Elordadaǵy sporttyq mereke tańǵy saǵat 09.00-de Ortalyq saıabaǵynda bastaldy. Merekege QR mádenıet jáne sport vıse-mınıstri Eldos Ramazanov, QR UOK sport Dıreksııasynyń dırektory Elsııar Qanaǵatov qatysty. Al eń basty qatysýshylar qatarynda elimizdiń jas sportshylary bar.
«Barshańyzdy Halyqaralyq Olımpıada kúnimen quttyqtaımyn. Qazaqstan atalǵan merekeni osymen 26-shy ret toılap otyr. Bizdiń elimizde olımpıadalyq sport túrleri qarqyndy damyp keledi. Sportshylarǵa qajetti qoldaý túgeldeı kórsetilýde. Bul kúnniń basty maqsaty – halyq arasynda Olımpıadalyq qozǵalys qundylyǵyn, sport pen salaýatty ómir saltyn nasıhattaý. Merekege kishkentaı sportshylardyń qatysyp jatqany qýantady. Barshańyzǵa sportta bıik belesterdi baǵyndyrýdy tileımin», - dedi QR mádenıet jáne sport vıse-mınıstri Eldos Ramazanov.
«Búgin búkil el bolyp Halyqaralyq Olımpıada kúnin atap ótip jatyrmyz. UOK pen Tımýr Asqaruly Qulybaevtyń, sondaı-aq, QR mádenıet jáne sport Mınıstrliginiń belsendi qoldaýynyń arqasynda elimizdegi olımpıadalyq qozǵalys tez qarqyn alýda. Bul sporttyq merekeni búkil álem halqy toılaýda. Kelesi jyly Tokıoda Olımpıada oıyndary ótetinin bilesizder. Búgin bizdiń merekege Japonııa Elshiliginiń ókilderi qatysyp, aldaǵy tórtjyldyq dodasy men japon halqynyń dástúrleri týraly qundy málimetter berdi», - dep atap ótti QR UOK sport Dıreksııasynyń dırektory Elsııar Qanaǵatov.
Kelesi jazǵy Olımpıada oıyndary Tokıoda ótedi. Sol sebepti, elimizdegi Olımpıada kúnin toılaýǵa Qazaqstandaǵy Japonııa Elshiligi de atsalysty. Olar Iıado boıynsha jetinshi dan ıegeri Nobýkadzý Onısıdi arnaıy shaqyrtyp, sheberdiń ónerin barshaǵa pash etti. Sondaı-aq, merekelik is-sharaǵa qatysýshylar japon halqynyń mádenıeti men dástúrlerinen habar alyp, aldaǵy oıyndardyń atmosferasyn jaqyndata tústi. Japondyq sheberler kımono kııý men japon kallıgrafııasynan birqatar sheberlik saǵattaryn ótkizdi.
«Men mundaı merekelik is-sharaǵa qatysqanym úshin óte qýanyshtymyn. Shyn júrekten barshańyzdy quttyqtaımyn. Aldaǵy jyly Japonııada Olımpıada oıyndary ótedi. Sol synǵa qatysý úshin sizderdiń jáne bizdiń eldiń sportshylary aıanyp qalmaıtyny anyq. Olımpıadaǵa qatysýdyń ózi úlken qýanysh ekeni sózsiz. Sizderge sáttilik tileımin. Búgin biz sizderdi elimizdiń mádenıetimen tanystyrý úshin birqatar sheberlik saǵattaryn ótkizdik», - deıdi Japonııanyń Qazaqstandaǵy Tótenshe jáne О́kiletti elshisi Tasýhıko Kasaı myrza.
Merekeni toılaýǵa jınalǵan qonaqtar Fitness Park Nur-Sultan komandasynyń nusqaýshylarymen birge arnaıy dene shynyqtyrý ótkizdi. Al meıram aıaqtalar tusta boks, djıý-djıtsý, zýmba, ıoga jáne kross-fıtten sheberlik saǵattary uıymdastyryldy.
«Mundaı mereke baryn eki jyl buryn estidim. Bári keremet ótti. Uıymdastyrý óte joǵary deńgeıde. Ásirese, balaqaılardyń kóńil-kúıi tamasha. Dene shynyqtyrý da óte kóńildi ótti. Olımpıada oıyndary degenimiz ne? Menińshe, bul búkil álemnen jınalǵan chempıondar dodasy. Meniń de Olımpıada qatysqym keledi. Sport meniń ómirim. Segiz jyldan beri kórkem gımnastıkamen shuǵyldanamyn. Qazir jasym 11-de. Nur-Sultan, Taraz, Almatyda ótken týrnırlerge qatystym», - deıdi jas gımnast Damılıa Isanova.
Al ońtústik astanamyzda dástúrli velojarys óz deńgeıinde uıymdastyryldy. Jarysqa qatysýshylar Toraıǵyrov pen Saıyn kóshelerinen bastap Ortalyq stadıonǵa deıingi aralyqty júrip ótti. Aıta keterligi, veloshabandozdar tek qana velojolaqta jarysqan soń, kóshe qozǵalysyna shekteý bolǵan joq. Jarys aıaqtalǵan soń qatysýshylar arasynda syılyqtar oınatyldy.
Olımpıada kúnine qatysýshylardyń barlyǵy Halyqaralyq Olımpıada komıtetiniń prezıdenti Tomas Bah pen Qazaqstan Respýblıkasy Ulttyq Olımpıada komıtetiniń basshysy Tımýr Qulybaevtyń qoly qoıylǵan dıplomdarmen marapattaldy.
Merekeni uıymdastyrýǵa Nur-Sultan men Almaty qalalarynyń ákimdigi qoldaý kórsetti.
Aıta ketelik, Halyqaralyq Olımpıada komıteti 1948 jyly Sankt-Morısede ótken HOK-tyń 42-shi sessııasynda 23 maýsymda Halyqaralyq Olımpıada kúnin ótkizý týraly sheshim qabyldady. Bul kúnniń tańdalýy de beker emes. 1894 jyldyń 23 maýsymynda HOK qurylǵan bolatyn. Dál sol kúni olımpıadalyq qozǵalystyń negizin salýshy, baron Per de Kýberten halyqaralyq atletıkalyq kongress aldynda tarıhı baıandama jasady.
