Elimizde azamattar men uıymdarǵa 98 myńǵa jýyq memlekettik qyzmetshi qyzmet kórsetedi. Onyń ishinde 4 myńy Nur-Sultan qalasynda eńbek etedi. Bir qyzyqty jaıt, 90-jyldary jastar bızneske umtylǵan bolsa, kelesi onjyldyqta bul vektor aýysyp, jastar óz bolashaǵyn kúsh qurylymdaryndaǵy jumyspen baılanystyrdy. Endi, mine, jańa onjyldyqta memlekettik qyzmetke kelgisi keletin jastardyń sany artyp keledi. Sebebi memlekettik qyzmet – turaqtylyq, qazirgi daǵdarystardyń tolqyndarynda nyq senimdiliktiń kepili.
Bolashaqta el tizginin ustaıtyn azamattar – búgingi jastar. Munyń birden-bir dáleli – Nur-Sultan qalasy boıynsha memlekettik qyzmetshilerdiń 36%-y 29 jasqa deıingi jastar. Olardyń sany ǵana emes, sapasy da ósip jatyr. Iаǵnı, bilimdi, alǵyr, básekege qabiletti jastardyń qatary artty. Qazirgi tańda elordada 19 qyzmetker «Bolashaq» baǵdarlamasynyń túlegi, 30 qyzmetker Qazaqstan Prezıdenti janyndaǵy Memlekettik basqarý akademııasyn bitirgen. Bizdiń departamentte de bilimderin jetildirýge qushtar jas qyzmetkerler kóbeıip kele jatqanyn maqtanyp aıtýǵa bolady. Bıyldyń ózinde eki mamanymyz muhıt asyp, Amerıka Qurama Shtattaryna «Bolashaq» baǵdarlamasymen oqýǵa attandy.
Jyl basynan bastap tómengi 45 laýazymǵa konkýrs jarııalanyp, 518 azamat qatysýǵa nıet bildirdi. Iаǵnı, 1 orynǵa 12 azamattan kelip tur. Bul memlekettik qyzmetke degen suranystyń artqanyn kórsetedi.
Zańsyz kadrlyq sheshimderdi boldyrmaý úshin merıtokratııa qaǵıdaty engizildi. Ol adamnyń qoǵamdaǵy orny áleýmettik jaǵdaıymen emes, onyń qabiletterimen jáne sińirgen eńbegimen anyqtalatyn júıeni sıpattaıdy. Nur-Sultan qalasy ákimdiginiń ózinde merıtokratııa qaǵıdaty boıynsha atqarǵan jumysynyń tıimdiligi negizinde mansap jolynda tómengi laýazymnan basshy laýazymǵa deıin kóterilgen Qoǵamdyq damý basqarmasy basshysynyń orynbasaryn, Esil, Saryarqa aýdandary ákimdikteriniń qyzmetkerlerin atap ótýge bolady.
Búginde elordada memlekettik qyzmetke ornalasý boıynsha júrgizilip jatqan konkýrstarda 100 paıyz baqylaýshylar qatysyp, olardyń obektıvti ótýin qamtamasyz etip otyr. Memlekettik qyzmetke jańadan kelgen qyzmetkerge jańa jumys ornynda, beıtanys ortada, ózine qoıylǵan talaptar men mindetterdi birden kirisip, qarqyndy alyp ketý ońaı bolmaıtyndyǵy belgili. Sondyqtan alǵashqy ýaqytta memlekettik qyzmettiń qyr-syryn úıretetin, tıisti kómek kórsetetin tálimger ınstıtýty memlekettik qyzmet júıesine engizilip, óziniń oń nátıjelerin berýde. Bul turǵyda Nur-Sultan qalasy boıynsha jergilikti atqarýshy organdar belsendi jumystar júrgizip, tájirıbeleri mol memlekettik qyzmetshiler qyzmetke alǵash kelgen azamattarǵa baǵyt-baǵdar berip otyr.
Təjirıbe almasý jəne kəsibı biliktilikti arttyrý maqsatynda memlekettik qyzmetshilerdiń kvazımemlekettik sektorda taǵylymdamadan ótýi uıymdastyrylyp keledi. Jalpy, tájirıbe almasý mamannyń kásibı deńgeıin arttyrýǵa kómektesedi, bul – tek qyzmetker úshin ǵana emes, memlekettik organ úshin de óte mańyzdy. Jyl basynan Nur-Sultan qalasy boıynsha kvazımemlekettik sektorda 22 memlekettik qyzmetker taǵylymdamadan ótti.
Qazaqstanda əlemdik təjirıbege negizdelse de, aıryqsha belgileri men qurylymy bar memlekettik qyzmettiń ózindik modeli júzege asyrylyp jatyr. Bul rette faktorlyq-baldyq shkala negizinde túbegeıli jańa eńbekaqy tóleýdiń qanatqaqty júıesiniń jasalýyn atap ótý kerek. Tıimdi ári nátıjeli jumys úshin ádil syıaqy berýge baǵyttalǵan júıe qazirgi kúni oń nátıjesin kórsetýde.
Nur-Sultan qalasynyń ákimdigi turǵyndar úshin qolaıly qalany qalyptastyrý jáne memlekettik basqarýdyń ashyqtyǵyn qamtamasyz etý baǵytynda aýqymdy jumystar atqaryp jatyr. Atap aıtqanda, Elbasynyń memlekettik basqarýdyń tıimdi tetigin qurý jóninde bergen tapsyrmasyn oryndaý úshin qurylymdyq bólimshelerge muqııat fýnksıonaldyq taldaý júrgizildi. Sonyń nátıjesinde ákimdikte transformasııa júrgizilip, bıznes-prosesterdi ońtaılandyrý jáne memlekettik qyzmetti sıfrlandyrý sharalary qabyldandy. Tek sońǵy 10 jylda elorda turǵyndarynyń sany 2 esege kóbeıip, al ákimdiktiń shtattyq sany 10%-ǵa qysqardy. Transformasııa nátıjesinde ákimshilik personaldy qysqartý arqyly negizgi laýazymdar 2 esege kóbeıtilip, basqarma sany 24-ten 17-ge ońtaılandyryldy, basshy laýazymdardyń qysqarý nátıjesinen 151 mln teńge únemdeldi. Búgingi tańda negizgi fýnksııalardy – 80% qyzmetker, al ákimshilik fýnksııalardy 20% qyzmetker oryndaýda. Nur-Sultan qalasy ákimdiginiń transformasııalaý júıesi sátti iske asyrylyp, basqa da óńirlerge úlgi retinde taratylýda.
Sonymen qatar «Astana – adaldyq alańy» jobasy aıasynda «iQala» qalalyq qyzmetter ortalyǵy ashyldy. Ortalyq – qala turǵyndary men bılik ókilderiniń arasyndaǵy qarym-qatynastyń jańa formaty. Atqarýshy organdar men kommýnaldyq jáne mýnısıpaldyq qyzmetterdiń, kásipkerlikti damytý jáne qoldaý ınstıtýttarynyń qyzmetterin bir jerge toǵystyryp, turǵyndarǵa «bir tereze» qaǵıdaty boıynsha qyzmet kórsetedi. «iQala» jumysynyń nátıjesi – elordalyq uıymdar usynatyn qyzmetterdiń tıimdiligin arttyrý, qyzmetter alýdy jeńildetý, tutynýshyǵa baǵdarlanǵan prosesterdiń ashyqtyǵyn qamtamasyz etý.
Qazaqtyń uly jazýshysy Muhtar Áýezovtiń «Qaı istiń bolsyn ónýine úsh túrli shart bar. Eń áýeli nıet kerek, odan soń kúsh kerek, odan soń tártip kerek» degenindeı, memlekettik qyzmetshilerdiń kásibıligi olardyń jurtshylyq aldyndaǵy memlekettik basqarý organdarynyń ımıdjin anyqtaıtyn minsiz minez-qulyqtarymen qatar júrýi kerek. Memlekettik qyzmetti damytý boıynsha jumystar jalǵasa beredi. Memlekettik organdardyń qajyrly eńbegi, memlekettik apparattyń ashyqtyǵy eldiń damýyna zor áser etedi.
Jazıra JYLQYShIEVA,
Memlekettik qyzmet isteri jáne sybaılas jemqorlyqqa qarsy is-qımyl agenttigi
Nur-Sultan qalasy boıynsha departamentiniń basshysy
