Ahmetjan Esimov Atyraý mańynda salynyp jatqan «Kazakhstan Petrochemical Industries» atty gaz-hımııa keshenin aralap, keshendegi menedjment aýysqannan keıingi qurylys barysyn oń baǵalaǵan. Qazirgi tańda polıpropılen zaýytynyń qurylys qarqyny 34%-dy quraıdy. Al 2017 jyldyń 27 qarashasy men 2018 jyldyń 28 maýsymy aralyǵynda jobanyń júzege asyrylý jyldamdyǵy nebári 6% bolatyn.
«Qazir zaýyttyń bas jospary men tehnologııalyq syzbasy ázirlengen. Jospar boıynsha, joba qurylysy 2021 jyldyń ortasyna qaraı tolyq aıaqtalady», – dep habarlady qordyń baspasóz qyzmeti.
Sonymen qatar «Samuryq-Qazyna» basshysy «Qashaǵan» ken ornyndaǵy teńiz kesheni aralyn aralap, nysannyń qazirgi jaǵdaıynan habardar boldy. Keshendi jóndeýden ótken Qashaǵannan qazir alynyp otyrǵan munaı kólemi kúnine 400 myń barrelge jetken.
Byltyr ken orny jylyna 11,3 mln tonna munaı alý josparyn alǵa qoıǵan. 2018 jyly jospardy asyra oryndaǵan «Qashaǵan» qyzmetkerleri byltyr 13,2 mln tonna munaı óndirdi.
Sapar aıasynda Ahmetjan Esimov Mańǵystaý oblysynyń ákimi Serikbaı Trumovpen kezdesip, Qordyń kompanııalar tobymen aradaǵy ózara yntymaqtastyq týraly keńes ótkizdi. Aıta keterligi, Qorǵa qarasty ulttyq kompanııalar Mańǵystaý oblysy bıýdjetiniń 38%-dan astamyn qalyptastyryp otyr.
