Embilik munaıshylar syılaǵan baspanalar segiz otbasyny baqytqa bóledi

Muqtaj janǵa kómek be­rip, qınalǵanǵa súıeý bolýdy azamattyq mindet dep bil­gen halqymyz qaı zamanda da jaqsylyqtyń baǵasyn joǵa­ry qoıady. Bul úrdis búgin de umyt qalǵan joq. Ramazan aıyn­da «Embimunaıgaz» AQ bas­qarma tóraǵasy Ánýar Jaq­sybekovtiń ujymǵa úndeý ja­rııa­­lap, bir kúndik jalaqy ese­binen qamqorlyqqa zárý ot­basylarǵa qolushyn sozýǵa shaqyr­ǵany da sol kópti kórgen kóre­gendiktiń belgisi. Qashanda ıgi isterge qoldaý tanytyp jú­re­tin embilik munaıshylar bul bastamadan qalys qalmady, biraýyzdan qoldady. Sol birlik­tiń arqasynda oblystyń bes aýdanyndaǵy qamqorlyqqa zárý otbasylarǵa turǵyn úıler tabystaldy. Jańa baspana kiltin ıelenetinderdi tańdap-tarazylaý da ońaıǵa soqqan joq. Arnaıy komıssııa qurylyp, eki apta boıy aýdandardaǵy kómekke muq­taj jandardyń jaǵdaılary zer­delendi, nátıjesinde segiz otba­syna úı satyp alyp berý týraly sheshim qabyldandy.

Alǵashqy baspanany Qurman­ǵazy aýdanynyń orta­lyǵy Qur­man­ǵazy aýylynda alty bala tárbıelep otyrǵan Vıktor Kım­niń otbasy enshiledi. Úsh bólmeli úıdiń kiltin tabystaǵan «Embimunaıgaz» AQ basqarma tóraǵasy Ánýar Jaqsybekov: «Bıyl naýryz aıynda Premer-Mınıstrdiń orynbasary Gúl­shara Ábdiqalyqova men Eńbek jáne halyqty áleý­mettik qorǵaý mınıstri Berdi­bek Saparbaev aımaqqa arnaıy saparlary barysynda iri óndi­ris oryndarynyń basshylarymen, bıznes ókil­deri­men kez­desti. Sol kezde áleýmet­tik ja­ǵy­nan az qamtylǵan otba­sylar­dy qol­dap, turǵyn úı máselelerin sheshýge kómektesý máselesi qoz­­ǵal­dy. Osyǵan oraı ózim je­tek­­shilik etetin ujymǵa Ramazan aıy qarsańynda bir kún­dik jalaqylary esebinen muq­taj jandarǵa qolushyn sozý jó­ninde úndeý tastadym. Embilik munaıshylar meniń úndeýime biraýyzdan qoldaý kórsetip, nátı­jesinde biraz qarajat jınaldy. Mine, ujym birliginiń arqasynda 8 kóp balaly otbasy baspanaly bolyp otyr», – dedi. Buǵan deıin basybaıly baspanalary bolmaǵan aýyl turǵyndary armandarynyń bir-aq kúnde oryndalǵandaryna qýanyshtaryn jasyra almady.

Ekinshi úı Isataı aýdanyn­­daǵy Isataı stansa­synda be­ril­di. Kóp balaly Baýyr­jan Súleımenovtiń otbasy bar­lyq­ jaǵdaıy jasalǵan jańa pá­ter­ge qonys aýdardy. On ba­la­ tárbıelep otyrǵan Súleı­me­­nov­­terdiń shańyraǵy osy­­­­laı­sha shattyqqa toldy. Aýyl áki­mi Ulbolsyn Hısym mu­naı­­­­shylardyń jaqsylyǵyna jer­­­­gilikti turǵyndar atynan rızashylyǵyn bildirdi.

Isataı aýdanynyń ortalyǵy Aqqystaý selosynda da bul kúni qonys toıy toılandy. Kóp balaly Arman Orazaqov densaýlyǵyna baılanysty jumyssyz, jubaıy bala tárbıesimen úıde otyr. Otbasynyń qıyn jaǵdaıyn eskergen embilikter tolyq jón­deý­den ótken úsh bólmeli baspanany tartý etti.

Oblys ortalyǵynan shal­ǵaı­da ornalasqan Qyzylqoǵa aýdany da «Embimunaıgaz» kom­panııasynyń nazarynan tys qal­ǵan joq. Muqyr aýylyndaǵy úsh balaly jalǵyzbasty ana Aq­ma­ral Bákisheva men Jamansor eldi­­ mekenindegi jalǵyzbasty áke Esen­baı Ersaıyn jańa qonysqa ıe boldy. Aqmaral buǵan deıin aýyl­daǵy apatty jaǵdaıda tur­ǵan eski úıdi panalap kelse, Er­saıyn Esenbaı eki kishkentaı qyzymen aǵaıyndarynyń úılerin jaǵalap júrgen.

Turǵyn úı tapsyrý saltanaty Jylyoı aýdany orta­ly­ǵy Qulsary qalasynda jal­ǵasyn tapty. Bes balany bir ózi tárbıelep otyrǵan G.Qara­mol­dıeva munaıshylarǵa alǵy­syn aı­typ, qýanyshtan janaryna jas aldy.

Bir aptaǵa sozylǵan qaıyrym­dylyq sharasy Maqat aýdanynda márege jetti. Kóp balaly analar G.Ábdenova men A.Seıitova embilik munaıshylardyń kó­me­gimen jańa úıge kóshti. Pá­ter kiltin tabystaǵan kompa­nııa basshylyǵy barlyq otbasylarǵa azyq-túlik qorynan da kómek uıymdastyrdy. Munaı­shylar­dyń bul syıy jańa úıge kirgen otbasylarǵa ǵana emes, aýyldas­tary úshin de qýanyshty merekege aınaldy. Shashý shashyp, qonys toıǵa qutty bolsyn aıtyp kelýshiler qatary sıremedi. Aýyl-eldiń arasyn jaqyndatyp, bereke-birlikke úndeıtin mundaı qaıyrymdylyq sharalarynyń tárbıelik máni de zor ekenin ańǵardyq.

ATYRAÝ