N.Nyǵmatýlın otyrystyń ashylýynda sóılegen sózinde barlyq depýtattyq korpýs atynan Arys qalasynda bolǵan tótenshe jaǵdaıdan qaza bolǵandardyń otbasylaryna kóńil aıtyp, sonymen birge zardap shekkenderdiń tezirek jazylyp ketýine tilektestik bildirdi.
– Osy kúnderi búkil qazaqstandyqtar bir el bolyp, bir halyq bolyp jumylyp, Arys qalasy turǵyndaryna qoldan kelgen kómekti kórsetýde. Sonyń ishinde Májilis depýtattary da birinshi kúnnen bastap osy oqıǵadan tys qalǵan joq. Depýtattar ózderiniń bir kúndik jalaqysyn arnaıy kómek kórsetý qoryna aýdardy. Al kesheden bastap bir top depýtatymyz halyqpen kezdesý úshin Arys qalasyna jol júrip ketti. Barshamyz Arys qalasynyń tezirek qalpyna kelip, turǵyndar jaǵdaıynyń tezirek jaqsarýyn tileımiz. Arys, biz birgemiz, – dedi Májilis Tóraǵasy.
Jalpy otyrystyń kún tártibi boıynsha Qazaqstan Respýblıkasynyń jáne Reseı Federasııasynyń shekara mańyndaǵy aýmaqtary turǵyndarynyń Qazaqstan-Reseı memlekettik shekarasyn kesip ótý tártibindegi ózgerister qamtylǵan zań jobasy boıynsha Syrtqy ister mınıstri Beıbit Atamqulov baıandama jasady.
Mınıstr búginde Qazaqstan men Reseı qarym-qatynastary memleketaralyq baılanystardyń etalony bolyp otyrǵanyn atap ótti. Memleketterdiń yqpaldastyǵy yntymaqtastyqtyń barlyq spektri boıynsha qaryshty damýymen aıqyndalýda. Qarqyndy saıası dıalog ornatyldy. Tereń ekonomıkalyq baılanystar quryldy.
Osy yntymaqtastyqtyń sátti órbýine baılanysty eki el arasyndaǵy memlekettik shekarany delımıtasııalaý tolyǵymen aıaqtalyp, al demarkasııasy boıynsha jumystar jalǵasýda.
B.Atamqulovtyń baıandaýynsha, eki el arasyndaǵy shekara 7 500 shaqyrymnan asady jáne álemdegi eń uzyn shekara bolyp esepteledi. Qazirgi ýaqytta Qazaqstan-Reseı shekarasynda 51 ótkizý beketi bar. Olardyń 30-y – avtokólik, 20-sy – temirjol jáne taǵy bireýi ózen arqyly. Sonymen birge shekara mańyndaǵy turǵyndarǵa arnalǵan 86 ótkizý beketteri jumys atqarýda. Olar atalǵan aımaqtar turǵyndarynyń qolaıly qozǵalysyn, barys-kelisin táýlik boıy qamtamasyz etýde.
Bul óz kezeginde eki eldiń shekarasyn boılaı qonystanǵan halyqqa eń jaqyn aýdan, oblys ortalyqtaryna baryp-kelýine qolaıly jaǵdaı týǵyzyp otyr. Sonymen qatar shekaradan ótýdiń jeńildetilgen túri týystyq baılanystardyń úzilmeýine de sebepker bolýda.
Depýtattarǵa ratıfıkasııalaý úshin usynylǵan kelisimniń 3-qosymshasynda kórsetilgen Shekara mańyndaǵy aýmaqtarda turatyn Qazaqstan men Reseı azamattarynyń shekarany kesip ótýi úshin jaramdy qujattar tizbesine ózgerister engizilip otyr.
– Qazaqstannyń ishki zańnamasynda azamattardy tirkeý kitabynyń kúshin joıýyna jáne mekenjaı anyqtamasynyń engizilýine oraı atalǵan kelisimge tıisti ózgerister engizý qajettigi týyndady. Bul ózgerister 2018 jyly 9 qarashada Petropavlda XV О́ńiraralyq yntymaqtastyq forýmynda qol qoıylǵan hattamamen engizildi. Qazirgi ýaqytta aýyldyq aýmaqtardyń barlyq ákimdikterinde ınternet jelisin qoldaný arqyly mekenjaı kýáligin beretin múmkindik bar. Osyǵan baılanysty bul hattamany qabyldaý Qazaqstan-Reseı memlekettik shekarasynyń mańyndaǵy aýmaqtarda turatyn Qazaqstan azamattarynyń ótý úderisin jeńildetýge jáne tártipke keltirýge múmkindik beredi, – dedi Syrtqy ister mınıstri.
Sonymen birge Reseıdiń Syrtqy ister mınıstrligi 2019 jyly 12 sáýirde joldaǵan notasynda Reseı tarapy hattamanyń kúshine enýi úshin qajetti memleketishilik rásimder aıaqtalǵanyn habarlaǵan.
Depýtattar zań jobasyn talqylaı kele, tutas qabyldady.
Jalpy otyrys barysynda «Qazaqstan Respýblıkasynyń Azamattyq prosestik kodeksine sottar jumysynyń zamanaýı formattaryn endirý, artyq sot rásimderi men shyǵyndaryn qysqartý máseleleri boıynsha ózgerister men tolyqtyrýlar engizý týraly» jáne «1994 jylǵy 15 sáýirdegi Keden isterindegi yntymaqtastyq jáne ózara kómek týraly kelisimge ózgerister engizý týraly hattamany ratıfıkasııalaý týraly» zań jobalary jumysqa alynyp, otyrys dástúrli depýtattyq saýaldarmen túıindeldi.
