- О́skeleń urpaqqa patrıottyq tárbıe berý-búgingi ıdeologııa salasyndaǵy jumystyń basty baǵyttarynyń biri. Bul turǵyda áskerı daıyndyq erekshe oryn alady, sebebi árbir memlekette eldiń ishki jáne syrtqy qaýipsizdigin qamtamasyz etýge jeke kóńil bólinedi, - dedi №49 orta mekteptiń dırektory Gúlfarıza Toqtybaeva.
«Shyǵys» áskerı-patrıottyq klýby tárbıelenýshileriniń aıtýynsha, olar AK-74 avtomatyn bólshekteý jáne jınaý, jalpy áskerı qorǵanys jınaǵyn kııý boıynsha normatıvterdi oryndaý, zaqymdanǵan jer ýchaskesin eńsere otyryp, kedergiler jolaǵynan ótý, radıostansııamen jumystardy oryndaý sııaqty konkýrstarda úzdik nátıjeler kórsetken.
Sonymen qatar, jıyn barysynda jasóspirimder kúshtik jattyǵýlarda kúsh pen tózimdiligin synǵa salsa, al qyzdar keshendi kúshtik jattyǵýlardy oryndaýda saıysty, dedi «Shyǵys» óńirlik qolbasshylyǵy baspasóz qyzmetiniń jetekshisi, aǵa leıtenant Islambek Qaldybekov.
- Jastar jıynynyń arqasynda biz qyzyqty adamdarmen, tanymal qoǵam qaıratkerlerimen kezdesip, jańa dostar men tanystardy taptyq. Olarmen tanysqannan keıin men bizdiń elimizdiń ár aımaǵyndaǵy adamdardyń ártúrli ekenine kóz jetkizdim. Biraq bir nárse bizdi qýantady, bul barlyǵynyń óz Otanyna degen mahabbaty, - dep «Shyǵys» áskerı-patrıottyq klýbynyń tárbıelenýshisi Balǵyn Esentaeva da óz áserimen bólisti.
Jarysty jalpy komandalyq jáne jeke synaqta jeńimpaz atanǵan balalarǵa gramotalar, medaldar, kýboktar jáne estelik syılyqtar tabys etilgen.
Esterińizge sala keteıik, «Aıbyn» áskerı-patrıottyq jıyny elimizde jastardyń áskerı-patrıottyq tárbıesin jetildirý maqsatynda Jastar jyly aıasynda ótkizildi. Jıynǵa qatysýshylar Qazaqstan armııasynyń áskerı tehnıkasy men qarý-jaraǵynyń zamanaýı úlgilerin kórdi.
«Shyǵys» óńirlik qolbasshylyǵy baspasóz qyzmetiniń jetekshisi, aǵa leıtenant Islambek Qaldybekovtyń aıtýynsha, uıymdastyrýshylar Aibyn jalyny alaý jaǵý rásimin de ótkizgen eken. Onda jıynǵa qatysýshylar Qorǵanys mınıstrliginiń ókilderimen, Qaraǵandy oblysy ákimdiginiń basshylyǵymen, sondaı-aq «Golos Detı» konkýrsynyń qatysýshysy Erjan Maksımmen, shahmattan bes dúrkin álem chempıony Bıbisara Asaýbaevamen, mentaldyq arıfmetıkadan álem chempıony A.Mahmettermen kezdesip, erekshe rýhanı kúsh-qaırat alyp qaıtypty.
Raýshan NUǴMANBEK,
«Egemen Qazaqstan»
