedi. Al ómir súrý uzaqtyǵy – 73,22 jasqa jetip, burynǵy deńgeıden biraz ósti. Sonyń ishinde analar óliminiń 52 paıyzǵa azaıǵany halyq densaýlyǵyn jaqsartýǵa baǵyttalǵan sharalardyń nátıjesiz emes ekenin kórsetedi. Oblystyq densaýlyq saqtaý basqarmasynyń basshysy Mánshúk Aımurzıeva: «Medısınalyq mekemelerdi qazirgi zamanǵy tehnologııamen qamtamasyz etý jumysy jalǵasyn tabýda. Bıyl jergilikti bıýdjetten arnaıy qarjy qaralyp, aýdandyq aýrýhanalarǵa jyljymaly medısınalyq keshen, narkozdy tynys alý apparaty, sıfrly rentgen, fetaldy monıtor apparattary sekildi basqa da zamanaýı qural-jabdyqtar satyp alyndy. Ońaltý jáne medbıkelik kútimdi damytý, ftızıopýlmonologııalyq sanatorıı ashý da bıylǵy josparda bar. Tórt aýdanda erekshe balalardy ońaltýǵa arnalǵan bólimder ashylady», deıdi.
Medısınalyq mekemelerdiń jańa jabdyqtarmen tolyǵýy qashanda nazarda. Búginde Atyraýdaǵy emdeý uıymdarynda sońǵy úlgidegi qural-jabdyqtardyń qatary kóp. Kúni keshe oblystyq perınataldyq ortalyqqa taǵy bir jańa apparat alyndy. Elbasynyń bıznestiń áleýmettik jaýapkershiligi týraly tapsyrmasy aıasynda «EksonMobılQazaqstanInk» kompanııasy ókpege jasandy jeldetý jasaý qurylǵysyn syıǵa tartty. Oblystyq densaýlyq saqtaý basqarmasynyń bólim basshysy Gúlnafıs Tańbaevanyń aıtýynsha, perınataldyq ortalyqta orta eseppen aıyna 160 ota jasalady. Endi ota kezinde ókpeni jasandy jeldetetin qurylǵy daıyn turady, bul óz kezeginde ana men bala densaýlyǵyna oń yqpal etetin jaıt. Jalpy, munaıly aımaqta iri óndiristik kásiporyndar densaýlyq saqtaý mekemelerine jıi demeýshilik kórsetedi. Mysaly, joǵaryda atalǵan bir ǵana kompanııa buǵan deıin shala týǵan nárestelerdi kútip-baǵý jabdyǵyn, qursaqtaǵy sábıdiń jaǵdaıyn baqylaıtyn fetaldy monıtorlar men 11 jedel járdem kóligin syıǵa tartqan.
Prezıdent Qasym-Jomart Toqaev: «Biz muǵalimder men dárigerlerdiń mártebesin kóteretin jańa zańdar qabyldaımyz. Olardyń quqyǵyn qorǵap, materıaldyq jaǵdaıyn jaqsartý úshin tıisti qoldaý kórsetemiz», dedi. Memleket tarapynan bıýdjettik sala qyzmetkerlerine kórsetiletin qoldaý sharalarynyń aıasy keńeıetini aımaqtaǵy mamandardyń da erteńge degen senimderine, adal jumys isteýge degen qulshynystarynyń artýyna oń yqpalyn tıgizeri anyq. Al jergilikti deńgeıde qandaı jumystar atqarylady? Oblystyq densaýlyq saqtaý basqarmasynyń basshysy Mánshúk Qudaıbergenqyzy ýchaskelik medısına qyzmetkerleriniń eńbek-aqysyn 20 paıyzǵa ósirý kózdelip otyrǵanyn aıtady. Bıyl aýyldardaǵy medısınalyq mekemelerdi qarjylandyrýǵa 6 949,2 mln teńge bólingen. Jyl sońyna deıin 5 ambýlatorııalyq-emhana uıymy, 1 aýrýhana paıdalanýǵa beriledi. 2025 jylǵa deıin oblysta 29 aýyldyq ambýlatorııalyq emhana uıymy men bir aýrýhana salý josparlanǵan. Munyń bári shalǵaıdaǵy aýyl turǵyndaryn sapaly, qoljetimdi medısınalyq qyzmetpen qamtamasyz etýge baǵyttalǵan sharalar. Densaýlyq saqtaý uıymdarynda bir dárigerge júktelgen jumys aýqymyn azaıtý qolǵa alynýda. Talap boıynsha bir dárigerge belgilengen adam sany 1700-den aspaýy tıis, al aımaqta bul deńgeıge qol jetkizý úshin áli 88 jalpy tájirıbeli dáriger qajet. Jasyratyny joq, Atyraýda dáriger tapshylyǵy máselesi kún tártibinen túspeı keledi. Qazirdiń ózinde alystaǵy aýyldar 30 medısına mamanyna muqtaj. Oblys ákimi Nurlan Noǵaev jyl basynda Inder aýdanyna barǵan issapar barysynda: «Medısına salasyna tapshy mamandardy aldyraıyq jáne olar mindetti túrde baspanamen qamtamasyz etilýi kerek. Jergilikti bılik medısına qyzmetkerlerine barlyq jaǵdaıdy jasaýǵa daıyn» dep atap ótken bolatyn. Osy problemany sheshý maqsatynda oblystyq ákimdik tarapynan naqty sharalar qolǵa alyndy. Bıyl elimizdegi medısınalyq oqý oryndarynyń 214 túlegi Atyraýǵa jumysqa keledi dep kútilýde. Demek, aýrýhanalardyń aq halattylarmen tolyq qamtylatyn kúni de alys emes.
ATYRAÝ
