Kıiz úı tigý saıysy, «Rýhanı jańǵyrý» baǵdarlamasy aıasynda «Tarıh, tulǵa, tamyrlastyq» taqyrybynda kórme uıymdastyrý, ulttyq sport túrlerinen jarystar, «Qazaq dalasynyń uly mádenıeti» óner festıvali sekildi birneshe baǵytqa bólingen festıval praktıkalyq qyrymen kópshilik esinde qaldy.
Máselen, talaı ǵasyr boıy kóshpeli ata-babamyzdyń qutty qonysy bolǵan kıiz úı qazirgi qazaqtyń kúndelikti turmysynan alystap ketkeni ras qoı. Sodan da bolar, búginde ekiniń biri kıiz úıdi tigýdi bile bermeıdi. Toryatbasyndaǵy festıvaldiń bir ereksheligi osy boldy. Komandalar kıiz úıdi tigip, jınap, jasaý-jabdyǵyn oryn-ornymen paıdalanyp kórsetip jarysty. Bul saıysta bas júldege tigilgen 60 myń teńgeni shyńǵyrlaýlyqtar jeńip aldy. Syrym, Bórli jáne Tasqala aýdandary komandalary osy retpen 40, 30 jáne 20 myń teńge júldeni bólisti.
Sharanyń ekinshi kúni ulttyq sport túrleri – jamby atý, teńge ilý, kókpar tartý, aýdaryspaqqa arnaldy. Taqymy myqty jigitter júgen-quryq tımegen shý asaýlarǵa bas bildirtti. Taý týrızmimen aınalysatyn tabandy qyz-jigitter de bos otyrmady. Jamby atýdan 1-2 oryndy Shyńǵyrlaý aýdany, 3 oryndy Aqjaıyq aýdany ıemdendi. Sonymen qatar, taý týrızminen 1 oryndy Shyńǵyrlaý aýdany, 2 oryndy Bórli, 3 oryndy Tasqala aýdany jeńip aldy. Kókpar men aýdaryspaqta Oral qalasynyń «Ulttyq sport» mektebinen kelgen shabandozdar kásibı sheberlik kórsetti. Barlyq jeńimpazdar alǵys hatpen jáne aqshalaı syılyqpen marapattaldy.
Aıta keteıik, Toryatbasynda osyndaı toı byltyr da bolǵan edi. Biraq ol aýdan kóleminde ǵana uıymdastyrylsa, bıyl, mine, oblystyq deńgeıge kóterildi. Jalpy, Shyńǵyrlaý aýdany basshylary óńirde ólketanýshylyq qozǵalysyn jandandyryp, aýdannyń tereń tarıhy men týrıstik áleýetin nasıhattaýǵa erekshe nazar aýdaryp keledi.
