Parlament Senaty Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev sharany asha kelip, Qazaqstan kólik logıstıkasyn damytý arqyly Ortalyq Azııa óńiri arqyly ótetin tıimdi jáne qaýipsiz baǵyt retinde halyqaralyq deńgeıde tanylǵanyn atap ótti. Bul rette Ortalyq Azııanyń, Eýropa men Afrıkanyń 60-tan astam elin baılanystyratyn ári iske qosylǵan saýda-kólik dálizderin jetildiretin jáne jańa dálizderdi qalyptastyratyn «Bir beldeý, bir jol» halyqaralyq jobasynyń iske asýy Qazaqstannyń kólik-logıstıkalyq júıesiniń damýyna zor yqpal etkeni aıtyldy.
Sonymen qatar senator Tuńǵysh Prezıdenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Qazaqstan halqyna Joldaýyn iske asyrý aıasynda Parlamenttiń kólik salasyndaǵy zańnamany jetildirý jónindegi el ekonomıkasynyń tıimdi damýyn qamtamasyz etýdi kózdeıtin jumystaryn atap ótti.
Dóńgelek ústel otyrysynda ındýstrııa jáne ınfraqurylymdyq damý mınıstriniń orynbasary Berik Qamalıev elimizdegi kólik salasynyń qazirgi jaǵdaıy men ony damytý jospary týraly baıandama jasady.
Parlament Senaty Ekonomıkalyq saıasat, ınnovasııalyq damý jáne kásipkerlik komıtetiniń múshesi, Soltústik Qazaqstan oblysynan kelgen senator Erik Sultanov birqatar problemalyq máselelerdi atap ótti. Máselen, kólik-logıstıkalyq qyzmet kórsetý salasynyń edáýir jaqsarǵanyna qaramastan, avtoparkterdiń kóbi eskirgeni, bilikti kadrlardyń jetispeýshiligi, logıstıkalyq jeli men óńirlerdegi qoıma sharýashylyǵynyń kenje qalǵany aıtyldy. Odan basqa, temirjolǵa zııatkerlik júıeni engizý, konteınerlik tasymaldardy damytý, magıstraldyq temirjol jelileriniń tehnıkalyq jáne tehnologııalyq deńgeıin kóterý máseleleri sheshimin tappaǵany sóz boldy.
Shara barysynda qarjy mınıstriniń orynbasary Rýslan Beketaev, «Qazaqstan temir joly» ulttyq kompanııasy» AQ basshysy Qanat Álmaǵambetov, Qazaqstannyń «KAZLOGISTICS» kólikshiler odaǵynyń basshysy Iýrıı Lavrınenko sóz sóılep, elimizdiń kólik-logıstıka qyzmetin odan ári damytý jóninde atqarylǵan jumystardyń nátıjeleri týraly baıandady.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy, senator Asqar Beısenbaev dóńgelek ústeldi qorytyndylaı kelip, kólik-logıstıka júıesin damytý barysynda tasymaldaýǵa baılanysty jıyntyq shyǵyndardy tómendetý, otandyq kólik júıesiniń básekege qabilettiligin arttyrý, kólik-logıstıka salasyn damytýdyń ınnovasııalyq, áleýmettik jáne ekologııalyq salasyn kúsheıtýdi qamtamasyz etý qajet ekenin atap ótti.
Dóńgelek ústel qorytyndysy boıynsha usynystar ázirlenip, elimizdiń Úkimetine, jergilikti atqarýshy organdarǵa jáne basqa da múddeli uıymdarǵa jiberiletin boldy, sondaı-aq Senat depýtattarynyń budan bylaıǵy zań shyǵarý jumystary barysynda eskeriledi.
