Qasym-Jomart Toqaev elshilerdiń bárin Qazaqstandaǵy dıplomatııalyq mıssııalarynyń resmı túrde bastalýymen quttyqtap, memleketaralyq qatynastardy odan ári nyǵaıtý isinde tabys tiledi.
Memleket basshysy Rassa Djalıchandramen kezdesý barysynda Taılandtaǵy saılaýdyń tabysty ótýimen jáne eldiń jańa Premer-Mınıstriniń saılanýymen quttyqtady.
– Qazaqstan men Taıland barlyq salada, sonyń ishinde saıası, ekonomıkalyq jáne mádenı baǵyttarda dostyq qatynastardy jemisti damytyp keledi. Taılandqa bizdiń elimizden týrıster kóp barady. Sizdiń elińiz – qazaqstandyqtardyń súıikti jerleriniń biri. Elderimiz arasyndaǵy ózara qarym-qatynastardy odan ári damytýǵa septigińizdi tıgizetinińizge senimdimin, – dedi Memleket basshysy.
Qasym-Jomart Toqaev Iýsef Ábdelǵanımen kezdesýde Qazaqstan men Iordanııa arasyndaǵy yqpaldastyqtyń joǵary deńgeıde ekenin atap ótti.
– Elderimiz arasyndaǵy qarym-qatynastardyń jaqsy damýyna Korol II Abdalla zor úles qosty. Búginde ekijaqty yntymaqtastyq ózara dostyq pen senim negizinde tabysty damyp keledi, – dedi Qazaqstan Prezıdenti.
Qasym-Jomart Toqaev Enrıke Mendozamen kezdesýde ózara baılanystardyń odan ári nyǵaıa beretinine senim bildirip, dıplomatııalyq jumysta tabys tiledi.
– Elshi myrza, jańa qyzmetińizben quttyqtaımyn. Siz Venesýelanyń Qazaqstandaǵy alǵashqy Tótenshe jáne ókiletti elshisi bolǵandyqtan, eki tarap úshin de bul Senim gramotasyn tapsyrý rásiminiń mańyzy zor. Basshylaryńyzdyń bizdiń elimizde elshilik ashý jáne dıplomatııalyq mıssııa basshysy retinde sizdi jiberý jónindegi sheshimine rızashylyq bildiremin, – dedi Qasym-Jomart Toqaev.
Elshiler Memleket basshysyna senim gramotalaryn tapsyrǵan soń jeke-jeke brıfıng ótkizdi.
– Búgin Taıland Koroldiginiń jańa elshisi retinde Qazaqstan Prezıdenti, asa mártebeli Qasym-Jomart Toqaevqa Senim gramotasyn tabystaý qurmetine ıe boldym. Qasym-Jomart Toqaev Qazaqstan Prezıdenti bolyp saılanǵannan keıin senim gramotasyn tapsyrǵan birinshi elshi bolý – men úshin úlken mártebe. Senim gramotasyn tapsyrǵan soń Toqaev myrzamen shaǵyn áńgimelesý múmkinshiligi boldy. Biz qazirgi ýaqytta Qazaqstan men Taıland arasyndaǵy qatynas óte jaqsy degen ortaq pikirge keldik, – dedi Taıland Koroldiginiń Tótenshe jáne ókiletti elshisi Rassa Djalıchandra.
Sonymen qatar Rassa Djalıchandra bıyl Bangkok pen Nur-Sultan qalasy arasyndaǵy dostyqtyń 15 jyldyǵy ekendigin aıtyp, qazirgi ýaqytta Taıland elshiligi Nur-Sultan qalasy kúni merekesin atap ótýge daıyndalyp jatqanyn atap ótti.
Qazaqstan Prezıdentine Senim gramotasyn tapsyryp shyqqan Iordanııa Koroldiginiń elshisi Iýsef Ábdelǵanı Qazaqstan men Iordanııa Koroldigi arasynda tyǵyz qarym-qatynas ornaǵandyǵyna nazar aýdardy. Eki el arasynda úkimetaralyq komıssııanyń jumys isteıtindigin, mádenıet, bilim jáne ózge de salalarda birqatar kelisim jasalǵanyn aıtty.
– Qazaqstannyń Tuńǵysh Prezıdenti – Elbasy Nursultan Nazarbaev Iordanııamen jaqsy qarym-qatynasty jolǵa qoıý úshin kóp eńbek sińirgendigin aıryqsha atap ótkim keledi. Búgin Prezıdent Qasym-Jomart Toqaev ta Iordanııa Koroldigimen aradaǵy qarym-qatynasty odan ári damytýǵa barlyq ýaqytta daıyn ekenin aıtty, – dedi Iýsef Ábdelǵanı.
Al Venesýela elshisi Enrıke Antonıo Akýnıa Mendoza jańa tarıhı kezeńdi bastan keshirip otyrǵan Qazaqstan halqy men Úkimetine beıbitshilik, órleý men gúldený tileıtinin jetkizdi. «Qazaqstandaǵy bizdiń mıssııamyzdyń basty maqsaty – úkimetterimizdiń arasyndaǵy saıası, áleýmettik, mádenı, ekonomıkalyq yntymaqtastyqty nyǵaıtý, halyqtarymyzdyń arasyndaǵy dostyq pen yntymaqtastyq baılanystardy kúsheıtý, – dedi elshi.
