Qoǵam • 21 Maýsym, 2019

Bas pedagog aq jol tiledi

219 retkórsetildi

Ulttyq biryńǵaı testileýdiń ekinshi kúni ótýde. Oǵan respýb­lıka boıynsha 13 myń úmitker qatysyp jatyr. Keshe Bilim jáne ǵylym mınıstri Ashat Aımaǵambetov Eýrazııa ulttyq ýnıversıteti ǵımaratyndaǵy testileý pýnktine kelip, talapkerlerge sáttilik tiledi.

Elimiz boıynsha barlyǵy 169 tes­ti­leý pýnkti jumys isteıdi. Elor­dadaǵy joǵary oqý ornyna at basyn burǵan vedomstvo basshysy: «Bıylǵy UBT-ny bastaıtyn birin­shi lekke sáttilik tilep kelip otyr­myn. Men 10 jyl boıy testileý ótkizý rási­mine qatystym. Baıqasaq, balalar jyldan-jylǵa baısaldy bolyp ke­le­di. Bıyl tekseristen ótkizý bary­synan bastap baqyladym, sonda olar­dyń salmaqty, kóńildi boldy. Bul – UBT ótkizýdi jetildirýge baǵyttal­ǵan 4 rettik tapsyrý múmkindiginiń nátıjesi. Úmitker sanasyndaǵy bir emes, birneshe múmkindiktiń baryna degen senimdilik psıhologııalyq jaı-kúıin retteýge yqpal etetini sózsiz», dedi.

Onyń aıtýynsha, bıyl bitirgen barlyq 134 myń mektep túleginiń 115 myńy qańtar, naýryz aılarynda ótkizilgen UBT-da baq synady. Olardyń alǵan sertıfıkaty eli­mizdegi JOO-lardyń aqyly oqý bóli­mine túsýge de múmkindik beredi.

Elimizdiń bas pedagogy: «Bul – úlken emtıhan. Sondyqtan qobal­jymaı, asyqpaı, mektepte 11 jyl boıy úırengenderińizdi oılap, esh­qandaı tyıym salynǵan zattardy paı­dalanbaı, shyn bilimdi kórsetip, abyroımen alyp shyǵady dep senemin. Bıik shyńdardy baǵyndyryp, elimiz­diń damýyna úles qosatyn azamat bolý­lary­ńyzǵa tilektespin!» dedi talapkerlerge.

Aıta keteıik, maýsymdaǵy UBT-da shekti ball jınaı almaǵandar tamyz aıyn­daǵy testileýge qatysa alady, bi­raq bul múmkindik sertıfıkatty jón­dep alýǵa ǵana berilgen. Ondaǵy nátı­jemen, meıli ol maýsymdaǵy qo­ry­tyn­dydan eki-úsh ese joǵary bolsyn, tek aqyly negizdegi oqýǵa túse alady.

A.Aımaǵambetov bıyl memleket bakalavrıatqa 53 758, magıstratýraǵa 13 000, doktorantýraǵa 2312 grant bólingenin aıtty. Biz gazetimizdiń ótken sanynda bakalavrıatqa 51 myńnan asa grant bólingenin jazǵanbyz. Oǵan medısına mamandyqtaryn­daǵy oryn sanynyń áli qosylmaǵa­nyn esterińizge salamyz. Bolashaq dári­gerlerge memlekettik bilim berý grant­­­taryn keıinirek Densaýlyq saq­taý mınıstrligi belgileıdi.

«Balasy atqa qonsa, anasy taqy­myn qysady», degen sóz bar qazaqta. Búgingi qoǵam arasynda, ásirese ata-analar úshin UBT bilim báıgesi syndy. Dına Berdibekqyzynyń balasy astanamyzdaǵy №54 mektepti bitirgen. UBT-dan balasynyń jaqsy nátıjege qol jetkizýin kútetinin aıtqan ana: «Balamnyń bilimge degen qushtarlyǵy joǵary. Kishkentaı kezinen bilim saıystaryna qatysyp, maqtaý qaǵazdarymen marapattalyp keledi. Balamnan úlken úmit kútemin, testileýden jaqsy nátıje kórsetýin qalaımyn. Bastysy, egemen Qazaqstanymyzdyń damýyna úlesin qosatyn azamat bolsa eken deımin. Balam UBT-ǵa erekshe den qoıyp daıyndaldy. Ol aǵylshyn, qytaı tilderinen qo­sym­sha kýrstarǵa da qatysty», deı­di. Onyń aıtýynsha, balasy akter maman­dyǵyn, ıaǵnı óner salasyn tańdap otyr. Mektep qabyrǵasynda júrgende túrli rólderdi somdaǵan kórinedi. Ata-ana balasynyń basqa salaǵa bet burǵanyn qalaǵanymen, perzentiniń qalaǵan mamandyǵyn ózi tańdaýyna erik beripti. О́ıtkeni árkim erteńgi ómirine ózi jaýapty bolýy kerek.

Al bolashaqta zańger bolýdy qalaıtyn Oralbaı Janat 11-synypqa kóshkeli beri UBT-ǵa turaqty túrde daıyndalǵanyn aıtady. Barlyq bilim qoryn jınaqtap, testileýge kelipti. Sondyqtan eń joǵary 140 ball alýdan úmitti. «О́zime senip keldim. 11 jyl jınaǵan bilimimniń nátıjesin búgin bilemin. Keleshekte quqyq qorǵaý salasynda qyzmet etkim keledi. Bar­lyq úmitkerlerge sáttilik tileımin!», deıdi Oralbaı.

Sońǵy jańalyqtar

Mańǵystaýda «ANTIKOR ORTALYGY» ashyldy

Rýhanııat • Búgin, 11:38

Tennıs: Elena Rybakına fınalda

Tennıs • Búgin, 08:52

Basty aqparat (21.02.2020)

Vıdeo • Keshe

Uqsas jańalyqtar