Aımaqtar • 25 Maýsym, 2019

Almaty jurty Arys turǵyndarymen birge

350 ret
kórsetildi
1 mın
oqý úshin

Arystaǵy aǵaıynnyń basyna túsken tosyn jaǵdaıdy Almaty jurtshylyǵy da kúızelispen qabyldady. Qala ákimi Baýyrjan Baıbek óziniń áleýmettik jelidegi paraqshasyna Almaty qalasy tarapynan qıyndyqqa tap bolǵan turǵyndarǵa jan-jaqty kómek kórsetý sharalary qolǵa alynǵandyǵyn jetkizdi.

Almaty jurty Arys turǵyndarymen birge

 «Arystaǵy qaıǵyly oqıǵa eshkimdi beı-jaı qaldyrmady. Barlyq almatylyqtardyń atynan qaza bolǵandardyń otbasylaryna kóńil aıtamyn, zardap shekkenderdiń tezirek saýyǵyp ketýin tileımin. Túrkistandyq áriptesterden saǵat saıyn habar alyp otyrmyz. Jýyq ýaqytta sement, esik-tereze syndy qajetti qurylys materıaldary tıelgen alǵashqy júk kólikteri Arysqa attanady», - delingen ákimniń jazbasynda.

Almaty qalasy ákimdigi qyzmetkerleri, qaladaǵy birqatar kásiporyndar men jekelegen ujymdar bir kúndik jalaqysyn aýdardy. «Men Almatylyqpyn» eriktiler qozǵalysynyń belsendileri kıim-keshek pen azyq-túlik, basqa da kerek-jaraqtarmen kómek kórsetýde belsendilik tanytýda. Sonymen qatar, «Nur Otan» partııasy qalalyq fılıalynyń bastamasymen zardap shekkenderge qaıyrymdylyq aksııasy bastaldy. Shahar kásipkerleri de óz birlikterin kórsetip, kúsh jumyldyrdy.