Qyzylorda oblysynan buralańdap shyqqan qasqa jol Jezqazǵan trassasyna jalǵasady. Eki oblystyń ortasyn bes júz shaqyrymǵa jýyq dala jalǵap jatyr. Marǵaý, mańǵaz dala jolaýshy úshin jyldyń qaı mezgilinde de synaq. Ortada shańytqan aıazda, aptap ystyqta janǵa saıa bolar tirek az. Biz mingen kólik quldılap batys betkeıge burylǵan. Jańa ǵana qoıansúıek, jyńǵyldan kóz súringen saıyn dalanyń bir túkpirinen kók kúnikeleri kúnge jarqyrap shaǵyn qalashyq shyǵa keldi. Japandaǵy qala. «QazTransGaz» AQ-nyń sý jańa kompressorlyq stansasy.
Osynda respýblıkamyzdyń gaz salasynyń mamandary 15 kásip boıynsha úzdikti anyqtaý úshin synǵa tústi. Elimizdiń 9 mln turǵynyn kógildir otynnyń rahatyna keneltip otyrǵan – gaz salasynyń mamandary. Myńdaǵan shaqyrymdyq jerge gazdy ysyrapsyz jáne eń bastysy, qaýipsiz jetkizý – asqan jaýapkershilikti talap etetin is. Qyzylorda oblysynda bas qosqan gaz salasynyń naǵyz sheberleri ózara baq synasyp, úzdikterdi anyqtady.
«Úzdik maman – 2019» baıqaýy jumysshy mamandyqtarynyń bedelin arttyrýda, gaz salasyndaǵy eńbek jetistikteri men ozyq tájirıbeni nasıhattaýda mańyzdy element bolyp tabylady. Ony ótkizý jumysshy mamandyqtary boıynsha oqytý men eńbekke ornalastyrý úshin jastardy tartýǵa da yqpal etedi.
Baıqaý eki kezeńnen turdy. Birinshisi, sáýir aıynda Jambyl oblysyndaǵy «Aqyrtóbe» jerasty gaz saqtaý qoımasynyń bazasynda tórt mamandyq boıynsha, «Munaı jáne gaz óndirý jónindegi operator», «Burǵylaýshy», «Burǵylaýshynyń kómekshisi» jáne «Uńǵymalardy zertteý jónindegi operator» mamandyqtary boıynsha ótken bolatyn.
Ekinshi, sheshýshi kezeń 11 mamandyqty qamtydy. Úsh kún boıy baıqaýǵa qatysýshylar óndiristik qaýipsizdikke qatysty suraqtardy bilýin qosa alǵanda, ózderiniń teorııalyq jáne praktıkalyq daǵdylaryn ortaǵa saldy.
«Qaraózek» kompressorlyq stansasynyń stadıonynda ótken saltanatty jıyndy ashqan «Intergaz Ortalyq Azııa» AQ bas dırektorynyń birinshi orynbasary, konkýrstyq komıssııa tóraǵasy Muhataı Shańbatyrov «Úzdik maman – 2019» baıqaýynyń basty maqsatyn jan-jaqty taldap berdi.
– Gaz ónerkásibiniń búkil damý tarıhy – erekshe tózimdi, batyl adamdardyń tabandylyǵy men erliginiń úlgisi. Gazshylar árqashan joǵary bedelge, zor qurmetke ıe bolyp keledi.
Búgin munda úzdikterdiń úzdigi bas qosyp otyr. Olar ózderiniń kásipqoı maman ekenderin óz fılıaldarynda qatań irikteýden ótip, dáleldegen jandar.
Ádilqazylardyń aldynda asa mańyzdy mindet tur. Ol – sizderdiń aralaryńyzdan eń laıyqtysyn tańdaý. Bizdiń atqaryp jatqan sharalarymyzdyń bári eń aldymen sizderdiń tabıǵı gazdy apatsyz tasymaldaý boıynsha óz mindetterińizdi burynǵydan da sapaly, bilikti oryndaýlaryńyz úshin baǵyttalǵan. Sizderge sáttilik tileımin! Tóreshiler men joldastaryńyzdyń aldynda kásibı bilimderińizdi barynsha kórsetýge tyrysyńyzdar! – dedi ol.
«Qaraózektegi» baıqaýǵa qatysqandar – buǵan deıin óz fılıaldaryndaǵy qatań irikteýden ótken kásibı mamandar. Olardyń biliktiligi elimizdiń osy saladaǵy jumysy úshin asa mańyzǵa ıe. О́ıtkeni sonaý Beıneý men Bozoıdan tartylǵan gaz magıstrali elimizdi kógildir otynmen qamtyp qana qoımaı, Qytaı sııaqty álemdegi eń áleýetti memleketke de eksportqa gaz shyǵarady. Al ol ońaı sharýa emes. Máselen, dánekerleýshi úshin úlken synaq bar. Qubyr boıynda ıneniń jasýyndaı tesik qaldyrylsa, ol úlken apattyń bastaýy bolmaq. Sol sııaqty, ár mamandyqtyń óz syry, óz qupııasy bar. Úzdik mamandar konkýrsynyń bir ereksheligi, júzden ozǵandar óz biliktiligin áriptesterimen bólisip, kásibı turǵyda ósýine alǵyshart jasaıdy.
Gaz salasy ardagerleriniń respýblıkalyq keńesiniń tóraǵasy Pavel Klımov sala eńbekkerleriniń kásibı jaǵynan eleýli ósip kele jatqanyn, joǵary kásibı mamansyz bul salada tabysqa jetý múmkin emestigin atap ótti.
Úzdikterdiń úzdigi qaı qurmetke de laıyq. Búginde «QazTransGaz» gaz jáne gazben jabdyqtaý salasynyń ulttyq operatory álemdegi eń ozyq jańa tehnologııalarmen, jańa qondyrǵylarmen jumys istep keledi. Bul kúrdeli qurylymdy tek biligi men bilimi myqty naǵyz sheberler ıgerip otyr.
Qyzylorda oblysy
