Jýrnalıster qaýymyn oblys ákiminiń orynbasary Rýslan Álishev, Qazaqstannyń qurmetti jýrnalısi Galına Vorobeva, oblystyq Soltústik Qazaqstan gazetiniń bas redaktory Erbaqyt Amantaıuly quttyqtady.
«Tól mereke qarsańynda baılanys jáne aqparat qyzmetkerleri salamatty ómir saltyn nasıhattap, jarys jolyna shyǵýdy ıgi dástúrge aınaldyryp keledi. Barlyq komandalarǵa jeńis tileımin», dedi Rýslan Qanathanuly.
Qazaqstan Jýrnalıster odaǵy oblystyq fılıaly uıymdastyrǵan tartysty básekege ótken jylǵy spartakıadanyń chempıony Soltústik Qazaqstan gazetiniń, Qyzyljar, «MTRK» telearnalarynyń ujymdary, respýblıkalyq telearnalar men basylymdardyń menshikti tilshileri, ishki saıasat basqarmasynyń ókilderi, «Qazteleradıo» AQ oblystyq fılıalynyń, aýdandyq basylymdardyń qyzmetkerleri jáne M.Qozybaev atyndaǵy Soltústik Qazaqstan memlekettik ýnıversıtetiniń stýdentteri qatysty.
Sóz arasynda dástúrli sport túrlerimen qatar tuńǵysh ret qazaqtyń umyt qalǵan ulttyq oıyny «Botaı» degen ataýmen qaıtadan jańǵyrtylǵanyn aıta ketken jón. Barlyq qarsylastarynan basym túsken aýdandyq gazetter qyzmetkerleri komandasynyń ókili Erkebulan Elýbaev top jaryp, alǵashqy chempıon atandy. Ústel tennısinen erler arasynda «Qazteleradıo» AQ-nyń ókili Aleksandr Stanko jeńimpaz atandy. Qyzdar arasynda oblystyq gazettiń aǵa tilshisi Orynbasar Tólepbergenqyzy jeńistiń eń bıik tuǵyryna kóterildi. Voleıboldan bas júldeni «Soltústik Qazaqstan» gazeti men aýdandyq gazetter komandalary sarapqa salyp, sońǵysy ádemi oıyn órnegin kórsete bildi. Arqan tartý saıysynda menshikti tilshiler myqtylyq tanytty. Shaǵyn fýtbol, shahmat oıyndary men estafeta da qatysýshylarǵa umytylmas áser syılady.
Úzdik komandalarǵa kýboktar pen baǵaly syılyqtar tabystaldy.
