Jıynda Túrkistan oblysynyń Arys qalasyndaǵy qazirgi ahýal jáne elimizdiń sý qaýipsizdigin qamtamasyz etý máseleleri talqylandy.
Qaýipsizdik keńesiniń Tóraǵasy Arys qalasynda qaza bolǵandardyń týystary men jaqyndaryna kóńil aıtty, sondaı-aq jarylys saldaryn joıýǵa atsalysyp jatqan barlyq quzyrly organ qyzmetkerleriniń jáne volonterlerdiń qajyrly eńbegin erekshe atap ótti.
– Sońǵy aqparatqa sáıkes, zardap shekkenderdiń sany 160-tan asty. Barsha qazaqstandyqtar birligimizdiń bekem ekenin kórsetip jatqanyn atap ótkim keledi. Elimizdiń ár túkpirinen azamattar alańdaýshylyq bildirýde, túrli uıymdar men kásiporyndardyń jumyskerleri zardap shekkenderge kómek kórsetý úshin birigip jatyr. Bir óńirdiń basyna túsken qıynshylyq – bárimizge ortaq másele. Biz halqymyzdyń yntymaǵynyń arqasynda barlyq qıyndyqty eńseremiz. Barsha qazaqstandyqtarǵa rızashylyǵymdy bildiremin, – dedi Elbasy.
Nursultan Nazarbaev óńirde qalypty jaǵdaıdy tezirek qalpyna keltirý jáne turǵyndarǵa jan-jaqty qoldaý kórsetý úshin memleket tarapynan barlyq sharalar qoldanylyp jatqanyn atap ótti.
Sý qaýipsizdigin qamtamasyz etý máselesi boıynsha elimizdegi sý resýrstarynyń jáne sý sharýashylyǵy nysandarynyń jaı-kúıi talqylandy. Sondaı-aq, turǵyndar úshin taza aýyz sýdyń qoljetimdi bolýyna jáne sýdy únemdep paıdalaný máselelerine erekshe nazar aýdaryldy.
Otyrys qorytyndysy boıynsha Arys qalasynda jóndeý jumystaryn júrgizý jáne azamattardyń turǵylyqty jerine oralýyn uıymdastyrý jóninde naqty tapsyrmalar berildi.
